សហរដ្ឋអាមេរិក ៖ កាលពីថ្ងៃទី២៦ សីហា កើតមានការបាញ់ប្រហារមួយនៅទីក្រុងJACKSONVILLE រដ្ឋផ្លរីដា នាឱកាសនៃការប្រកួត MADDEN NFL ជាការប្រកួតធ្វើត្រាប់បាល់ទាត់អាមេរិកមួយ បណ្ដាលឲ្យមនុស្សស្លាប់៣នាក់ រួមទាំងខ្មាន់កាំភ្លើងម្នាក់ ចំណែកមនុស្ស១១នាក់ទៀតរងរបួស។
ក្នុងសន្និសីទសារព័ត៌មានមួយប្រមុខប៉ូលិសក្រុងលោក MIKE WILLIAMS បានថ្លែងថា អ្នកចូលរួមការប្រកួត២នាក់ត្រូវបានស្លាប់ ចំណែកខ្មាន់កាំភ្លើងបានបាញ់សម្លាប់ខ្លួនឯង។ លោកអះអាងថាក្នុងការបាញ់ប្រហារនេះ មនុស្សទាំង៣នាក់ស្លាប់នៅនឹងកន្លែង។ ហើយមុននេះមានសេចក្ដីរាយការណ៍ពីមនុស្សស្លាប់៤នាក់ ខណៈការប្រកួតកំពុងប្រព្រឹត្តទៅស្រាប់តែឮស្នូរកាំភ្លើង។
ការប្រកួតធ្វើក្នុងបារមួយនៃតំបន់ក្រុង JACKSONVILLE ដែលសម្បូរដោយភោជនីយដ្ឋាន ព្រមទាំងកន្លែងកម្សាន្តឯទៀតៗនៅជាប់មាត់ស្ទឹង ST JOHNS បណ្ដាក្រុមលេងល្បែងវីដេអូវិជ្ជាជីវៈចូលរួមការប្រកួតនោះក្នុងដំណាក់កាលជម្រុះ ដែលតាមដានមើលដោយផ្ទាល់តាមអ៊ីនធើរណេត។
អ្នកចូលរួមការប្រកួតម្នាក់លោក STEVEN JAVARUSKI ដែលកាសែត LOS ANGELES TIMES សាកសួរនិយាយថា បុរសខ្មាន់កាំភ្លើងជាអ្នកចូលរួមប្រកួតម្នាក់ដែលត្រូវចាញ់គេ។ ជននោះមានដើមកំណើតនៅបាល់ទីម័រ រដ្ឋម៉ារីឡែនឈ្មោះ DAVID KATZG អាយុ២៤ឆ្នាំ។ គេយល់ថា ដោយសារគេចាញ់ការប្រកួត ទើបខឹងហើយប្រព្រឹត្តអំពើបាញ់ប្រហារបែបនោះ៕
ចែករំលែកព័តមាននេះ