ប្រទេសស៊ីរី ៖ ប្រធានាធិបតីអាមេរិកលោកដូណាល់ ត្រាំកាលពីថ្ងៃទី៣កញ្ញា បានព្រមានស៊ីរីប្រឆាំងការវាយលុកលើខេត្តអ៊ីដលីប ជាតំបន់ស៊ីរីចុងក្រោយស្ថិតក្រោមការត្រួតត្រារបស់ពួកឧទ្ទាម។លោកប្រកាសថាប្រតិបត្តិការបែបនោះអាចបង្កឲ្យមានសោកនាដកម្មមនុស្សធម៌មួយ។ តាម TWITTER លោកត្រាំសរសេរថា ប្រធានាធិបតីស៊ីរីលោកបាចាអាល់អាសាដ…
ប្រទេសស៊ីរី ៖ ប្រធានាធិបតីអាមេរិកលោកដូណាល់ ត្រាំកាលពីថ្ងៃទី៣កញ្ញា បានព្រមានស៊ីរីប្រឆាំងការវាយលុកលើខេត្តអ៊ីដលីប ជាតំបន់ស៊ីរីចុងក្រោយស្ថិតក្រោមការត្រួតត្រារបស់ពួកឧទ្ទាម។លោកប្រកាសថាប្រតិបត្តិការបែបនោះអាចបង្កឲ្យមានសោកនាដកម្មមនុស្សធម៌មួយ។
តាម TWITTER លោកត្រាំសរសេរថា ប្រធានាធិបតីស៊ីរីលោកបាចាអាល់អាសាដ ពុំត្រូវធ្វើការវាយប្រហារដោយគ្មានការប្រុងប្រយ័ត្នលើខេត្តអ៊ីដលីបឡើយ។ ពួករុស្ស៊ី និងអ៊ីរ៉ង់នឹងប្រព្រឹត្តការខុសឆ្គងខាងមនុស្សធម៌ធ្ងន់ធ្ងរបំផុតមួយដោយចូលរួមក្នុងសោកនាដកម្មមនុស្សធម៌ធំនេះ។មនុស្សច្រើនពាន់នាក់អាចស្លាប់ ហើយយើងមិនត្រូវឲ្យរឿងបែបនោះកើតមានឡើយ។
អង្គការសហប្រជាជាតិនិងបណ្ដាអង្គការក្រៅរដ្ឋាភិបាល បានព្រមានថាការវាយប្រហារដោយទ្រង់ទ្រាយធំលើខេត្តអ៊ីដលីប អាចនាំឲ្យមានគ្រោះមហន្តរាយមនុស្សធម៌យ៉ាងធំបំផុតពុំធ្លាប់មាន ចាប់តាំងពីផ្ទុះជម្លោះនៅស៊ីរីពីឆ្នាំ២០១១មក។
ចាប់តាំងពីច្រើនសប្ដាហ៍មកហើយ ស៊ីរីបានប្រមូលផ្ដុំកងទ័ពនៅតាមច្រកចូលខេត្តអ៊ីដលីបស្ថិតនៅភាគពាយ័ព្យប្រទេស ជាប់ព្រំដែនជាមួយតួកគី។ខេត្តនេះស្ថិតក្នុងផែនការវាយលុករបស់ក្រុងដាម៉ាស់និងសម្ព័ន្ធមិត្តរុស្ស៊ី ដែលសំដៅជាពិសេសលើពួកជីហាដនៃក្រុមHAYAT TAHRIR AL CHAM ជាក្រុមគ្របដណ្ដប់ដោយពួកយុទ្ធជននៃអតីតសាខាអាល់កៃដានៅស៊ីរី។
តួកគីជួយទ្រទ្រង់ក្រុមឧទ្ទាមមួយចំនួន ក៏ដាក់ពង្រាយកងទ័ពក្នុងតំបន់នោះហើយចង់ចៀសវាងការវាយលុកមួយ ដែលអាចបង្កឲ្យមានរលកនៃជនភៀសខ្លួនយ៉ាងធំចូលក្នុងដែនដីខ្លួន។ ចំណែកក្រុមឧទ្ទាមផ្សេងៗ បានប្រមូលកម្លាំងត្រៀមទប់ទល់ការវាយលុកធំនោះ។រដ្ឋមន្ត្រីការបរទេសរុស្ស៊ីលោកស័រហ្គេយឡាវរ៉ូវ ធ្លាប់អះអាងថា អ៊ីដលីបប្រៀបដូចជាដុំដំបៅមួយដែលត្រូវតែវះកាត់យកចេញ៕
ចែករំលែកព័តមាននេះ