ខេត្តបន្ទាយមានជ័យ ៖ បង្ក្រាបឈ្មួញនាំចូលសត្វអណ្តើក១៣០ក្បាលពីប្រទេសថៃ ហើយត្រូវបាននាំយកសត្វអណ្តើកទាំងនោះមកលែងនៅតំបន់អភិរក្សអូររន្ទះបាញ់នៅថ្ងៃទី២១ ខែសីហា ឆ្នាំ២០១៨ នៅស្រុកព្រះនេត្រព្រះ ។
លោក ជា ផល្លី នាយខ័ណ្ឌរដ្ឋបាលព្រៃឈើបន្ទាយមានជ័យបានប្រាប់ថា សត្វអណ្តើកចំនួន១៣០ក្បាលដែលត្រូវបាននាំយកមកលែងនៅតំបន់អភិរក្សអូររន្ទះបាញ់ក្នុងស្រុកព្រះនេត្រព្រះ ហើយសត្វអណ្តើកនេះក្នុងចំណោមសត្វព្រៃចំនួន១៧០ក្បាលដែលកម្លាំងកងរាជអាវុធហត្ថខេត្តបន្ទាយមានជ័យ សហការជាមួយមន្ត្រីខ័ណ្ឌរដ្ឋបាលព្រៃឈើបន្ទាយមានជ័យបង្ក្រាបបានកាលពីថ្ងៃទី៥ ខែសីហា ឆ្នាំ២០១៨ ស្ថិតនៅចំណុចស្រុកព្រះនេត្រព្រះ។
លោកបានបញ្ជាក់ថា សត្វអណ្តើកដែលត្រូវបានលែងចំនួន១៣០ក្បាលគឺជាសត្វអណ្តើកដែលឈ្មួញនាំចូលពីប្រទេសថៃហើយនាំទៅខេត្តសៀមរាប និងភ្នំពេញ ដែលកន្លងមកមន្ត្រីជំនាញបានសហការជាមួយកងកម្លាំងបង្ក្រាបសត្វព្រៃបាន៥ករណី ក្នុង១ករណីមិនតិចជាង១០០ទៅ៥០០ក្បាលដែលសហការជាមួយកម្លាំងវ៉ៃអ៊ែក។
លោក ឃូរ ពៅ អភិបាលស្រុកព្រះនេត្រព្រះបានបញ្ជាក់ថា ក្រោយពេលដែលកម្លាំងកងរាជអាវុធហត្ថសហការជាមួយមន្ត្រីមេព្រៃបង្ក្រាបបទល្មើសសត្វព្រៃចាប់បានសត្វអណ្តើកពីឈ្មួញនាំចូលពីប្រទេសថៃ ហើយត្រូវបានលោក ប៉ាង វណ្ណាសេដ្ឋ ប្រធានមន្ទីកសិកម្មរុក្ខាប្រមាញ់ និងនេសាទខេត្តបន្ទាយមានជ័យដឹកនាំមន្ត្រីជំនាញរួមជាមួយកងកម្លាំងនាំយកសត្វអណ្តើកទាំងនោះមកលែងក្នុងតំបន់អភិរក្សអូររន្ទះបាញ់ ស្ថិតស្រុកព្រះនេត្រព្រះ៕
ចែករំលែកព័តមាននេះ