ខេត្តបាត់ដំបង ៖ ពិធីបូកសរុបលទ្ធផលការងារយោធាការងារសន្តិសុខ ខែកក្កដា និងផ្សព្វផ្សាយផែនការក្នុងខែសីហា ឆ្នាំ២០១៨ ដែលបានធ្វើឡើងក្នុងទីបញ្ជាការដ្ឋានយោធភូមិភាគទី៥ វេលាព្រឹកថ្ងៃទី០៨ ខែសីហានេះ ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ លោកឧត្តមសេនីយ៍ឯក ផាន់ សាមន្ថា នាយរងសេនាធិការចម្រុះអគ្គបញ្ជាការ កងយោធពលខេមរភូមិន្ទ ប្រចាំទិសយោធភូមិភាគទី៥ ព្រមទាំងមេបញ្ជាការរង នាយសេនាធិការរង នាយការិយាល័យចំណុះយោធភូមិភាគទី៥ ចំនួន៨៥នាក់បានចូលរួម ។
លោកឧត្តមសេនីយ៍ត្រី មូល សុភី ទទួលបន្ទុកការិយាល័យទី៣ និងអន្តរាគមន៍បានអានរបាយការណ៍ប្រចាំខែកក្កដា ដែលមានសកម្មភាព និងស្ថានការក្នុងភូមិសាស្ត្រយោធភូមិភាគទី៥ ឲ្យអង្គប្រជុំបានវាយតម្លៃ រកចំណុចខ្លាំង- ខ្សោយ ដើម្បីបន្តអនុវត្តន៍ទៅរកការរីកចម្រើននៅខែបន្ទាប់ទៅមុខទៀត ។ បន្ទាប់មកលោកឧត្តមសេនីយ៍ត្រី ប៊ិន សារ៉ន នាយការិយាល័យទី១ បានអានសេចក្តីសម្រេចស្តីពីការបែងចែកភារកិច្ច ទទួលខុសត្រូវ របស់មេបញ្ជាការង នាយសេនាធិការរងទៅតាមគោលដៅ របស់អង្គភាព ដើម្បីអនុវត្តន៍ការងាឲ្យមានប្រសិទ្ធិភាពបន្ថែមទៀត រួចហើយលោកឧត្តមសេនីយ៍ទោ សេង ធារិន មេបញ្ជាការរងយោធភូមិភាគ មេបញ្ជាការកងពលថ្មើរជើងលេខ៥១ បានបញ្ជាក់ពីការងាររបស់កងកម្លាំងបានចុះជួយសង្គ្រោះប្រជាពលរដ្ឋជួបការលំបាក និងហ្វឹកហ្វឺនបន្ថែមនៅក្នុងភូមិសាស្ត្ររបស់កងពលដែលទទួលខុសត្រូវក្នុងខេត្តបន្ទាយមានជ័យកន្លងមក ។
លោកឧត្តមសេនីយ៍ទោ ព្រាប ឧត្តម មេបញ្ជាការរងយោធភូមិភាគប្រធានតំបន់៤ ប្រចាំស្រុកវាលវែង ខេត្តពោធិ៍សាត់បានរាយការណ៍ និងចុះជួយប្រជាជនកំពុងជួបស្ថានភាពទឹកជំនន់ ជួបការលំបាកកាត់ផ្តាច់ផ្លូវមួយចំនួនតាមលក្ខខណ្ឌភូមិសាស្ត្រដែលជាតំបន់ព្រៃភ្នំពីពេលថ្មីៗនេះ ។
លោកឧត្តមសេនីយ៍ទោ ឯក សំអូន មេបញ្ជាការង នាយសេនាធិការយោធភូមិភាគទី៥ បានថ្លែងថា សូមក្តាប់ឲ្យបានបញ្ហាអាកាសធាតុតាមគោលដៅរៀងៗខ្លួន ដើម្បីមានភាពងាយស្រួលចាត់កម្លាំងបន្ថែមចុះជួយប្រជាពលរដ្ឋកុំឲ្យជួបការលំបាក ព្រោះកន្លងមក ភូមិសាស្ត្រខ្លះត្រូវទឹកជំនន់លិច តែមានកន្លែងខ្លះមានទឹកមិនគ្រប់គ្រាន់ក្នុងការដាំដុះរបស់ប្រជាកសិករទៅវិញ ។
លោកឧត្តមសេនីយ៍ឯក ប៊ុន សេង បានថ្លែងថា គុណភាពកងទ័ពយើងកន្លងមក គឺអនុវត្តន៍តាមការពង្រឹងចលនាប្រឡងប្រណាំង និងទស្សនកិច្ចសិក្សា ជំរុញការកសាងស្វែងយល់ពីគ្នាទៅវិញទៅមក គ្រប់តាមបណ្តាអង្គភាព ទើបយើងកាន់តែមានគុណភាពបន្ថែមទៀត តែយើងត្រូវពង្រឹងបន្ថែមនូវវិស័យព័ត៌មានសង្គមវិទ្យា (ហ្វេសប៊ុក) ដែលមាននៅក្នុងដៃគ្រប់គ្នាឲ្យបានច្បាស់ ព្រោះជួនកាលវាជាព័ត៌មានបំពុលសង្គមឲ្យជួបភាពវឹកវរជ្រួលច្របល់ តែបើយើងក្តាប់បានវាជាផលប្រយោជន៍ល្អសម្រាប់ខ្លួនយើង និងស្នាដៃរបស់គ្រប់អង្គភាពដែលបានធ្វើកន្លងមក ។
ដូច្នោះសូមនាំគ្នាពង្រឹងបន្ថែមទៀតដែលទទួលផលប្រយោជន៍មកដល់ខ្លួនយើង ដល់សង្គមជាតិ ដល់ប្រជាជន ដែលកំពុងមានសុខសន្តិភាព និងការអភិវឌ្ឍ កំពុងមានរហូតមកកុំឲ្យបាត់បង់ទៅវិញបានឡើយ ៕
ចែករំលែកព័តមាននេះ