ទីភ្នាក់ងារព័ត៌មានបរទេសកាលពីពេលថ្មីៗកន្លងមកផ្សាយថា លោក ហ្វាន ឆេងឆេង (Fan Chengcheng) ប្អូនប្រុសរបស់នាង ហ្វាន ពីងពីង កំពុងមានភាពល្បីល្បាញផ្នែកយុវវ័យ បច្ចុប្បន្នបានទប់អារម្មណ៍មិនបាន និងសម្រក់ទឹកភ្នែកនៅចំពោះមុខទស្សនិកជនក្នុងពិធីជួបជុំមួយរបស់ក្រុម «Nine Percent» ធ្វើឲ្យទស្សនិជនភាគច្រើនមានជំនឿថា ស្ថានការណ៍របស់នាង ហ្វាន ពីងពីង បងស្រីរបស់គេអាចមានសភាពធ្ងន់ធ្ងរ ។
នៅក្នុងពិធីជួបជុំរបស់ក្រុម «Nine Percent» កាលពីសប្ដាហ៍កន្លងមករៀបចំឡើងនៅក្រុងណានជីង ហ្វាន ឆេងឆេង គឺជាសមាជិកម្នាក់របស់ក្រុមខាងលើបានបង្ហូរទឹកភ្នែកចំនួន២លើក និងបញ្ជាក់ថា នេះគឺជាការចូលរួមនៅក្នុងក្រុមលើកចុងក្រោយ គេប្រហែលជាមិនបានមកជួបអ្នកគាំទ្រនានានៅក្រុងបាងកក ប្រទេសថៃ ដែលរៀបចំឡើងនៅថ្ងៃទី២៣ ខែកញ្ញា ឆ្នាំ២០១៨ ខាងមុខ ។
ស្របពេលជាមួយគ្នានេះ ហ្វាន ឆេងឆេង មិនបានបញ្ជាក់ពីហេតុផលអ្វីលើការអវត្តមាននេះ ទេ ប៉ុន្តែមានមនុស្សជាច្រើនជឿថា គេបានទទួលបំរាមទៅក្រៅប្រទេស ព្រោះតែបញ្ហាការគេចពន្ធរបស់បងស្រី និងនៅមានដំណឹងថា បុរសរូបនេះត្រូវផ្ដាច់ចេញពីការឃោសនា និងលុបចោលការបង្ហាញខ្លួនក្នុងកម្មវិធីនានាផងដែរ ៕
ចែករំលែកព័តមាននេះ