ខេត្តស្ទឹងត្រែង ៖ បញ្ជាការដ្ឋានមន្ទីរយុត្តិធម៌កងរាជអាវុធខេត្តស្ទឹងត្រែងនាព្រឹកថ្ងៃទី២៧ ខែកញ្ញា ឆ្នាំ២០១៨ បានបង្ហាញជនសង្ស័យមុខសញ្ញាជួញដូរគ្រឿងញៀនប្រុសស្រី២នាក់ក្រោយការចាប់ខ្លួនបន្តបន្ទាប់នៅស្រុកសៀមប៉ាង ខេត្តស្ទឹងត្រែង ។
ប្រភពព័ត៌មានអោយដឹងថា ការបង្ក្រាបរឹបអូសគ្រឿងញៀនខាងលើជំហានដំបូងនៅថ្ងៃទី២៥ ខែកញ្ញា ឆ្នាំ២០១៨ កម្លាំងកងរាជអាវុធហត្ថដឹកនាំដោយលោក ដួង វិចិត្រ មេបញ្ជាការរងកងរាជអាវុធហត្ថខេត្តស្ទឹងត្រែងចាប់ខ្លួនជនសង្ស័យម្នាក់ឈ្មោះ ជុំ ណាវណ្ណៈ ភេទប្រុស អាយុ៤០ឆ្នាំ មានទីលំនៅភូមិសៀមប៉ាង ឃុំសេកុង ស្រុកសៀមប៉ាង ដោយបានដកហូតគ្រឿងញៀននៅជាប់នឹងខ្លួនមួយកញ្ចប់ធំ ។
ក្រោយការចាប់ខ្លួនកម្លាំងកងរាជអាវុធហត្ថបាននាំមកបញ្ជាការដ្ឋានកងរាជអាវុធហត្ថខេត្ត និងសាកសួរជននៅពីក្រោយនៃបទល្មើសតែដោយសារលេចឮអំពីការចាប់ខ្លួនជនសង្ស័យខាងលើមេខ្លោងបានរត់គេចខ្លួន បន្ទាប់មកនៅយប់ថ្ងៃទី២៦ កញ្ញា ទើបតាមចាប់មេខ្លោងឈ្មោះ សាំង ញ៉ង ភេទស្រី អាយុ៤៨ឆ្នាំ រស់នៅភូមិសៀមប៉ាង ឃុំសេកុង ស្រុកសៀមប៉ាង ។
ប្រភពព័ត៌មានបន្តអោយដឹងថា ស្ត្រីមេខ្លោងខាងលើជាអ្នកនាំគ្រឿងញៀនតាមច្រករបៀងមកពីប្រទេសឡាវ និងប្រគល់អោយបុរសសង្ស័យជាបក្សពួកយកទៅកាន់មេខ្លោងម្នាក់ទៀតដែលមិនទាន់ចាប់ខ្លួនបាននៅឡើយ ។
មន្ត្រីអនុវត្តច្បាប់នៃមន្ទីរយុត្តិធម៌អោយដឹងថា ក្រោយការចាប់ខ្លួនជនសង្ស័យបន្តបន្ទាប់នាំមកបញ្ជាការដ្ឋានកងរាជអាវុធហត្ថខេត្តរួមវត្ថុតាងមន្ត្រីជំនាញបានធ្វើតេស្តរកសាធាតុជាតិញៀនជាក់ស្តែងវត្ថុតាងចាប់យកជាប្រភេទមេតំហ្វេតាមីន១កញ្ចប់ធំ ស្មើនឹងទម្ងន់សុទ្ធ១០២៤,៦០ ក្រាម, ទូរស័ព្ទដៃ២គ្រឿង, ក្រវិលមាស១គូរ និងកាបូបយួរដៃមួយ ។
បច្ចុប្បន្នវត្ថុតាង និងជនសង្ស័យត្រូវកម្លាំងកងរាជអាវុធហត្ថកសាងសំណុំរឿងបញ្ជូនទៅសាលាដំបូងនៅព្រឹកថ្ងៃទី២៧ ខែកញ្ញា ឆ្នាំ២០១៨ដើម្បីចាត់ការតាមនីតិវិធី ៕
ចែករំលែកព័តមាននេះ