ខេត្តមណ្ឌលគិរី ៖ គ្រូបង្រៀនជនជាតិដើមភាគតិចម្នាក់ទប់កំហឹងមិនបានទាញពូថៅវាយគូទំនាស់ បែកក្បាលរងរបួសធ្ងន់ ដែលហេតុការណ៍នេះកើតឡើងនៅថ្ងៃទី១៣ តុលា ២០១៨ វេលាម៉ោង០៦និង៣០ នាទីល្ងាច នៅចំណុចភូមិពូរង៉ោល ឃុំមេម៉ង ស្រុកកែវសីមា ខេត្តមណ្ឌលគិរី ។
លោកវ៉ាន់ ដានីន អធិការនគរបាលស្រុកកែវសីមាបានឲ្យដឹងថា មានករណីហិង្សាដោយចេតនាមួយដែលបង្កឡើងដោយឈ្មោះ ភេទ សម្បត្តិ ភេទប្រុស អាយុប្រហែល២៥ឆ្នាំ ជនជាតិព្នង សញ្ជាតិខ្មែរ មុខរបរ គ្រូបង្រៀន ។ ចំណែកឯជនរងគ្រោះមានឈ្មោះ ព្រុំ សុខណេង ភេទប្រុស អាយុ៣០ឆ្នាំ មុខរបរកសិករ រងរបួសត្រូវចំក្បាលក្រោយ ។ អ្នកទាំងពីរនាក់មានទីលំនៅស្ថិតក្នុងភូមិពូរង៉ោល ឃុំមេម៉ង់ ស្រុកកែវសីមា ខេត្តមណ្ឌលគិរី ។
ក្រោយកើតហេតុជនដៃដល់បានរត់គេចខ្លួនបាត់ ចំណែកឯជនរងគ្រោះត្រូវបញ្ជូនមកកាន់មណ្ឌលសុខភាព។ បើតាមការបញ្ជាក់របស់សមត្ថកិច្ចករណីខាងលើនេះបណ្តាលមកពីទំនាស់ពាក្យសម្ដីគ្នាបន្តិចបន្តួច ក៏ឈានដល់ប្រើអំពើរហិង្សាតែម្តង ។ គិតវេលាម៉ោង១១យប់ ថ្ងៃទី១៣ តុលាដដែល លោកកាន់ ពេញ អធិការនគបាលក្រុងសែនមនោរម្យបានឲ្យដឹងថា កម្លាំងរបស់លោកបានសហការជាមួយកម្លាំងស្នងការដ្ឋានក្រោមបញ្ជាផ្ទាល់ពីលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានចុះស្ទាក់ផ្លូវជនដៃដល់ខាងលើ និងឃាត់ខ្លួនបាននៅគោលដៅភូមិពូត្រុំ សង្កាត់មនោរម្យ ក្រុងសែនមនោរម្យ ។លោកអធិការក្រុងបន្តថា «កម្លាំងយើងបានឃើញមុខសញ្ញាបង្ហាញមុខជិះម៉ូតូ អាសង់015 ស្លាកលេខ 1B- 3713 រតនគិរី ។
ក្រោយឃើញសមត្ថកិច្ចជនសង្ស័យមិនបានឈប់ ហើយជិះម៉ូតូគេច តែសមត្ថកិច្ចបានដេញតាម ជនសង្ស័យពីក្រោយជាប់ ។ រហូតជនសង្ស័យផ្តួលម៉ូតូរត់ចូលព្រៃលុះដល់ម៉ោង១០និង៣០នាទីជនសង្ស័យ បានចេញពីព្រៃមកជួបកម្លាំងយើងដែលពួនស្ទាក់ ដោយសង្ស័យបានសួរនាំ និងសម្គាល់ភិនភាគទើបឃាត់ខ្លួនបានតែម្តង ។ ហើយនាំទាំងម៉ូតូ និងមនុស្សមកកាន់អធិការដ្ឋាននគរបាលក្រុង និងប្រគល់ ជនសង្ស័យទៅការិយាល័យ ។ រីឯម៉ូតូរក្សារទុកបណ្តះអាសន្ននៅអធិការដ្ឋានក្រុង ដើម្បីចាត់ការតាមច្បាប់៕
ចែករំលែកព័តមាននេះ