ខេត្តបន្ទាយមានជ័យ ៖ ក្នុងរយៈពេល៥ខែដំបូងឆ្នាំ២០១៨នេះ ភ្ញៀវទេសចរដែលបានចូលមកកម្ពុជា តាមច្រកទ្វារអន្តរជាតិប៉ោយប៉ែត មានចំនួន២១៨.៤៣៩នាក់ ថយចុះ៣០,០៧% បើធៀបនឹងគ្រាដូចគ្នាកាលពីឆ្នាំ២០១៧ ។ នេះបើយោងតាមរបាយការណ៍របស់មន្ទីរទេសចរណ៍ខេត្ត…
ខេត្តបន្ទាយមានជ័យ ៖ ក្នុងរយៈពេល៥ខែដំបូងឆ្នាំ២០១៨នេះ ភ្ញៀវទេសចរដែលបានចូលមកកម្ពុជា តាមច្រកទ្វារអន្តរជាតិប៉ោយប៉ែត មានចំនួន២១៨.៤៣៩នាក់ ថយចុះ៣០,០៧% បើធៀបនឹងគ្រាដូចគ្នាកាលពីឆ្នាំ២០១៧ ។ នេះបើយោងតាមរបាយការណ៍របស់មន្ទីរទេសចរណ៍ខេត្ត ។
លោក ឈឿន សេរីវុធ ប្រធានមន្ទីរទេសចរណ៍ខេត្តបន្ទាយមានជ័យ បានឲ្យដឹងថា សម្រាប់រយៈពេល៥ខែឆ្នាំ២០១៨នេះ ភ្ញៀវទេសចរអន្តរជាតិចូលមកកម្ពុជា តាមច្រកទ្វារអន្តរជាតិប៉ោយប៉ែត គឺមានចំនួន២១៨.៤៣៩នាក់ បើធៀបនឹងរយៈពេល៥ខែឆ្នាំ២០១៧ មានភ្ញៀវទេសចរចំនួន២២៥.៣៥៣នាក់ ថយចុះ៣០,០៧% ។ លោកបានបន្ដថា ៖« ចំណែកភ្ញៀវទេសចរបរទេសដែលត្រឡប់ទៅវិញក្នុងរយៈ៥ខែឆ្នាំ២០១៨នេះ មានចំនួន២២៥.៥៦១នាក់ ថយចុះ០៣,២៧% បើធៀបនឹងរយៈពេល៥ខែឆ្នាំ២០១៧ មានចំនួន២៣៣.១៩៨នាក់។ ចំណែកភ្ញៀវចូលមកលេងកាស៊ីណូនៅក្រុងប៉ោយប៉ែត តាមច្រកទ្វារអន្តរជាតិប៉ោយប៉ែត ក្នុងរយៈពេល៥ខែឆ្នាំ២០១៨នេះ មានចំនួន១៨៣.៩៤៦នាក់ កើនឡើង០១,៦១% បើធៀបនឹងរយៈពេល៥ខែឆ្នាំ២០១៧ មានចំនួនតែ១៨១.០៣៨នាក់ » ។
លោក ឈឿន សេរីវុធ បានបញ្ជាក់ថា ៖« ភ្ញៀវទេសចរបរទេសដែលចូលមកកម្សាន្តតាមរមណីយដ្ឋាននានា និងស្នាក់នៅក្នុងខេត្តបន្ទាយមានជ័យ រយៈពេល៥ខែឆ្នាំ២០១៨នេះ មានចំនួន៤.២៧៩នាក់ កើនឡើង២៣,៥៣% បើធៀបនឹងរយៈពេល៥ខែឆ្នាំ២០១៧ គឺមានចំនួនតែ៣.៤៦៤នាក់ ។ រីឯចំនួនភ្ញៀវទេសចរក្នុងស្រុកដើរកម្សាន្តតាមរមណីយដ្ឋាននានា និងស្នាក់នៅក្នុងខេត្ត រយៈពេល៥ខែឆ្នាំ២០១៨នេះ មានចំនួន៤៥៥.៦១៥នាក់ កើនឡើង២,៤៨% បើធៀបនឹងរយៈពេល៥ខែឆ្នាំ២០១៧ មានចំនួនតែ៤៤៤.៥៧៧នាក់ប៉ុណ្ណោះ » ៕
ចែករំលែកព័តមាននេះ