ខេត្តកំពង់ឆ្នាំង ៖ កសិករដាំបន្លែគ្មានសារធាតុគីមី នៅភូមិព្រៃពួច ឃុំជ្រៃបាក់ ស្រុករលាប្អៀរ ទទួលបានជោគជ័យ បន្ទាប់ពីរៀនសូត្រតាមមន្ត្រីកសិកម្មដែលបានចូលនិវត្តន៍ និងបានអំពាវនាវឲ្យប្រជាពលរដ្ឋចូលរួមដាំដំណាំមិនប្រើប្រាស់សារធាតុគីមី ។…
ខេត្តកំពង់ឆ្នាំង ៖ កសិករដាំបន្លែគ្មានសារធាតុគីមី នៅភូមិព្រៃពួច ឃុំជ្រៃបាក់ ស្រុករលាប្អៀរ ទទួលបានជោគជ័យ បន្ទាប់ពីរៀនសូត្រតាមមន្ត្រីកសិកម្មដែលបានចូលនិវត្តន៍ និងបានអំពាវនាវឲ្យប្រជាពលរដ្ឋចូលរួមដាំដំណាំមិនប្រើប្រាស់សារធាតុគីមី ។
កញ្ញាម្នាក់ឈ្មោះ ចាន់ សុភត្រា មានទីលំនៅភូមិឃុំខាងលើបាននិយាយប្រាប់ភ្នាក់ងារកោះសន្តិភាព យើងថា បច្ចុប្បន្ននេះកញ្ញាបានរៀនសូត្រតាមពីឪពុករបស់នាងដែលជាមន្ត្រីកសិកម្មចូលនិវត្តន៍ដោយដាំបន្លែមិនប្រើប្រាស់សារធាតុគីមីឡើយ ។ បច្ចុប្បន្នការដាំដំណាំរបស់នាងមានដូចជា ត្រសក់ ប៉េងប៉ោះ ត្រប់ ល្ហុង អំពៅ និងថ្មីៗនេះឪពុកនាងក៏បានសាកល្បងដាំទំពាំងបារាំងបានរយៈពេលពីរខែហើយដែរ ។ នាងបានបញ្ជាក់ប្រាប់ថា ការដាំដំណាំរបស់នាងដែលរៀនសូត្រពីឪពុករបស់នាង គឺមិនប្រើប្រាស់សារធាតុគីមីទាល់តែសោះ ប្រើតែជីលាមកគោ ក្របី និងជីកំប៉ុស្ត ដែលធ្វើពីកាកសំណល់ផ្ទះបាយតែប៉ុណ្ណោះ ។
ក្រៅពីដាំបន្លែគ្រួសារនាងនៅមានចិញ្ចឹមសត្វ មាន់ ទា និងចិញ្ចឹមត្រីផងដែរ ។ នាងបានបញ្ជាក់ទៀតថា បច្ចុប្បន្ននេះបន្លែរបស់គ្រួសារនាងមិនចាំបាច់យកទៅលក់ទីផ្សារនោះទេ មានអ្នកមក ទិញដល់ផ្ទះ ហើយភាគច្រើនម៉ូយ គឺទិញយកទៅពិសាដោយផ្ទាល់ ព្រោះតែមានទំនុកចិត្តលើបន្លែរបស់គ្រួសារនាង ។ ប៉ុន្តែពេលខ្លះម្តាយនាងក៏បានដាក់យកទៅលក់ផ្សារខ្លះដែរ ដោយសារបន្លែច្រើនពេក ។
ជាមួយគ្នានេះនាងបានអំពាវនាវដល់ប្រជាពលរដ្ឋជាកសិករដាំដំណាំបង្ការផ្សេងៗ សូមចូលរួមកាត់បន្ថយការប្រើប្រាស់សារធាតុគីមីដែលដោយប៉ះពាល់ដល់សុខភាព ។ ចំណែកឯអ្នកទទួលទានវិញ គួរតែជ្រើសរើសបន្លែបង្ការណាដែលមិនប្រើប្រាស់សារធាតុគីមី ដើម្បីសុខភាព ក្រុមគ្រួសារ ។
បើតាមការបញ្ជាក់របស់លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទ ខេត្តកំពង់ឆ្នាំងបានឲ្យដឹងថា បច្ចុប្បន្ននេះមានសហគមន៍ជាច្រើនបាននាំគ្នាដាំបន្លែ និងចិញ្ចឹមសត្វ គ្មានប្រើប្រាស់សារធាតុគីមី ។ ហើយសហគមន៍ទាំងនោះបានប្រមូលយកមកលក់ផ្តុំគ្នា នៅផ្សារលើរៀងរាល់ថ្ងៃពុធ និងបច្ចុប្បន្នកំពុងរៀបចំដាក់លក់មួយកន្លែងទៀតនៅផ្សារទួលក្រឡាញ់ ។ លោកបានបញ្ជាក់ដែរថា ក្រៅពីការយកមកលក់នៅផ្សារលើសហគមន៍នៅបានចងក្រងគ្នា ដើម្បីប្រមូលបន្លែ និងសត្វមាន់ ទា ដែលគ្មានសាធាតុគីមីទាំងនោះទៅលក់នៅរាជធានីភ្នំពេញផងដែរ ៕
ចែករំលែកព័តមាននេះ