រាជធានីភ្នំពេញ៖ក្រសួងវប្បធម៌ និងវិចិត្រសិល្បៈបានចេញលិខិតស្នើឲ្យអាជ្ញាធរដែនដី សហការសម្រួលផ្តល់ភាពងាយស្រួលជាមួយនឹងការផ្តល់ទីតាំងថតណាមួយសម្រាប់ផលិតករនានា ក្នុងការថតខ្សែភាពយន្ត បន្ទាប់ពីបញ្ហានេះត្រូវផលិតករក្នុងស្រុកនានាត្អូញត្អែរនាពេលកន្លងមក ។ កាលពីថ្ងៃទី៣១ ខែកក្កដា ឆ្នាំ២០១៨លោកជំទាវភឿង សកុណា…
រាជធានីភ្នំពេញ៖ក្រសួងវប្បធម៌ និងវិចិត្រសិល្បៈបានចេញលិខិតស្នើឲ្យអាជ្ញាធរដែនដី សហការសម្រួលផ្តល់ភាពងាយស្រួលជាមួយនឹងការផ្តល់ទីតាំងថតណាមួយសម្រាប់ផលិតករនានា ក្នុងការថតខ្សែភាពយន្ត បន្ទាប់ពីបញ្ហានេះត្រូវផលិតករក្នុងស្រុកនានាត្អូញត្អែរនាពេលកន្លងមក ។
កាលពីថ្ងៃទី៣១ ខែកក្កដា ឆ្នាំ២០១៨លោកជំទាវភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានគណៈកម្មការអន្តរក្រសួងសម្រួលការផលិតស្នាដៃភាពយន្តក្នុងព្រះរាជាណាចក្រកម្ពុជា បានជួបប្រជុំ និងពិភាក្សាជាមួយថ្នាក់ដឹកនាំក្រសួង ស្ថាប័នពាក់ព័ន្ធនឹងវិស័យភាពយន្ត និងអភិបាលរាជធានីខេត្ត ដើម្បីដោះស្រាយបញ្ហាប្រឈមរបស់ផលិតករភាពយន្តជាតិ និងអន្តរជាតិសម្តៅជំរុញកម្ពុជាឲ្យក្លាយជាដែនដីនៃការថតភាពយន្ត។
ប្រធានស្តីទីនៃនាយកដ្ឋានភាពយន្តលោក ប៉ុក បូរក្ស បានអះអាងប្រាប់កោះសន្តិភាពថា «កន្លងមកយើងបានផ្តល់ជាលិខិតមួយទៅកាន់ផលិតករ ប៉ុន្តែបញ្ហានេះគឺនៅមានការលំបាកសម្រាប់ផលិតករ ដើម្បីស្នើសុំបន្តទៅតាមអាជ្ញាធររាជធានី ខេត្ត ដើម្បីស្នើសុំផ្តល់ទីតាំងថត ។ដោយឈរលើបញ្ហាទាំងនេះក្រសួងបានសម្រេចចេញជាលិខិតនេះឡើង ដោយសារយើងបានដឹងពីខ្លឹមសារ និងរូបភាពនៃការថត ហេតុនេះអាជ្ញាធរត្រូវមានការសហការ និងសម្របសម្រួលផ្តល់ឲ្យផលិតករ ហើយផលិតករខ្លួនឯងក៏ត្រូវផ្តល់ព័ត៌មានជាមុនដល់អាជ្ញាធរដែនដីផងដែរមុនចាប់ផ្តើមថត »។
បើតាមលោកប៉ុក បូរក្ស កិច្ចប្រជុំនោះក៏បានពិភាក្សាផងដែរ ក្នុងការស្វែងរកវិធីសាស្ត្រនានាសម្រាប់លើកទឹកចិត្តដល់ផលិតករភាពយន្តទាំងក្នុងស្រុក និងក្រៅស្រុក ។ បញ្ហានេះក្រសួងបានធ្វើរួចហើយ ដោយបានស្នើដល់ក្រសួងសេដ្ឋកិច្ច និងហិរញ្ញវត្ថុឲ្យមានការលើកលែង ឬព្យួរទុកនូវពន្ធសម្រាប់ការផលិតភាពយន្តនៅក្នុងស្រុកខ្មែរទាំងអស់ ។
