រាជធានីភ្នំពេញ ៖ ដើម្បីកាត់បន្ថយការខាតបង់របស់កសិករនៅតាមខេត្តសក្ដានុពលលើដំណាំស្រូវនៅព្រះរាជាណាចក្រកម្ពុជា ក្នុងករណីជួបគ្រោះមហន្តរាយទឹកជំនន់ ឬគ្រោះរាំងស្ងួត មូលនិធិកិច្ចសហប្រតិបត្តិការអាល្លឺម៉ង់ (GIZ) បានសហការជាមួយគ្រឹះស្ថានធានារ៉ាប់រងក្នុងស្រុក ដើម្បីធានាហានិភ័យដល់ប្រជាកសិករ ។
តាមសេចក្តីប្រកាសរបស់ GIZ បានឲ្យដឹងថា មូលនិធិនេះនឹងបណ្ដុះបណ្ដាល និងផ្សព្វផ្សាយដល់កសិករជាគ្រូបង្គោលជាជំហានដំបូង ដើម្បីឲ្យពួកគេផ្សព្វផ្សាយ និងបណ្ដុះបណ្ដាលបន្តដល់កសិករដទៃទៀតក្នុងមូលដ្ឋាន និងខេត្ត ដែលមូលនិធិកំពុងធ្វើប្រតិបត្តិការ ។
បើតាមលោកបណ្ឌិត Gunter W. Riethmacher នាយកគ្រប់គ្រងមូលនិធិ GIZ ប្រចាំប្រទេសកម្ពុជា បានឲ្យដឹងថា ក្នុងជំហានដំបូងរបស់ខ្លួនលើកិច្ចសហការលើកស្ទួយវិស័យកសិកម្មកម្ពុជា, GIZនឹងណែនាំទៅកសិករបង្គោលដែលមានចំណេះដឹងខ្ពស់ជាងគេមកទទួលយកនូវអ្វីដែល GIZ នឹងផ្ដល់ជូនកសិករ ។ លោកថា ៖« ដំបូង យើងធ្វើការជាមួយកសិករតែប៉ុន្មានខេត្តប៉ុណ្ណោះ ដើម្បីឲ្យពួកគេបានទទួលសេវាធានារ៉ាប់រងលើដំណាំកសិកម្ម ដែលជាខេត្តសក្ដានុពលលើវិស័យកសិកម្ម ជាពិសេស ដំណាំស្រូវ និងជាការសាកល្បងលើកិច្ចសហការនេះផងដែរ » ។
លោក នី លីហួង អ្នកគ្រប់គ្រងទូទៅនៃក្រុមហ៊ុនធានារ៉ាប់រងហ្វតតេ ដែលបានសហការជាមួយGIZ បានឲ្យដឹងថា ការផ្ដល់សេវាកម្មធានារ៉ាប់រងលើដំណាំស្រូវ និងដំណាំកសិកម្មដទៃទៀត បានធ្វើប្រមាណ៤-៥ឆ្នាំមកហើយ តាំងពីឆ្នាំ២០១៤មកម្ល៉េះ ក៏ប៉ុន្តែសម្រាប់ឆ្នាំនេះ វាជាមធ្យោបាយថ្មី ហើយក៏មិនទាន់ដឹងថា វានឹងទៅជាយ៉ាងណាដែរ ដោយសារការធានារ៉ាប់រងលើដំណាំកសិកម្មមានភាពស្មុគស្មាញបន្តិច ជាងការធានារ៉ាប់រងផ្សេងៗ ។
លោកបន្តថា ចាប់តាំងពីបានធ្វើសហការជាមួយGIZរហូតមកដល់ពេលនេះ កសិករដែលបានទិញសេវាធានារ៉ាប់រងពីហ្វតតេ មានចំនួនប្រមាណ១០០នាក់ ទៅលើការធានាដំណាំស្រូវនៅក្នុងរដូវវស្សា ។ លោកថា ៖« ចំនួននេះមានតិចតួចនៅឡើយ ព្រោះវាជាកញ្ចប់សេវាថ្មីរបស់ខ្លួន ហើយប្រជាកសិករ ក៏មិនទាន់បានយល់ដឹងជ្រៅជ្រះប៉ុន្មានទេ ។ ដូចនេះ ទាមទារឲ្យមានការបណ្ដុះបណ្ដាល និងពន្យល់បន្ថែមពីការធានារ៉ាប់រងទៅលើដំណាំរបស់ពលរដ្ឋ » ។
លោកបានពន្យល់ថា ការទិញកញ្ចប់សេវាធានារ៉ាប់រងលើដំណាំ គឺត្រូវបានគិតជាហិកតា។ ជាក់ស្ដែង ក្នុង១ហិកតា យើងត្រូវសងត្រឡប់ទៅវិញនូវអ្វីដែលគាត់បានខាតបង់។ ឧទាហរណ៍ ក្នុង១ហិកតា គាត់ចំណាយ៣៤០ដុល្លារអាមេរិកនោះ សំណងដែលក្រុមហ៊ុននឹងត្រូវសងទៅគាត់វិញ គឺចំនួន៣៤០ដុល្លារអាមេរិកដូចគ្នា តែការទិញកញ្ចប់របស់គាត់ គឺត្រឹមតែ២៥ដុល្លារទៅ៣០ដុល្លារអាមេរិកប៉ុណ្ណោះក្នុង១ហិកតា ។
លោកបន្ថែមថា ការធានារ៉ាប់រងលើដំណាំនេះ គឺធានាតែទៅលើគ្រោះទឹកជំនន់ និងរាំងស្ងួតប៉ុណ្ណោះ ហើយសម្រាប់ឆ្នាំនេះដែរ ក្រុមហ៊ុនហ្វតតេ ក៏បានត្រៀមទុនសម្រាប់ផ្ដល់សំណងដល់កសិករដែរ ព្រោះការព្យាកររបស់ក្រសួងធនធានទឹក និងឧតុនិយមថា នៅឆ្នាំនេះ កម្ពុជានឹងរងគ្រោះទឹកជំនន់ធ្ងន់ ដូចនេះហើយដំណាំរបស់កសិករមួយចំនួនអាចនឹងទទួលរងការខូចខាត ហើយការសងត្រឡប់ទៅកសិករនឹងច្រើនជាងឆ្នាំមុនៗ ៕
ចែករំលែកព័តមាននេះ