រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាបានហៅការអំពាវនាវថា មានជនជាតិវៀតណាមនាំគ្នាមកបោះឆ្នោតនៅក្នុងប្រទេសកម្ពុជារបស់ក្រុមអតីតបក្សប្រឆាំងជាល្បិចកលទាល់ច្រក និងភូកកុហកនៅលើកគោក ។
ការលើកឡើងរបស់អ្នកនាំពាក្យគណបក្សប្រជាជនកម្ពុជាលោក សុខ ឥសាន នេះបន្ទាប់ពីអ្នកលេងបណ្តាញសង្គមហ្វេសប៊ុកបានស៊ែរផេកហ្វេសប៊ុករបស់សមាគមវៀតណាមនៅកម្ពុជាបានសរសេរខ្លឹមសារយ៉ាងច្រើនដែលលើកឡើងថា បងប្អូនវៀតណាមគ្រប់រូបនៅកម្ពុជាអាចចូលសញ្ជាតិខ្មែរបានគ្រប់ពេលវេលា ។ យ៉ាងណាក្តីលោកសុខ ឥសានបានឲ្យដឹងនៅថ្ងៃទី១៨ កក្កដា ឆ្នាំ២០១៨ ដោយបានហៅការលើកឡើងនោះជាល្បិចកលកាន់តែឆ្កួតលីលារបស់មជ្ឈដ្ឋានប្រឆាំង ។
លោកបញ្ជាក់ថា«នេះគឺ ល្បិចកលប្រកបដោយការត្រដរខ្យល់មុននឹងស្លាប់ ។ ជាការញុះញង់ និ ងរើសអើងជាតិសាសន៌ដែលពួកនេះតែងតែអនុវត្តតាំងពីដើមរៀងមក ។ ជាការមួលបង្កាច់សភាពការណ៍ ដើម្បីដុតកំហឹងជាតិសាសន៍ ។ ជាក្បួនភូតច្រើនចាញ់អាត្មា ។ ជាល្បិចកលទាល់ច្រក និងនៅលើក» ។ ជាមួយគ្នានោះដែរលោកសុខ ឥសាន អះអាងថា ប្រជាជនកម្ពុជា គ្រាន់តែឃើញល្បិចកលនេះស្គាល់ដល់មុខ និងឈ្មោះក្រុមជនអគតិទាំងនោះយ៉ាងច្បាស់ គឺគ្មាននរណាក្រៅពីពួកឧទ្ទាមប្រឆាំងឡើយ ។
ចំណែក លោក អ៊ុក គឹមហ៊ាន មន្ត្រីជាន់ខ្ពស់គណបក្សប្រជាជនកម្ពុជាដែរក៏បានលើកឡើងតាមប្រព័ន្ធតេឡេក្រាមយ៉ាងដូច្នេះថា«ការប្រឌិតព័ត៌មានថា សមាគមវៀតណាមអំពាវនាវឲ្យប្រជាជនវៀតណាមនៅកម្ពុជាទៅបោះឆ្នោតនោះ គឺវាមិនអាចទៅរួចទេ ព្រោះថា ដើម្បីបោះឆ្នោតបានលុះត្រាតែគាត់មានឈ្មោះនៅក្នុងបញ្ជីបោះឆ្នោតឆ្នាំ២០១៧ និងមានអត្តសញ្ញាណប័ណ្ណសញ្ជាតិខ្មែរ ។ នេះជាល្បិចបោកប្រាស់របស់ពួកក្រុមប្រឆាំងខុសច្បាប់ ដើម្បីបំពុលបរិយាកាសនយោបាយនៅពេលជិតបោះឆ្នោត» ។ ទាក់ទិននឹងការអំពាវនាវនេះដែរ ប្រធានសមាគមខ្មែរ-វៀតណាមនៅកម្ពុជាលោក ស៊ឹម ជី ត្រូវបានសារព័ត៌មានក្នុងស្រុកមួយស្រង់សម្តីដោយបានប្រកាសទាត់ចោលទាំងស្រុងនូវការប្រឌិតរបស់បណ្តាញព័ត៌មានក្រុមប្រឆាំងដែលបានផ្សព្វផ្សាយថា