ខេត្តកណ្តាល ៖ ប្រជាពលរដ្ឋបានប្រទះឃើញសពបុរសម្នាក់អណ្ដែតទឹក បង្កការភ្ញាក់ផ្អើលកាលពីវេលាម៉ោង៧និង៣០នាទីព្រឹកថ្ងៃទី១៥ តុលា ២០១៨ ស្ថិតនៅចំណុចមាត់ច្រាំងទន្លេ ក្នុងភូមិកណ្ដាល ឃុំសណ្ដារ ស្រុកលើកដែក ខេត្តកណ្តាល ។
ជនរងគ្រោះដែលស្លាប់មិនស្គាល់អត្តសញ្ញាណ ភេទប្រុស មានអាយុប្រហែលចន្លោះពី៣៥ទៅ៤០ឆ្នាំ កម្ពស់១,៧៣ម៉ែត្រ កដៃស្ដាំមានចងអំបោះពណ៌ក្រហម សក់ខ្លីស្លូត សម្បុរខ្មៅ ស្លៀកខោជើងវែង ពណ៌ខ្មៅ, ខោក្នុងពណ៌ខៀវ (មានអក្សរ calvin kiln), អាវក្រឡាការ៉ូដៃខ្លី ពណ៌ស្វាយ និងមានពាក់ អាវក្នុងពណ៌ប្រផេះ ។
ប្រភពព័ត៌មានបានឱ្យដឹងថា ក្រោយពីបានទទួលព័ត៌មានពីប្រជាពលរដ្ឋថាបានប្រទះឃើញសពអណ្ដែតទឹកនៅចំណុចកើតហេតុខាងលើភ្លាម កម្លាំងជំនាញបានសហការ និងបង្កើតគណៈកម្មាធិការចំរុះមួយ ដើម្បីពិនិត្យសាកសព រួមមានកម្លាំងជំនាញស្រុក កម្លាំងប៉ុស្តិ៍រដ្ឋបាលសណ្ដារ មេភូមិ មេឃុំ និងគ្រូពេទ្យឃុំ ដើម្បីធ្វើការពិនិត្យសព ។
ក្រោយពីធ្វើការពិនិត្យសព គឺពុំមានស្លាកស្នាមអ្វីគួរឱ្យសំគាល់នោះទេ ។
យោងតាមការពិនិត្យសពជនរងគ្រោះខាងលើ គណ:កម្មការចម្រុះបានធ្វើការសន្និដ្ឋានថា ជនរងគ្រោះពិតជាស្លាប់ដោយសារលង់ទឹក។
ក្រោយពីការពិនិត្យសពរួចរាល់ គណៈកម្មការចម្រុះបានធ្វើកំណត់ហេតុប្រគល់សពជូនមេភូមិ និងក្រុមប្រឹក្សាឃុំដើម្បីចាត់ចែងរៀបចំទុកដាក់តាមប្រពៃណី ៕
ចែករំលែកព័តមាននេះ