ខេត្តកណ្ដាល ៖ បុរសម្នាក់មានចរិតឈ្លើយកោងកាចរហូតធ្វើឲ្យស្ត្រីជាម្ដាយមីងមិនពេញចិត្ត បានកាត់កាល់ចោលលែងរាប់រក ជាហេតុធ្វើឲ្យបុរសនោះតូចចិត្តយ៉ាងខ្លាំង មិនតែប៉ុណ្ណោះបានចងគំនុំដក់ជាប់នៅក្នុងចិត្តរបស់ខ្លួនថែមទៀតផង លុះពេលផឹកស្រាស្រវឹងបានប្រើហឹង្សាជេរប្រមាថ និងទាត់ទៅលើម្ដាយមីងចំនួន៥ជើង បណ្ដាលឲ្យស្ត្រីជាម្តាយមីងរងរបួសគ្រេចជើង។
បន្ទាប់មកបានទាញចានឆ្នាំងរបស់ម្ដាយមីងបោកចោល បណ្ដាលឲ្យបែក និងក្រពឹតបង្កឱ្យមានការភ្ញាក់ផ្អើលដល់អ្នកភូមិទាំងយប់ ហើយកម្លាំងនគរបាលឃុំទួលព្រិច ចុះទៅអន្តរាគមន៍ចាប់ខ្លួនចាត់ការតាមច្បាប់ភ្លាមៗតែម្ដង។
ហេតុការណ៍នោះបានកើតឡើងកាលពីវេលាម៉ោង៦និង២៥នាទីយប់ថ្ងៃទី១៦ ខែកញ្ញា ឆ្នាំ២០១៨ នៅក្នុងភូមិខ្លុង ឃុំទួលព្រេច ស្រុកអង្គស្នួល ខេត្តកណ្ដាល។
នគរបាលបានឲ្យដឹងថា ជនសង្ស័យត្រូវជាក្មួយឈ្មោះចក់ ឡាង ហៅជាតិ ភេទប្រុស អាយុ២៤ឆ្នាំ មុខរបរមិនពិត នៅភូមិខាងលើ ។ ចំណែកជនរងគ្រោះ ឈ្មោះអ៊ុយ សាវរី ភេទស្រីអាយុ៣៩ឆ្នាំ ជនជាតិខ្មែរ មុខ
របរកម្មការិនីរោងចក្រ មានទីលំនៅក្នុងភូមិជាមួយគ្នា ត្រូវជាម្ដាយមីងបង្កើតរបស់ជនសង្ស័យ បានរងរបួសគ្រេចជើងខាងស្តាំ ដោយឡែកសម្ភារៈខូចខាតគឺបែកចានមួយចំនួនក្រពិតឆ្នាំង១ ហើយគោ១ក្បាលទៀតក៏បានរងរបួសជើងមុខដោយសារអំបែងចានផងដែរ។
តាមប្រភពដដែលបានបន្តឲ្យដឹងទៀតថា ជនសង្ស័យជាក្មួយប្រុសមានចរិកកោងកាចឈ្លើយ មិនសូវគោរពម្ដាយមីងនោះទេ កន្លងមកតែងតែបញ្ចេញអាកប្បកិរិយាមិនសមរម្យ ទើបស្ត្រីជាម្ដាយមីងមិនពេញចិត្ត និងលែងរាប់រក។ដោយសារតែមូលហេតុនេះហើយ ទើបធ្វើឲ្យជនសង្ស័យរូបនេះខឹងសម្បារ និងមានគំនុំយ៉ាងខ្លាំងជាមួយម្ដាយមីង លុះដល់ថ្ងៃកើតហេតុ ជនសង្ស័យបានផឹកស្រាស្រវឹង ហើយក៏បានស្រែកជេរប្រមាថម្ដាយមីងយ៉ាងខ្លាំង។
ប្រភពខាងលើបានបន្តថា ជនសង្ស័យត្រូវជាក្មួយបានស្រែកគំរាមម្តាយមីងថា «យប់នេះមិនឲ្យរួចខ្លួនទេ អញនិងសម្លាប់ហើយ» បន្ទាប់មកជនសង្ស័យបានហក់ទៅទាត់ធាក់ស្ត្រីជាម្ដាយមីងចំនួន៥ជើងត្រូវចំភ្លៅខាងស្តាំ បណ្តាលឲ្យរងរបួសគ្រេចជើងយ៉ាងដំណំ ។ ខណៈនោះបានបង្កឲ្យមានការភ្ញាក់ផ្អើលយ៉ាងខ្លាំងហើយកម្លាំងនគរបាលបានចេញអន្តរាគមន៍ ចាប់ខ្លួនភ្លាមៗ បន្ទាប់មកបាននាំទៅកាន់អធិការដ្ឋាននគរបាលស្រុកអង្គស្នួល ដើម្បីសាកសួរ និងកសាងសំណុំរឿងចាត់ការតាមច្បាប់៕
ចែករំលែកព័តមាននេះ