សមាគមវៀតណាមបានអំពាវនាវឱ្យប្រជាពលរដ្ឋវៀតណាមទៅចូលរួមបោះឆ្នោតនៅកម្ពុជា ។ប្រធានសមាគមខ្មែរ-វៀតណាមបានចាត់ទុកថា ការប្រឌិតព័ត៌មានបែបនេះគឺជាកា រញុះញង់ ដើម្បីបង្ខូចកេរ្តិ៍ឈ្មោះសមាគមរបស់លោកនៅក្នុងប្រទេសកម្ពុជា ហើយករណីនេះខាងសមាគមរបស់លោកបានធ្វើពាក្យបណ្តឹងទៅក្រសួងមហាផ្ទៃជាច្រើនដងរួចហើយដែរ ។
លោក ស៊ឹម ជី សមាគមវៀតណាមនៅកម្ពុជានឹងធ្វើសេចក្តីថ្លែងការណ៍មួយ ដើម្បីទាត់ចោលនូវការប្រឌិតព័ត៌មាននេះ និងដាក់ពាក្យបណ្តឹងប្តឹងបន្តទៀតទៅក្រសួងមហាផ្ទៃ ដើម្បីជម្រាបឱ្យក្រសួងមានសមត្ថកិច្ចបានយល់អំពីបញ្ហានេះ ហើយសុំឱ្យមានវិធានការ ។ យ៉ាងណាក៏ដោយលោកមិនទាន់មានតម្រុយណាអំពីក្រុមដែលប្រឌិតព័ត៌មាននេះ នៅឡើយទេ ខណៈដែលលោកក៏បានប្រាប់ទៅសារព័ត៌មានមួយចំនួនរួចហើយ នាពេលកន្លងមកដោយបានបដិសេធនូវការផ្សព្វផ្សាយញុះញង់បែបនេះ ។
ជម្រាបថា ការប្រកាសច្រានចោលរបស់សមាគមវៀតណាមនៅកម្ពុជា ក្រោយបណ្តាញសង្គមមានឈ្មោះថា «Hội Người Việt Nam Tại Campuchia សមាគមវៀតណាមនៅកម្ពុជា»បានសរសេរខ្លឹមសារយ៉ាងដូច្នេះថា ឥឡូវនេះបងប្អូនវៀតណាមគ្រប់រូបនៅកម្ពុជាអាចចូលសញ្ជាតិខ្មែរបានគ្រប់ពេលវេលា ។ សមាគមវៀតណាមនៅកម្ពុជាជម្រុញ និងនៅរង់ចាំជួយបងប្អូនទាំងអស់គ្នា ដើម្បីបានចូលសញ្ជាតិខ្មែរបើបងប្អូនមានបញ្ហាមិនចេះភាសាខ្មែរ ឬមិនដឹងច្បាប់ចូលសញ្ជាតិថ្មី របស់កម្ពុជាដែលបានឡាយព្រះហត្ថលេខាដោយស្តេច នរោត្តម សីហមុនី ។
សម្រាប់បងប្អូនដែលបានចូលសញ្ជាតិរួចហើយ សមាគមវៀតណាមនៅកម្ពុជា សូម អំពាវនាវ និងលើកទឹកចិត្ដឲ្យបងប្អូនប្រុសស្រីគ្រប់រូបចូលរួមគ្រប់សកម្មភាពក្នុងសង្គមជាតិរបស់យើងក្នុងនាមយើងជាអ្នកទទួលខុសត្រូវម្នាក់ចំពោះកម្ពុជាដែលជាប្រទេសរបស់យើង ដើម្បីអនាគតរបស់យើងទាំងអស់គ្នាដោយសេចក្តីថ្លៃថ្នូរ និងដោយស្របច្បាប់ ជាពិសេសចូលរួមចំពោះបច្ចុប្បន្នភាពនៃកិច្ចការងារបោះឆ្នោតជាតិដែលរៀបចំដោយ គណៈកម្មការជាតិរៀបចំការបោះឆ្នោត ដោយត្រឹមត្រូវសេរី និងយុត្តិធម៌ ៕
ចែករំលែកព័តមាននេះ