ខេត្តព្រៃវែង ៖ ដើម្បីជាការរួមចំណែកជួយដល់សង្គមព្រះភិក្ខុ យឹម សាយ័ន្ត ចៅអធិការវត្តពោធ៌សិរី ហៅវត្តព្រែកចាម និងព្រះគ្រូចៅអធិការវត្តបឹងផ្សោតបាននាំយកអំណោយសប្បុរសធម៌ ទៅចែកជូនដល់បងប្អូនប្រជាពលរដ្ឋដែលរងគ្រោះដោយទឹកជំនន់ជាង៤០០គ្រួសារ នៅភូមិព្រែកចាម និងភូមិប្រាសាទ ក្នុងឃុំបន្លិចប្រសាទ ស្រុកពាមរក៌ តាំងពីថ្ងៃទី៧ កញ្ញានេះ រហូតដល់ថ្ងៃទី៩ កញ្ញា ។
ប្រជាពលរដ្ឋជាង៤០០គ្រួសារនេះ ពួកគាត់រស់នៅអមសងខាងដងទន្លេតូច ដូច្នេះនៅពេលដែលទឹកឡើងធំ ផ្ទះរបស់ពួកគាត់ត្រូវទឹកជន់លិចកន្លែងខ្លះត្រឹមជង្គង់ ខ្លះត្រឹមចង្កេះ និងកន្លែងខ្លះទៀតលិចក្បាលតែម្តង ជាហេតុធ្វើឲ្យពួកគាត់មានការលំបាកខ្លាំង ហើយចង់ទៅណាមកណាត្រូវធ្វើដំណើរដោយទូក ។
ដោយមើលឃើញពីការលំបាកនេះទើបព្រះគ្រូចៅអធិការវត្តព្រែកចាមនាម យឹម សាយ័ន្ត បានដើររៃអង្គាសពុទ្ធបរិស័ទជិតឆ្ងាយរួមទាំងបច្ច័យរបស់វត្ត និងរបស់ព្រះអង្គផ្ទាល់បានរៀបចំជាអំណោយតិចតួចយកទៅចែកជូនដល់ជនរងគ្រោះជាង៤០០គ្រួសារនេះដោយក្នុងមួយគ្រួសារៗទទួលបានអង្ករ៥គីឡូ មី៥កញ្ចប់ ត្រីខ២កំប៉ុង ទឹកត្រី១ដប តែ២កញ្ចប់ ស្ករសរ១កញ្ចប់ និងទឹកក្រូច១កំប៉ុង ។
ព្រះភិក្ខុ យឹម សាយន្ត័ បានមានសង្ឃដីកាថា អំណោយទាំងអស់នេះមានចំនួនតិចតួចណាស់ មិនអាចជួយកាត់បន្ថយការខ្វះខាតរបស់ញាតិញោមបានយូរអង្វែងទេ ប៉ុន្តែវា គឺជាទឹកចិត្តរបស់ព្រះតេជគុណក៏ដូចជា សប្បុរសជនជិតឆ្ងាយទាំងអស់ផងដែរ ដែលក្នុងនោះរួមមានឯកឧត្តម ជាម យៀប និងលោកជំទាវ អង្ករ១តោន ព្រះគ្រូចៅអធិការវត្តបឹងផ្សោត អង្ករ១០០គីឡូ មី២កេះ ត្រីខ២កេះ ទឹកក្រូច២កេះ អ្នកស្រី ហ៊ី គឹមហួយ មី៥កេះ ព្រមទាំងអំណោយផ្ទាល់ខ្លួនរបស់ព្រះតេជគុណទៀត សរុបជាទឹកប្រាក់ប្រមាណជិត៣០០០ដុល្លារ ៕
ចែករំលែកព័តមាននេះ