រាជធានីភ្នំពេញ ៖ ប្រជាពលរដ្ឋប្រមាណជាង៣០នាក់ ប្រដាប់ដោយដំបង ដាវ កាំបិត ដុំថ្ម ដបសាំង និងកំប៉ុងហ្គាស បានផ្ទុះការតវ៉ានិងបានផ្តួលម៉ូតូគំរាមដុតប្រឆាំងនឹងអាជ្ញាធរខណ្ឌឫស្សីកែវ…
រាជធានីភ្នំពេញ ៖ ប្រជាពលរដ្ឋប្រមាណជាង៣០នាក់ ប្រដាប់ដោយដំបង ដាវ កាំបិត ដុំថ្ម ដបសាំង និងកំប៉ុងហ្គាស បានផ្ទុះការតវ៉ានិងបានផ្តួលម៉ូតូគំរាមដុតប្រឆាំងនឹងអាជ្ញាធរខណ្ឌឫស្សីកែវ ដែលបានប្រើកម្លាំងចុះទៅរុះរើសំណង់របស់លោក មាស សាវឿន ដែលបានសង់រំលោភលើដីដែលមានកម្មសិទ្ធិ ។
នេះជាការប្រឈមមុខដាក់គ្នាជាថ្មី ខណៈពេលដែលអាជ្ញាធរប្រើវិធានការរដ្ឋបាលប៉ុនប៉ងរុះរើសំណង់តែពុំបានសម្រេចឡើយ ។ ទោះបីជាបែបណា យុវជនម្នាក់ត្រូវបានចាប់ខ្លួនដោយអាជ្ញាធរចោទថា ជាអ្នកយកដបសាំងមកប្រឆាំងតវ៉ានិងរារាំង ។ហេតុការណ៍នេះបង្កឱ្យមានការភ្ញាក់ផ្អើលជាថ្មី កាលពីវេលាម៉ោង៣និង៣០នាទីរសៀល ថ្ងៃទី៣១ ខែកក្កដា នៅក្នុងភូមិទួលពពែ សង្កាត់ទួលសង្កែ២ ខណ្ឌឫស្សីកែវ ដែលជាដីតំបន់អភិវឌ្ឍន៍ឫស្សីកែវ ។ការប្រើវិធានការរដ្ឋបាលនេះដឹកនាំដោយលោក ជា ពិសី អភិបាលខណ្ឌឫស្សីកែវ និងមានការចូលសម្របសម្រួលដោយលោក ខាំ សុផារី ព្រះរាជអាជ្ញារងអមសាលាដំបូងរាជធានីភ្នំពេញ ។
តាមព័ត៌មានឱ្យដឹងថា អាជ្ញាធរបានប្រើកម្លាំងប្រមាណជាង១០០នាក់ បានការពារគ្រឿងចក្រ និងរថយន្តពន្លត់អគ្គិភ័យចុះទៅរុះរើសំណង់ដែលជាប់ចោទថាបានរំលោភយកដីដែលមានកម្មសិទ្ធិ តែត្រូវបានរារាំងដោយប្រជាពលរដ្ឋ ដែលប្រដាប់ដោយដំបង កាំបិត ដាវ ដបសាំង និងហ្គាស បានផ្តួលម៉ូតូគំរាមដុត ។ នៅក្នុងហេតុការណ៍នោះ សមត្ថកិច្ចបានឃាត់ខ្លួនវាយខ្នោះបុរសម្នាក់ដែលបានជិះម៉ូតូដឹកដបសាំងដើម្បីធ្វើការតវ៉ា ។
ការប្រើវិធានការរដ្ឋបាលនេះត្រូវបានអាជ្ញាធរឱ្យដឹងថា ធ្វើតាមបទបញ្ជារបស់សាលារាជធានីភ្នំពេញ ដើម្បីចុះទៅរុះរើរបង និងសំណង់រំលោភព្រមទាំងវាស់វែងដីទំនាស់នោះប្រគល់ទៅឱ្យលោកស្រី លឹម វណ្ណា ដែលជាម្ចាស់កម្មសិទ្ធិ ។
លោក ជា ពិសី អភិបាលខណ្ឌឫស្សីកែវបានឱ្យដឹងថា ការប្រើវិធានការរដ្ឋបាលនេះធ្វើតាមបទបញ្ជា របស់លោកអភិបាលរាជធានីភ្នំពេញ ដើម្បីរុះរើសំណង់ដែលបានសង់រំលោភយកដីដែលមានកម្មសិទ្ធិ ។លោកអភិបាលបានឱ្យដឹងទៀតថា ក្រុមអ្នកតវ៉ាសុទ្ធតែជាអ្នកស៊ីឈ្មួលការពារក្នុងការចាប់យកដីដែលមានកម្មសិទ្ធិ ។ ក្រុមនោះក៏បានប្រើគ្រឿងចក្រឈូសឆាយរំលោភយកដីដែលមានកម្មសិទ្ធិផងដែរ ។
លោកអភិបាលខណ្ឌឫស្សីកែវក៏បានអំពាវនាវឱ្យក្រុមអ្នកតវ៉ាបញ្ឈប់ការសាងសង់រំលោភតទៅទៀត ព្រមទាំងឱ្យដកគ្រឿងចក្រចេញ ។ នៅរសៀលនោះ ក៏មានការប្រឈមមុខដាក់គ្នាប្រមាណជិត២ម៉ោង ហើយអាជ្ញាធរក៏បានពន្យារពេលរុះរើចៀសវាងមានអ្នករងរបួស ។ ទន្ទឹមនោះ អាជ្ញាធរក៏បានធ្វើកិច្ចសន្យាឱ្យបញ្ឈប់សកម្មភាពការសង់រំលោភជាថ្មីម្តងទៀត ។
គួរបញ្ជាក់ថា ដីទំនាស់នោះមានទំហំប្រមាណជាង១ហិកតា ដែលមានទំនាស់រ៉ាំរ៉ៃជាយូរមកហើយរវាងអ្នកស្រី លឹម វណ្ណា និងលោក មាស សាវឿន ។បន្ទាប់ពីមានការសាងសងរំលោភ អាជ្ញាធរបានទៅណែនាំឱ្យផ្អាកនិងចុះវាយចោលជាបន្តបន្ទាប់ជាច្រើនលើកមកហើយ តែលោក មាស សាវឿន ដែលបច្ចុប្បន្នជាអនុរដ្ឋលេខាធិការក្រសួងយុត្តិធម៌ បានជាប់ចោទគៀរគរប្រជាពលរដ្ឋមកសាងសង់រំលោភយកដីនោះម្តងហើយម្តងទៀត រហូតសង់របងរឹងមាំនិងផ្ទះវិឡាផ្គើននិងអាជ្ញាធរទៀត ។ បន្ទាប់ពីមានការតវ៉ានិងប្រឈមមុខដាក់គ្នា អាជ្ញាធរក៏បានដកថយវិញ ចៀសវាងមានការប៉ះទង្គិចគ្នា ។
ចំណែកប្រជាពលរដ្ឋអះអាងថា ជាដីរបស់ខ្លួនដែលតាមពិតពួកគាត់មិនមានដីនោះទេ នេះបើតាមការឱ្យដឹងពីអាជ្ញាធរ ។ ចំពោះពលរដ្ឋដែលបាននាំគ្នាប្រឆាំងតវ៉ាយ៉ាងមុតស្រួចនោះ មិនអាចសុំការបំភ្លឺបាននោះទេព្រោះម្នាក់ៗសំដែងភាពកាច ៕
ចែករំលែកព័តមាននេះ