ដោយឡែកសម្រាប់ផលិតករបរទេសក៏កំពុងតែពិភាក្សាជាមួយគណៈកម្មការនោះ ស្វែងរកចំណុចណាដែលអាចជួយសម្រួលនិងលើកលែង ដើម្បីជាការទាក់ទាញផលិតករបរទេសឲ្យមកថតកុននៅក្នុងស្រុកខ្មែរបានច្រើន។
ជាមួយគុណតម្លៃនៃលិខិតអនុញ្ញាតដែលចេញដោយក្រសួងវប្បធម៌ និងវិចិត្រសិល្បៈនាពេលនេះត្រូវបានលោក ប៉ុក បូរក្ស អះអាងថា វាជាប្រយោជន៍មួយសម្រាប់ចំណេញពេលវេលាដល់ផលិតករក្នុងស្រុក និងផ្តល់ភាពងាយស្រួលដល់ផលិតករក្នុងស្រុក បន្ទាប់ពីពួកគាត់បានត្អូញត្អែរទៅលើបញ្ហាខាងលើនេះ។ ជាឧទាហរណ៍មានផលិតករខ្លះមានបំណងចង់ថតនៅតំបន់ប្រាសាទអង្គរវត្ត ឬរមណីយដ្ឋាន និងផ្លូវសាធារណៈនានាគឺមានការលំបាក ប៉ុន្តែនៅពេលដែលលិខិតនេះចេញទៅគឺវានឹងផ្តល់ភាពងាយស្រួលសម្រាប់ពួកគាត់ ។
ជាការកត់សម្គាល់កាលពីពេលកន្លងមកភាគីពាក់ព័ន្ធនឹងវិស័យភាពយន្ត ដូចជាផលិតករ សិល្បករ តំណាងរោងភាពយន្ត និងអ្នកចែកចាយភាពយន្តខ្មែរ និងបរទេស បានជួបជុំគ្នាលើកពីកង្វល់ក្នុងវិស័យភាពយន្តដែលកំពុងជួបប្រទះនាពេលបច្ចុប្បន្ន ដាក់ជូនរាជរដ្ឋាភិបាលដោះស្រាយ។ កង្វល់នោះរួមមានការធ្លាក់ចុះគុណភាពកុនខ្មែរ ការហូរចូលកុនបរទេស និងបញ្ហាទាក់ទងនឹងការសុំទីកន្លែងថតភាពយន្តជាដើម ។
លោកឆាយ បូរ៉ា ប្រធានសមាគមភាពយន្តកម្ពុជា បញ្ជាក់ថា ចំណុចសំខាន់ទាំងនេះដើម្បីឲ្យភាគីពាក់ព័ន្ធដោះស្រាយ ជាជាងការតតាំងដាក់គ្នាតាមរយៈប្រព័ន្ធផ្សព្វផ្សាយ ។ លោក ឆាយ បូរ៉ា បញ្ជាក់ប្រាប់ពីគម្រោងក្នុងការបង្កើតគណៈកម្មការវាយតម្លៃភាពយន្តខ្មែរដើម្បីលើកស្ទួយគុណភាព សំណើទៅកាន់រដ្ឋាភិបាលពិចារណាលើការលើកលែងពន្ធលើផលិតករភាពយន្ត និងការសើរើឡើងវិញចំពោះភាគលាភ និងតម្លាភាពក្នុងការអនុវត្តកិច្ចសន្យា ។ ទាក់ទងនឹងទីតាំងថត ផលិតករខ្មែរមួយចំនួនទៀតបានលើកឡើងពីបញ្ហាសុំទីតាំងថតនៅកន្លែងវប្បធម៌នានាដែលត្រូវការឲ្យផលិតករស្នើសុំលិខិតអនុញ្ញាតពីច្រើនស្ថាប័ន ហើយនៅតែគ្មានសិទ្ធិអនុញ្ញាតទៀត ។
លោកឆាយ បូរ៉ា បញ្ជាក់ថា«កង្វល់ទាំងឡាយរបស់វិស័យភាពយន្តត្រូវបានសមាគមភាពយន្តកម្ពុជាដាក់ជូនដល់ក្រសួងពាក់ព័ន្ធ ដូចជាក្រសួងវប្បធម៌ និងវិចិត្រសិល្បៈ ក្រសួងព័ត៌មាន ក្រសួងទេសចរណ៍ និងក្រសួងអបរំ យុវជន និងកីឡា ជាដើម ដើម្បីដោះ ស្រាយ»៕
ចែករំលែកព័តមាននេះ