អាជ្ញាធរជាតិព្រះវិហារអំពាវនាវភ្ញៀវមកកម្សាន្តចូលរួមវេចខ្ចប់កាកសំណល់ឲ្យបានត្រឹមត្រូវ
- ព្រះវិហារ
ខេត្តព្រះវិហារ ៖ អាជ្ញាធរជាតិព្រះវិហារអំពាវនាវឲ្យភ្ញៀវទេសចរមកកម្សាន្តនៅប្រាសាទកោះកែរ ចូលរួមវេចខ្ចប់កាកសំណល់ដាក់ធុងសំរាមឲ្យបានត្រឹមត្រូវ ។ នាយកដ្ឋានអភិឌ្ឈន៍ទេសចរនៃអាជ្ញាធរជាតិព្រះវិហារបានធ្វើការអំពាវនាវដល់អាជីវករលក់ដូរចំណីអាហារនៅក្នុងតំបន់រមណីយដ្ឋាន និងភ្ញៀវទេសចរទាំងអស់ដែលចូលមកកម្សាន្តនៅក្នុងតំបន់រមណីយដ្ឋានកោះកែរ ធ្វើយ៉ាងណារួមគ្នាថែរក្សាអនាម័យបរិស្ថានទុក ដាក់ វេចខ្ចប់សំរាម…
លោកទុយ រ៉ាន្នី អនុប្រធាននាយកដ្ឋានអភិវឌ្ឈន៍ទេសចរនៃអាជ្ញាធរជាតិព្រះវិហារប្រចាំតំបន់ប្រាសាទកោះកែរ បានលើកឡើងថា កន្លងទៅនៅពេលមានពិធីបុណ្យទានម្តងៗប្រជាពលរដ្ឋមួយចំនួនបានបោះបង់ចោលនូវសំរាម ឬកាកសំណល់នានាដែលសល់ពីការហូបចុកនោះធ្វើឲ្យប៉ះពាល់នូវបរិស្ថាន និងសណ្តាប់ធ្នាប់នៅក្នុងតំបន់រមណីយដ្ឋាន ។ លោកបន្ថែមថា រមណីយដ្ឋានវប្បធម៌ប្រវត្តិសាស្ត្រប្រាសាទកោះកែរត្រូវបានរាជរដ្ឋាភិបាលស្នើសុំដាក់បញ្ជូលជាសម្បត្តិបេតិកភណ្ឌពិភពលោក នៅពេលខាងមុខនេះ ។ ដោយឡែកបច្ចុប្បន្នរមណីយដ្ឋានប្រាសាទកោះកែរនេះកំពុងក្លាយជាបេក្ខភាពក្នុងការប្រឡងប្រណាំងរមណីយដ្ឋានទេសចរគំរូរួចមកហើយ កាលពីពេលកន្លងទៅនេះ ។
ដូច្នេះហើយ ដើម្បីចូលរួមលើកកម្ពស់តម្លៃបេតិកភណ្ឌជាតិប្រាសាទកោះកែរក៏ដូចជា សោភណ្ឌភាពរមណីយដ្ឋានមួយនេះឲ្យកាន់តែមានភាពស្រស់ស្អាត និងលេចធ្លោជាសកលនាឱកាសបុណ្យភ្ជុំបិណ្ឌនេះ អាជ្ញាធរជាតិ បានអំពាវនាវដល់អាជីវករដែលបម្រើសេវាកម្មទេសចរ លក់ដូរចំណីអាហារត្រូវចេះរក្សាអនាម័យសេវាកម្មរបស់ខ្លួនឲ្យទទួលបានគុណភាព ។ លើសពីនេះទៀតទាំងអាជីវករ និងភ្ញៀវទេសចរណ៍ទាំងអស់ត្រូវចូលរួមថែរក្សាអនាម័យ វេចខ្ចប់ កាកសំណល់ ឬសំរាមដែលសល់ពីការហូបចុកត្រូវយកទៅដាក់នៅក្នុងធុងសំរាមឲ្យបានត្រឹមត្រូវ ចៀសវាងការបោះចោលសំរាមផ្តេសផ្តាសគ្មានសណ្តាប់ធ្នាប់ ធ្វើឲ្យប៉ះពាល់ដល់បរិស្ថាន និងបាត់បង់សោភណ្ឌភាព ។
ជាមួយគ្នានេះភ្ញៀវទេសចរណ៍មកពីរាជធានីភ្នំពេញដែលមកលេងកម្សាន្តនៅប្រាសាទកោះកែរបានសម្តែងនូវក្តីរីករាយយ៉ាងខ្លាំង បន្ទាប់ពីបាននាំក្រុមគ្រួសារចូលមកទស្សនាសម្បត្តិបេតិកភណ្ឌនេះពោរពេញទៅដោយធម្មជាតិស្រស់បំព្រងមកលេងម្តងហើយ ចង់មកលេងទៀត ។ តែទោះជាបែបនេះក្តីពួកគាត់បានអះអាងថា ការទុកដាក់សំរាម និងកម្ទេចកំទីកាកសំណល់នានានៅក្នុងធុងសំរាមបានត្រឹមត្រូវនោះមិនត្រឹមតែបានលើកស្ទួយដល់តម្លៃនៃប្រាង្គប្រាសាទ និងបរិស្ថានប៉ុណ្ណោះទេ វាថែមទាំងបានទាក់ទាញនូវចំនួនភ្ញៀវទេសចរមិនថា ភ្ញៀវជាតិ ឬអន្តរជាតិនោះទេនឹងមានចំនួនកើនឡើង និងលើកមុខមាត់តម្លៃវប្បធម៌ប្រទេសកម្ពុជាកាន់តែខ្លាំងនៅលើសកលលោក ។
សូមបញ្ជាក់ថា តាមរបាយការណ៍របស់មន្ទីរទេសចរខេត្តព្រះវិហារក្នុងរយៈពេល៩ខែ ឆ្នាំ២០១៨នេះភ្ញៀវទេសចរ ចូលទៅកម្សាន្តនៅក្នុងរមណីយដ្ឋានវប្បធម៌ប្រវត្តិសាស្ត្រប្រាសាទកោះកែរ ក្នុងនោះភ្ញៀវជាតិមានចំនួន៦៦,៤៥៦នាក់ ថយចុះ៨.១៥% ភ្ញៀវអន្តរជាតិមានចំនួន២៣,០៧៣នាក់ ថយចុះ៥.៧៨% ៕
ចែករំលែកព័តមាននេះ