រាជធានីភ្នំពេញ ៖ នៅពេលសាកសួរទៅអ្នកជំនាញសេដ្ឋកិច្ចអំពីដំណោះស្រាយហិរញ្ញវត្ថុដ៏ត្រឹមត្រូវសម្រាប់ប្រជាពលរដ្ឋខ្មែរ ដើម្បីការពារខ្លួន និងក្រុមគ្រួសារពីការបាត់បង់នូវផ្ទះសម្បែង ឬដីធ្លី នៅពេលពើបប្រទះ ឬធ្លាក់ខ្លូនមានជំងឺធ្ងន់ធ្ងរណាមួយ ដូចជាជំងឺមហារីក ដាច់សរសៃឈាមខួរក្បាល ថ្លើម បេះដូង និងជំងឺសួតជាដើម។
លោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន Emerging Markets Consulting (EMC) មានប្រសាសន៍ថា ប្រជាពលរដ្ឋខ្មែរមួយភាគធំ គឺមិនបានរៀបចំផែនការហរិញ្ញវត្ថុឲ្យបានត្រឹមត្រូវសម្រាប់ការពារពេលមានបញ្ហាសុខភាពនោះទេ ហេតុដូច្នេះពួកគាត់មានភាពហានិភ័យខ្ពស់ក្នុងការជំពាក់បំណុលស្ថាប័នមីក្រូហិរញ្ញវត្ថុ ឬក៏ធ្លាក់ខ្លួនក្រតែម្តងពេលកើតមានជំងឺធ្ងន់ធ្ងរ ដែលទាមទារឲ្យមានថវិកាច្រើនដើម្បីព្យាបាល។
លោក ង៉ែត ជូ មានប្រសាសន៍បញ្ជាក់ថា ជាដំណោះស្រាយហរិញ្ញវត្ថុល្អសម្រាប់ប្រជាពលរដ្ឋខ្មែរ ដើម្បីយកមកប្រើប្រាស់នៅពេលគាត់ ឬសមាជិកគ្រួសារ មនុស្សជាទីស្រលាញ់ ឬអ្នកមានគុណប្រឈមនឹងជំងឺធ្ងន់ធ្ងរ ចៀសវាងវិបត្តិសេដ្ឋកិច្ចគ្រួសារ ឬក៏ត្រូវលក់ទ្រព្យសម្បត្តិជាដើមនោះ គឺការទទួលយកសេវាធានារ៉ាប់រងជីវិតសម្រាប់ការព្យាបាលជំងឺធ្ងន់ធ្ងរ ដែលជាដំណោះស្រាយមានសុវត្តិភាពបំផុត។
លោក ង៉ែត ជូ មានប្រសាសន៍បញ្ជាក់យ៉ាងដូច្នេះថា ៖ « អ្វីដែលល្អបំផុតគឺប្រជាពលរដ្ឋគួរតែទទួលបានសេវាធានារ៉ាប់រង ដើម្បីចំណាយទៅលើការព្យាបាលបែបនោះ (សម្រាប់ជំងឺធ្ងន់ធ្ងរ) គឺការព្យាបាលដែលមានតម្លៃខ្ពស់ ។ ពីព្រោះការលក់ទ្រព្យសម្បត្តិ ដូចជាផ្ទះសម្បែង ឬក៏ការខ្ចីបុលពីគ្រឹះស្ថានមីក្រូហិរញ្ញវត្ថុ មិនមែនជាដំណោះស្រាយមួយដែលល្អនោះទេ»។
លោកបន្តថា ៖ «ពីព្រោះការខ្ចីបុល ឬក៏លក់ទ្រព្យសម្បត្តិនេះគឺធ្វើឲ្យមានបញ្ហាប៉ះពាល់ជីវភាពជាខ្លាំងសម្រាប់សេដ្ឋកិច្ចគ្រួសារ ។ ប៉ុន្តែផ្ទុយទៅវិញ បើសិនណាគាត់ទទួលបានសេវាធានារ៉ាប់រងសម្រាប់ជំងឺធ្ងន់ធ្ងរ គឺថា ធ្វើឲ្យគាត់មានសុវត្តិភាពផ្នែកហិរញ្ញវត្ថុ ហើយក៏ផ្តល់នូវសន្តិសុខ ឬហៅថា សន្តិភាពផ្លូវចិត្ត សម្រាប់គ្រួសារទាំងមូលផងដែរ » ។
«ជារួមទាក់ទងជាមួយនឹងការប្រើប្រាស់សេវាធានារ៉ាប់រង ពាក់ព័ន្ធនឹងការចំណាយខ្ពស់ ដែលគេហៅថា បុព្វលាភហ្នឹង គឺខ្ញុំអាចប៉ាន់ស្មានមានប្រជាពលរដ្ឋច្រើនគួរសម តែភាគច្រើនជាអ្នកនៅទីប្រជុំជននិងទីក្រុង និយាយរួមគឺអ្នកមានចំណូលមធ្យមឡើង»។
លោកបានបន្តថា៖ «ជាពិសេសខ្ញុំអាចនិយាយបានថា គឺភាគច្រើនអ្នកដែលមានលទ្ធភាពទិញផ្ទះនៅបុរីឡើងអញ្ចឹង ហើយចំណូលអាចថា ៧០០ ឬ ៨០០ ដុល្លារអាមេរិក គឺមានលទ្ធភាពគួរប្រើប្រាស់សេវាធានារ៉ាប់រងសុខភាព»។
