ចិន ៖ តាមប្រភពព័ត៌មាន Shanghaiist បានឲ្យដឹងថា បុរសម្នាក់ដែលជាម្ចាស់ហាងលក់ទំនិញ ត្រូវបានក្រុមជើងកាងមួយក្រុមមានគ្នា៥ទៅ៦នាក់វាយនឹងបំពង់ទីបដែក ព្រោះតែដេញក្មេងប្រុសម្នាក់មិនឲ្យនោមនៅខាងមុខហាង។
នេះគឺជាលើកទីពីរហើយនៅក្នុងខែនេះ ដែលមានមនុស្សត្រូវគេវាយឲ្យចូលពេទ្យ ក្រោយពីរំខានក្មេងនោមនៅទីសាធារណៈក្រៅបង្គន់។
តាមរយៈវីដេអូពីកាមេរ៉ាសុវត្ថិភាពនៅខាងមុខផ្សារទំនើបក្នុងតំបន់ Guangxi ប្រទេសចិន ដែលថតបានកាលពីថ្ងៃព្រហស្បត្តិ៍សប្តាហ៍មុន គេឃើញក្មេងប្រុសម្នាក់កំពុងឈរនោមដាក់ដើមឈើនៅតាមដងផ្លូវអ្នកថ្មើរជើង ខណៈដែលមេឃកំពុងបើកថ្ងៃចេស។
សេចក្តីសុខរបស់ក្មេងនោះ ត្រូវបានកាត់ដោយសារតែម្ចាស់ហាងមួយរូបចេញមកទាត់ពីក្រោយខ្នង ហើយជេរមិនឲ្យនៅនោមបន្តចំខាងមុខហាង។
ពីរម៉ោងក្រោយមក ក្មេងប្រុសម្នាក់នោះបាននាំក្រុមជើងកាង៥ទៅ៦នាក់ ដែលម្នាក់ៗកាន់សុទ្ធតែបំពង់ទីបដែក។ ពួកគេបានវាយម្ចាស់ហាង ហើយទាញចេញមកខាងក្រៅខាង រួចក៏រត់បាត់អស់។ លទ្ធផលគឺត្រូវដេកពេទ្យ។
កាលពីដើមខែក៏មានករណីស្រដៀងនេះកើតឡើងដែរ។ បុគ្គលិកអនាម័យតាមដងផ្លូវម្នាក់ក្នុង ក្រុង Ruzhou ខេត្ត Henan បានស្កាត់ក្មេងប្រុសម្នាក់មិនឲ្យនោមនៅលើផ្លូវ ដែលជាលទ្ធផលត្រូវម៉ែឪរបស់ក្មេងនោះវាយហើយជេរប្រទិច៕
ចែករំលែកព័តមាននេះ