ចៅក្រមខេត្តសៀមរាបសម្រេចដោះលែង ក្រុមលោកអាគីរ៉ាឱ្យនៅក្រៅឃុំ
- សៀមរាប
ខេត្តសៀមរាប ៖ តាមសម្តីរបស់លោក យិន ស្រ៊ាង អ្នកនាំពាក្យសាលាដំបូង និង អយ្យការអមសាលា ដំបូងខេត្តសៀមរាប បានប្រាប់ភ្នាក់ងារកោះសន្តិភាព…
ខេត្តសៀមរាប ៖ តាមសម្តីរបស់លោក យិន ស្រ៊ាង អ្នកនាំពាក្យសាលាដំបូង និង អយ្យការអមសាលា ដំបូងខេត្តសៀមរាប បានប្រាប់ភ្នាក់ងារកោះសន្តិភាព…
ខេត្តសៀមរាប ៖ តាមសម្តីរបស់លោក យិន ស្រ៊ាង អ្នកនាំពាក្យសាលាដំបូង និង អយ្យការអមសាលា ដំបូងខេត្តសៀមរាប បានប្រាប់ភ្នាក់ងារកោះសន្តិភាព នៅវេលាម៉ោង២ និង០៦នាទីរសៀល ថ្ងៃទី២១ ខែកញ្ញា ឆ្នាំ២០១៨នេះថា ជនសង្ស័យទាំង៣នាក់ របស់អង្គការសារមន្ទីរគ្រាប់មីនកម្ពុជា និងមូលនិធិសង្គ្រោះ (អាគីរ៉ា) ដែលត្រូវសមត្ថកិច្ចឃាត់ខ្លួនបាន កាលពីថ្ងៃទី៣០ ខែសីហានេះ ត្រូវបាន លោក ស៊ិន សុវណ្ណារ័ត្ន ចៅក្រមស៊ើបសួរ នៃសាលាដំបូងខេត្តសៀមរាប សម្រេចដោះលែងឱ្យនៅក្រៅឃុំ បណ្តោះអាសន្ន កាលពីថ្ងៃទី២០ ខែកញ្ញា ឆ្នាំ២០១៨ បន្ទាប់ពីមានឯកសារ ការសើ្នសុំរបស់លោក មេធាវីការពារក្តី។
គួរបញ្ជាក់ផងដែរថា ជនសង្ស័យទាំង៣នាក់ របស់អង្គការសារមន្ទីរគ្រាប់មីនកម្ពុជា និងមូលនិធិសង្គ្រោះ(អាគីរ៉ា) ដែលត្រូវសមត្ថកិច្ចឃាត់ខ្លួនបាន កាលពីថ្ងៃទី៣០ ខែសីហា ឆ្នាំ២០១៨ នៅស្រុកបន្ទាយស្រី ហើយបញ្ជូនទៅតុលាការនៅរសៀលថ្ងៃទី៣០ ខែសីហា ពាក់ព័ន្ធនឹងករណីរក្សាទុក អាវុធខុសច្បាប់ ត្រូវបានលោក ស៊ិន សុវណ្ណរ័ត្ន ចៅក្រមស៊ើបសួរ នៃសាលាដំបូងខេត្តសៀមរាប សម្រេចឃុំខ្លួនបណ្តោះអាសន្ននៅពន្ធនាគារខេត្ត ចោទពីបទរក្សាទុកអាវុធខុសច្បាប់តាមមាត្រ២៣ នៃច្បាប់គ្រប់គ្រងអាវុធជាតិផ្ទុះ។