លោក ជា សង្ហា ថ្នាក់ដឹកនាំក្រុមហ៊ុនមួយនៅរាជធានីភ្នំពេញទទួលស្គាល់ថាធានារ៉ាប់រងសុខភាព គឺជារឿងសំខាន់ដែលអ្នកមានលទ្ធភាពគូរតែមាន ព្រោះតម្លៃធានារ៉ាប់រងសុខភាព គឺជាចំនួនតិចមែនទែន បើប្រៀបធៀបនឹងចំនួនលុយជាក់ស្តែងដែលយើងត្រូវយកចេញពីហោប៉ៅដើម្បីបង់ថ្លៃសេវាសុខភាពពេលមានជំងឺធ្ងន់ធ្ងរនោះ ។ ជាញឹកញាប់ណាស់ ដែលប្រជាពលរដ្ឋមួយចំនួនត្រូវបង្ខំចិត្តលក់នូវទ្រព្យសម្បតិ្តរបស់ពួកគេដូចជាផ្ទះ ឬទ្រព្យសម្បត្តិផ្សេងដើម្បីយកទៅចំនាយថ្លៃពេទ្យ។
លោកបានបន្តទៀតថា សម្រាប់រូបលោកផ្ទាល់ និងក្រុមគ្រួសារបស់លោកគឺសុទ្ធតែបានប្រើប្រាស់សេវាធានារ៉ាប់រងសុខភាព ព្រោះ៖ «វាពិតជាជួយរូបខ្ញុំបានច្រើន ដូចជាធ្វើឲ្យខ្ញុំមានសន្តិភាពផ្លូវចិត្ត ដោយខ្ញុំនឹងមិនមានការព្រួយបារម្ភថា តើខ្ញុំត្រូវរកដំណោះស្រាយហិរញ្ញវត្ថុតាមច្រកណា ដើម្បីរកលុយឲ្យបានគ្រប់គ្រាន់សម្រាប់បង់ថ្លៃមន្ទីរពេទ្យ ប្រសិនជាកើតមានជំងឺធ្ងន់ធ្ងរនោះ» ។
លោកបានបន្តទៀតថា លោកឃើញថាការប្រើប្រាស់សេវាធានារ៉ាប់រងសុខភាពសម្រាប់ជំងឺធ្ងន់ធ្ងរ គឺជាសំខាន់បំផុត ជាពិសេសធានារ៉ាប់រងក៏បានជួយរូបលោកដោយមិនមានភាពស្ទាក់ស្ទើរក្នុងការទៅពិនិត្យសុខភាព និងពិគ្រោះយោបល់ជាមួយនឹងគ្រូពេទ្យជំនាញ ដូច្នេះវាជួយដល់គ្រូពេទ្យអាចដឹងអំពីបញ្ហាសុខភាពណាមួយនៅដំណាក់បឋមដែលងាយស្រួលក្នុងការព្យាបាល ។
ជាបទពិសោធន៍នៃការប្រើប្រាស់ធានារ៉ាប់រងសុខភាពជាមួយនឹងក្រុមហ៊ុនធានារ៉ាប់រងជីវិតក្នុងស្រុកមួយ លោក ជា សង្ហា វ័យ ៣៨ ឆ្នាំបានអះអាងថា សូមមហាជនកុំមានការយល់ច្រឡំថាត្រូវបង់ថ្លៃសេវាធានារ៉ាប់រងសុខភាពថ្លៃអី ព្រោះអ្វីដែលលោកបានចំណាយ គឺត្រឹមប្រមាណពី ៧០០ ដុល្លារ ទៅត្រឹម ១០០០ ដុល្លារក្នុង១ឆ្នាំទៅតាមកញ្ចប់សេវាដែលយើងជ្រើសរើស តែបុព្វលាភដែលទទួលបានមកវិញពីការធានានោះគឺជាមធម្យពី ១ ម៉ឺនដុល្លារឡើងទៅ ដែលជាចំនួនល្អមួយ ជាជាងការបាត់បង់មនុស្សជាទីស្រលាញ់ដោយសារតែគ្មានលទ្ធភាពបង់ថ្លៃការព្យាបាល ឬក៏ត្រូវលក់ទ្រព្យសម្បត្តិផ្សេងៗនោះ ។
យោងតាមព័ត៌មានដែលផ្សព្វផ្សាយដោយក្រុមហ៊ុនធានារ៉ាប់រងជីវិត អេ អាយ អេ ខេមបូឌា ដែលជាក្រុមហ៊ុនធានារ៉ាប់រងជីវិតលើការព្យាបាលជំងឺធ្ងន់ធ្ងរដំបូងបង្អស់នៅកម្ពុជា បានផ្សព្វផ្សាយឲ្យដឹងថា ក្រុមហ៊ុនមានផ្តល់នូវដំណោះស្រាយធានារ៉ាប់រងជីវិត ហៅថា « AIA សម្រាប់ជីវិត» ដែលរ៉ាប់រងការចំណាយវេជ្ជសាស្ត្រទាំងនៅមន្ទីរពេទ្យក្នុងស្រុក និងនៅក្រៅប្រទេស។ លោកអ្នកក៏អាចទាក់ទងទៅទីប្រឹក្សាផែនការជីវិត AIA សម្រាប់ការប្រឹក្សាដោយឥតគិតថ្លៃពីដំណោះស្រាយធានារ៉ាប់រងមួយនេះ ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