រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថាគ្មានអ្វីដែលត្រូវនិយាយចរចាជាមួយអតីតបក្សប្រឆាំងនោះទេ គឺមានតែនិយាយថា ការអនុ វត្តលទ្ធិប្រជាធិបតេយ្យ និងនីតិរដ្ឋនៅកម្ពុជា…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថាគ្មានអ្វីដែលត្រូវនិយាយចរចាជាមួយអតីតបក្សប្រឆាំងនោះទេ គឺមានតែនិយាយថា ការអនុ វត្តលទ្ធិប្រជាធិបតេយ្យ និងនីតិរដ្ឋនៅកម្ពុជា ។
ការលើកឡើងរបស់អ្នកនាំពាក្យកាន់អំណាចនេះ បន្ទាប់ពីសភាអ៊ឺរ៉ុបបានស្នើរដ្ឋាភិបាលកម្ពុជាធ្វើការចរចាផ្នែកនយោបាយជាមួយអតីតគណបក្សប្រឆាំង (កឹម សុខា) ដែលកំពុងជាប់ ពន្ធនាគារ និងអ្នកនយោបាយអតីតបក្សប្រឆាំង១១៨នាក់ កាលពីថ្ងៃទី១៣ កញ្ញា កន្លងមកនេះ ។
យ៉ាងណាក្តីលោក សុខ ឥសាន បានគូសបញ្ជាក់ឲ្យដឹងនៅថ្ងៃទី១៦ កញ្ញាយ៉ាងដូច្នេះថា « អត់និយាយពីការចរចាទេ តែនិយាយពីការអនុវត្តលទ្ធិប្រជាធិតេយ្យ និងនីតិរដ្ឋ និងដើម្បីធានា សន្តិភាពស្ថិរភាពនយោបាយ និងសេចក្តីសុខជូនប្រទេសជាតិទាមទារការអនុវត្តលទ្ធិប្រជាធិ បតេយ្យ និងនីតិរដ្ឋ ។ ជនណាគណបក្សណាប្រព្រឹត្តល្មើសច្បាប់ និងរំលោភលទ្ធិប្រជាធិបតេយ្យត្រូវទទួលខុសត្រូវ ចំពោះមុខច្បាប់ដោយខ្លួនឯង» ។ លោកសង្កត់ធ្ងន់បន្ថែមថា «គណបក្សកាន់អំណាច និងរាជរដ្ឋាភិបាលកម្ពុជាមិនលូកដៃចូលកិច្ចការតុលាការជាដាច់ខាត ។
រាជរដ្ឋាភិបាលកម្ពុជាមិនធ្វើការចរចាណាមួយជាមួយអ្នករំលោភច្បាប់ឡើយ ។ ការប្រព្រឹត្តល្មើសច្បាប់មិនមែនជារឿងនយោបាយដែលត្រូវដោះស្រាយតាមផ្លូវចរចាឡើយ ត្រូវតែទៅដោះស្រាយជាមួយតុលាការជាចាំបាច់ » ។ ទោះបីជាសភាអ៊ឺរ៉ុបទុករយៈពេល៣ខែ សម្រាប់ការចរចាផ្លូវនយោបាយ យ៉ាងណាក្តីអ្នកនាំពាក្យគណបក្សកាន់អំណាចក៏បានស្នើមជ្ឈដ្ឋាននានាកុំបំភាន់មតិសាធារណៈឲ្យសោះមិនអាចឲ្យរាជរដ្ឋាភិបាលកម្ពុជាទោរទន់តាមបានជាដាច់ខាត ។
ហេតុនេះ គ្មានជម្រើសអ្វីក្រៅពីការអនុវត្តច្បាប់ចំពោះអ្នកល្មើសច្បាប់ ហើយគ្មានទេការចរចានយោបាយនោះកុំសង្ឃឹមឡើយ ។ ជាមួយគ្នានោះដែរ អ្នកនាំពាក្យគណបក្សកាន់អំណាចក៏ឆ្លើយតបចំពោះការដាក់កំហិតរបស់សភាសហគមន៍អឺរ៉ុប ឲ្យទម្លាក់ចោលការចោទប្រកាន់ កឹមសុខា មិនអាចធ្វើបានទេ ព្រោះករណីលោក កឹម សុខា កំពុងនៅក្នុងដៃ និងនីតិវិធីរបស់តុលាការ ។ ត្រូវទុកឲ្យតុលាការបន្តដំណើរការរឿងក្តីនេះឲ្យចប់សព្វគ្រប់ទៅ ។ ចំណែកការផ្តល់ សិទ្ធដល់អ្នក១១៨នាក់ ម៉េចកើតបើកពុងអនុវត្តសាលដីកាស្ថាពររបស់តុលាការកំពូល រួចហើយនោះចាំចប់៥ឆ្នាំសិន ។
