គំរាមសម្លា.ប់បុគ្គលិកកាសែតធំមួយរិះគន់លោកត្រាំ
សហរដ្ឋអាមេរិក ៖ បុរសអាយុ៦៨ឆ្នាំម្នាក់ត្រូវចាប់ខ្លួន កាលពីថ្ងៃទី៣០ សីហា ២០១៨ ពីបទគំរាមសម្លាប់បុគ្គលិកកាសែតអាមេរិកធំមួយ គឺកាសែត BOSTON GLOBE…
សហរដ្ឋអាមេរិក ៖ បុរសអាយុ៦៨ឆ្នាំម្នាក់ត្រូវចាប់ខ្លួន កាលពីថ្ងៃទី៣០ សីហា ២០១៨ ពីបទគំរាមសម្លាប់បុគ្គលិកកាសែតអាមេរិកធំមួយ គឺកាសែត BOSTON GLOBE ។
ការគំរាមរបស់បុរសរូបនោះហាក់ធ្វើឡើងក្រោយការប្រកាសរបស់កាសែតនេះថា ខ្លួននឹងចេញផ្សាយចម្លើយតបមួយចំពោះការវាយប្រហារប្រឆាំងបណ្ដាសារព័ត៌មានពីសំណាក់លោកដូណាល់ ត្រាំ។
រដ្ឋអាជ្ញាសហព័ន្ធក្រុងបូស្តុន បានគូសបញ្ជាក់ថា ប៉ូលិសអាមេរិកនាថ្ងៃទី៣០ សីហា បានចាប់ខ្លួនបុរសដែលគំរាមសម្លាប់បណ្ដានិយោជិតកាសែត BOSTON GLOBE ដែលរូបគេចាត់ទុកថា ជាសត្រូវរបស់ប្រជាជន។ បុរសរូបនេះមានឈ្មោះថា ROBERT CHAIN អាយុ៦៨ឆ្នាំ មានដើមកំណើតនៅកាលីហ្វ័រនីញ៉ា ត្រូវនាំខ្លួនមកកាន់តុលាការសហព័ន្ធក្រុងឡូសអេនចឺឡែស នារសៀលថ្ងៃទី៣០ សីហា ដើម្បីធ្វើការចោទប្រកាន់រូបគេ។ ក្នុងករណីមានការកាត់ទោស ជននោះអាចជាប់គុក៥ឆ្នាំ ហើយពិន័យជាប្រាក់២៥០.០០០ដុល្លារ។
យោងតាមរដ្ឋអាជ្ញាថា លោក ROBERT CHAIN បានចេញការអំពាវនាវ១៤លើកដែលគំរាមកាសែត BOSTON GLOBE រវាងពីថ្ងៃទី១០ទៅទី២២ សីហា។ ការអំពាវទាំងនេះហាក់ដូចជាធ្វើឡើង ដោយសារការប្រកាសរបស់កាសែតនោះនាថ្ងៃទី១០ សីហាថា ខ្លួននឹងចេញផ្សាយជាមួយសារព័ត៌មានជាង២០០ទៀត ចម្លើយតបចំពោះការវាយប្រហារជាច្រើនប្រឆាំងសារព័ត៌មានពីសំណាក់លោកដូណាល់ត្រាំ។
ការវាយបកមួយរបស់កាសែតទាំងនោះមានចំណងជើងថា បណ្ដាអ្នកកាសែតពុំមែនជាសត្រូវ ចេញផ្សាយកាលពីថ្ងៃទី១៦ សីហា។ ការវាយបកនោះចោទប្រកាន់ប្រធានាធិបតីថា ភូតកុហក ហើយប្រៀបប្រដូចប្រធានាធិបតីទៅនឹងមេបោកប្រាស។
លោកត្រាំតែងចោទបណ្ដាសារព័ត៌មានថា ចេញផ្សាយការបំភ្លៃនានា រហូតដល់ចាត់ទុកជាសត្រូវរបស់ប្រជាជនទៀតផង។ ក្នុងការអំពាវនាវរបស់គេ បុរសរូបនេះក៏ចាត់ទុកកាសែត BOSTON GLOBE ជាសត្រូវរបស់ប្រជាជនផងដែរ ហើយគំរាមសម្លាប់បណ្ដាបុគ្គលិករបស់កាសែតនេះ បាញ់ចំក្បាលពួកគេនាថ្ងៃចេញចម្លើយតបនាវេលាម៉ោង១៦នៃថ្ងៃនោះ៕
ចែករំលែកព័តមាននេះ