មូលហេតុកាលពីវេលាម៉ោង១២ និង៣០នាទី ថ្ងៃត្រង់ នៅថ្ងៃទី២៧ ខែសីហា ឆ្នាំ២០១៨ នៅស្រុកបន្ទាយស្រីនោះ ដែលមានទីតាំង អង្គការសារមន្ទីរគ្រាប់មីនកម្ពុជា និងមូលនិធិសង្គ្រោះ(អាគីរ៉ា) នៅស្រុកបន្ទាយស្រីនោះ ករណីអគ្គិភ័យឆាបឆេះ នៅក្នុងទីតាំងអង្គការខាងលើ។ លោកវរសេនីយ៍ទោ នល់ រ៉ុង នាយរងការិយាល័យព្រហ្មទណ្ឌកម្រិតធ្ងន់ បានប្រាប់នៅរសៀលថ្ងៃទី៣១ ខែសីហា ឆ្នាំ២០១៨នេះថា ឱ្យដឹងថា ការឃាត់ខ្លួននេះ ធ្វើឡើងបន្ទាប់ពី មានហេតុការណ៍ឆាបឆេះនៅក្នុងសារមន្ទីរមីនរបស់លោក អាគីរ៉ា នៅក្នុងស្រុកបន្ទាយស្រី កាលពីថ្ងៃទី២៧ ខែសីហាឆ្នាំ២០១៨ កន្លងទៅ។
លោកបន្តថា មន្ត្រីអង្គការសារមន្ទីរមីនកម្ពុជាចំនួន ៣នាក់ ដែលសមត្ថកិច្ចឃាត់ខ្លួននោះ រួមមាន ៖ ទី១/ឈ្មោះ អាគីរ៉ា ភេទប្រុស អាយុ៤៧ឆ្នាំ តួនាទីជា ប្រធានអង្គការសារមន្ទីរមីនកម្ពុជា មានទីលំនៅភូមិខ្នារ ឃុំខ្នារសណ្តាយ ស្រុកបន្ទាយស្រី, ទី២/ ឈ្មោះ អឿន យ៉ុន ភេទប្រុស អាយុ៥៤ឆ្នាំ តួនាទីជាអនុប្រធានអង្គការ នៅភូមិខ្នារ ឃុំខ្នារសណ្តាយ និងទី៣/ ឈ្មោះ ហ៊ាញ សុគន្ធា ភេទប្រុស អាយុ៣៩ឆ្នាំ តួនាទីជាប្រធានប្រតិបត្តិ រស់នៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ដែលបានប្រព្រឹត្តិ កាលពីវេលាម៉ោង១២ ថ្ងៃទី២៩ ខែសីហា ឆ្នាំ២០១៨ ។
ស្ថិតក្នុងភូមិខ្នារ ឃុំខ្នារសណ្តាយ ស្រុកបន្ទាយស្រី ជាប់សង្ស័យពាក់ព័ន្ធនឹង ករណីរក្សាទុកអាវុធ ខុសច្បាប់ និងបើកអង្គការសារមន្ទីរគ្រាប់មីនគ្មានច្បាប់ដោយខ្លួនឯងនោះ ត្រូវបានកម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប ឃាត់ខ្លួនយកមកសួរនាំនៅការិយាល័យជំនាញ រួចរៀបចំកសាងសំណុំរឿងបញ្ជូន ដល់សាលាដំបូងខេត្ត កាលពីរសៀលថ្ងៃទី៣០ ខែសីហា ឆ្នាំ២០១៨នេះ ដើម្បីចាត់ការតាមផ្លូវច្បាប់។ ចំណែក លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានឱ្យដឹងថា ករណីនេះកម្លាំងនគរបាលជំនាញ បានធ្វើការឃាត់ខ្លួនជនសង្ស័យទាំង៣នាក់ ដោយចោទប្រកាន់ពីបទរក្សាទុកនូវអាវុធខុសច្បាប់ និងច្បាប់អង្គការសារមន្ទីរគ្រាប់មីននោះហួសសពុលភាពចំនួន៤ឆ្នាំមកហើយ។