ប្រគល់ សង តំណែងក្រុមប្រឹក្សាខេត្តរាជធានីក្រុងស្រុក ខណ្ឌ និងឃុំសង្កាត់ម៉េចកើត បើបានបែងចែកតាមច្បាប់កម្ពុជា រួចអស់ហើយនោះ ។ មានច្បាប់ឯណាទាមទារយកមកបែងចែកឡើងវិញនោះ ? ។
លើកពីនេះទៅទៀតលោក សុខ ឥសានក៏បានលើកឡើងថា បើចង់ផ្តល់សិទ្ធិអំណាចឲ្យសង្គមស៊ីវិលអ្នកសារព័ត៌មានមកបំពេញតួនាទីវិញ លុះត្រាតែអស់លោកទាំងនោះគោរព ច្បាប់និងក្រមសីលធម៌ត្រឹមត្រូវ និងបំពេញកាតព្វកិច្ចជូនរដ្ឋឲ្យបានគ្រប់គ្រាន់ ។ លោកបញ្ជាក់ថា «រាជរដ្ឋាភិបាលកម្ពុជា នៅបន្តអនុវត្តវិធានការណ៍ច្បាប់ ចំពោះជនទាំងឡាយណាដែលល្មើសច្បាប់ដើម្បីពង្រឹងនីតិរដ្ឋដោយមិនចង់ប្រើអាវុធឡើយ ។
រាជរដ្ឋាភិបាលកម្ពុជាជានិច្ចជាកាលតែងតែគោរពសិទ្ធិមនុស្ស និងសេរីភាពគ្រប់បែបយ៉ាង និងគ្រប់រូបភាពដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជាកុំឲ្យតែរំលោភលើសិទ្ធិអ្នកដទៃ និងទំនៀមទំលាប់ដ៏ល្អ និងសន្តិសុខជាតិ ជាពិសេសកុំឲ្យតែយកផែនការផ្តួលរំលំរបស់បរទេសមកអនុវត្តនៅកម្ពុជាទៅបានហើយ » ។
សូមជម្រាបថា ការលើកឡើងរបស់អ្នកនាំពាក្យគណបក្សប្រជាជនកម្ពុជានេះ បន្ទាប់ពីសភាអ៊ឺរ៉ុបបានបើកកិច្ចប្រជុំ កាលពីថ្ងៃទី១៣ កញ្ញានេះ ហើយបានអនុម័តសេចក្តីសម្រេចចុងក្រោយ មួយលេខ២០១៨/២៨៤២ (RSP) ទាមទារឲ្យអាជ្ញាធរកម្ពុជាទម្លាក់ចោលរាល់បទចោទប្រឆាំងនឹងមេដឹកនាំគណបក្សសង្គ្រោះជាតិ លោក កឹម សុខា និងអំពាវនាវឲ្យមានការដោះលែងរូបលោកឲ្យមានសេរីភាពឡើងវិញ ជាបន្ទាន់ និងដោយឥតលក្ខខណ្ឌ ។
យ៉ាងណាក្តីលោក អេង ឆៃអ៊ាង អតីតអនុប្រធានគណបក្សសង្គ្រោះជាតិបានលើកឡើងថាសភាអឺរ៉ុបបានសម្រេចពន្យាការអនុម័តលើញ្ញត្តិមួយស្តីពីបញ្ហាកម្ពុជា ដោយទុកឱ កាសជាលើកចុងក្រោយដល់រដ្ឋាភិបាលកម្ពុជាកែប្រែខ្លួន ។ លោកបន្តថា មូលហេតុនៃពន្យាពេល ដោយគេមិនចង់ឃើញពលរដ្ឋកម្ពុជា ជាពិសេសកម្មកររាប់សែននាក់ គ្មានការងារធ្វើប៉ះពាល់ដល់ជីវភាពគ្រួសារ និងពិបាកស្តារស្ថានភាព ក្រោយពីការដាក់ទណ្ឌកម្ម ហើយបើក្នុងរយៈពេលនេះ រដ្ឋាភិបាលនៅតែមិនអើពើធ្វើតាមលក្ខខណ្ឌដែលគេទាមទារនោះទេ សភាអឺរ៉ុប នឹងប្រជុំអនុម័តដាក់ទណ្ឌកម្មក្នុងកិច្ចប្រជុំពេញអង្គយ៉ាងយូរបីខែទៀត ៕
ចែករំលែកព័តមាននេះ