ហើយចំណែក ក្មេងនៅក្នុងអង្គការចំនួន១៧នាក់ ក្នុងនោះស្រី៧នាក់ ត្រូវបានមន្ទីរសង្គមកិច្ចខេត្ត យកទៅចិញ្ចឹមបីបាច់ថែរក្សាបន្ត នៅកន្លែងមានសុវត្ថិភាព។ បើតាមមន្ត្រីជំនាញនៃអង្គការស៊ីម៉ាក់ បានឱ្យដឹងថា នៅក្នុងពេលចុះត្រួតពិនិត្យទីតាំងសារមន្ទីរមីនកម្ពុជានេះ កម្លាំងស៊ីម៉ាក់បានដកហូតបាន គ្រាប់បែកដៃចំនួន៩គ្រាប់ , មីនប្រភេទ៧២A ចំនួន១៥គ្រាប់ , គ្រាប់កាំភ្លើងខ្លីចំនួន៣២៥គ្រាប់ , ដងគ្រាប់បេចំនួន១, ម្ជុលភ្លើងមីនធុន៦៩ ចំនួន៥ដើម , គ្រាប់កាំភ្លើងដៃចំនួន១០គីឡូក្រាម , កាំភ្លើងស្វ័យប្រវត្តិឆេះខូច ចំនួន៦ដើម ,សំបកគ្រាប់មីនចំនួន២កេះឈើ , ខ្សែឆេះផ្ទុះចំនួន១ , កេះឈើដាក់គ្រាប់បែកចំនួន១ , កេះដែកដាក់ខ្សែយឺតចំនួន១ , ស្មាច់ដាក់គីបចរន្តចំនួន១ , គ្រាប់កាំភ្លើងខ្លីធុនK59 ចំនួន៤២ , គ្រាប់គីបចរន្តចំនួ២៩០ដើម និងគីបធម្មតា៣០០ ដើម។ មន្ត្រីជំនាញបានឱ្យដឹងទៀតថា ក្រោយពេលប្រមូលគ្រឿងផ្ទុះទាំងអស់ មន្ត្រីជំនាញស៊ីម៉ាក់ បានយកទៅកន្លែងមានសុវត្ថិភាព និងធ្វើការកម្ទេចចោល ផងដែរ។
ចំណែក ទីតាំងនោះត្រូវបិទជាបណ្តោះអាសន្ន។ បច្ចុប្បន្ន ជនសង្ស័យទាំង៣នាក់ ត្រូវបានសមត្ថកិច្ចបញ្ជូនទៅគុក នៅល្ងាចថ្ងៃទី៣០ ខែសីហា ឆ្នាំ២០១៨ រួចរាល់ហើយ រង់ចាំកាត់ទោសតាមក្រោយ។ សូមបញ្ជាក់ផងដែរថា លោក អ៊ោ ម៉ៅ ប្រធានមន្ទីរសង្កមកិច្ច អតីតយុវជន និងយុវនីតិសម្បទា ខេត្តសៀមរាប បានប្រាប់តាមទូរស័ព្ទនៅរសៀលថ្ងៃទី២១ ខែកញ្ញា ឆ្នាំ២០១៨នេះថា ចំពោះកុមារទាំង១៧នាក់ ដែលសមត្ថកិច្ចយកចេញពីអង្គការសារមន្ទីរគ្រាប់មីនកម្ពុជា និងមូលនិធិសង្គ្រោះ(អាគីរ៉ា) នោះ ត្រូវបានខាងមន្ទីរយកទៅផ្ញើនៅអង្គការចំនួន២ គឺអង្គការកម្ពុជា ដើម្បីទាំងអស់គ្នា ចំនួន១០នាក់ និង អង្គការសាន់រ៉ាយ ចំនួន៧នាក់ ហើយទាំងអស់គ្នានោះមាន សុវត្ថិភាព ព្រមទាំងមានការហូបចុកគ្រប់គ្រាន់ទេ មិនមែន ដូចពាក្យគេចោទបង្ហោះតាមសង្គមហ្វេសបុកនោះទេ៕
ចែករំលែកព័តមាននេះ