ខេត្តព្រៃវែង ៖ បុរសម្នាក់បានរងរបួសយ៉ាងធ្ងន់ធ្ងរហើយត្រូវបានក្រុមគ្រួសារនាំយកទៅសង្គ្រោះនៅមន្ទីរពេទ្យភ្លាមៗដោយសារតែត្រូវបុរស២នាក់ដែលជាគូរជម្លោះព្រួតគ្នាវាយ និងចាក់ជាច្រើនកាំបិត ។ ហេតុការណ៍នេះបានកើតឡើង កាលពីវេលាម៉ោង១០និង៥០នាទីយប់ថ្ងៃទី២៣ មិថុនា នៅចំណុចលើផ្លូវលំ ក្នុងភូមិសូរ ឃុំអង្គរសរ ស្រុកមេសាង ខេត្តព្រៃវែង ។
ជនរងគ្រោះមានឈ្មោះ ម៉ី សាវុន ភេទប្រុស អាយុ៤៣ឆ្នាំ មានទីលំនៅក្នុងភូមិកើតហេតុ ត្រូវជនបង្កចាក់នឹងកាំបិតចិតបន្លែ បណ្តាលឲ្យរបួសស្មាស្តាំ៣កន្លែង និងរបួសខ្នងជាច្រើនកន្លែង ។ ចំណែកជនបង្កទាំង២នាក់ទី១- ឈ្មោះ ងួន សាបឿន ភេទប្រុស អាយុ៥១ឆ្នាំ ទី២- ឈ្មោះសេក ប៊ុនថា ភេទប្រុស អាយុ៣១ឆ្នាំ អ្នកទាំង២មានទីលំនៅក្នុងភូមិត្រពាំងពោន ឃុំចិន្ត្រៃយ៍ស្រុករមាសហែក ខេត្តស្វាយរៀង ។
ចំពោះដំណើរដើមទងដែលបង្កើតឲ្យមានហេតុការណ៍អំពើហិង្សានេះត្រូវបានសមត្ថកិច្ចប្រាប់ឲ្យដឹងថា មុនពេលកើតហេតុជនរងគ្រោះកំពុងដើរម្នាក់ឯង នៅតាមចិញ្ចើមថ្នល់កន្លែងកើតហេតុ ហើយមានគោយន្តមួយគ្រឿងបានបើកមកដល់ទន្ទឹម និងជនរងគ្រោះគាប់ជួនពេលនោះម៉ូតូជនបង្កទាំង២នាក់ក៏បើកមកដល់ដែរក្នុងទិសដៅបញ្ច្រាសគ្នា ហើយម៉ូតូជនបង្កព្រមទាំងគោយន្តនោះបានបើកភ្លើងហ្វាកុងដាក់គ្នា ដោយម្ខាងៗមិនព្រមទម្លាក់កូដទេ លុះដល់គោយន្តទៅផុត ស្រាប់តែជនបង្កឈប់ម៉ូតូ ហើយឈ្មោះ ងួន សាបឿន ជាឪពុកបានស្ទុះមកចាប់ជនរងគ្រោះ ហើយឈ្មោះ សេក ប៊ុនថា ជាកូន ជាអ្នកវាយ និងចាក់មកលើជនរងគ្រោះភ្លាមៗនោះក៏មានអ្នកស្រុកមកដល់បានឃើញ ហើយរាយការណ៍ប្រាប់សមត្ថកិច្ចទើបកម្លាំងសមត្ថកិច្ចចុះអន្តរាគមន៍ និងចាប់ជនបង្កបានទាំងឪពុក និងកូនតែម្តង ។
លោកវរសេនីយ៍ទោ នៅ ហាច អធិការនគរបាលស្រុកមេសាងបានបញ្ជាក់ប្រាប់ថា ក្រោយត្រូវឃាត់ខ្លួនជនបង្កទាំង២បានឆ្លើយសារភាពថា មូលហេតុដែលពួកគេព្រួតគ្នាវាយ និងចាក់ លើជនរងគ្រោះ គឺដោយសារតែខឹង និងគោយន្តដែលបើកបញ្ច្រាសគ្នានោះបើកភ្លើងហ្វាខ្លាំងមិនព្រមទម្លាក់កូដធ្វើឲ្យចាំងភ្នែករបស់គេមើលផ្លូវមិនឃើញ ហើយពួកគេស្មានថា ជនរងគ្រោះជាបក្សពួកខាងគោយន្តព្រោះឃើញដើរជិតគោយន្តទើបនាំគ្នាព្រួតវាយ និងចាក់តែម្តងទៅ ។ ក្រោយកើតហេតុដោយរបួសធ្ងន់ធ្ងរពេកជនរងគ្រោះត្រូវបានក្រុមគ្រួសារនាំយកទៅសង្គ្រោះនៅក្នុងមន្ទីរពេទ្យខេត្តស្វាយរៀង ចំណែកឯជនបង្កទាំង២នាក់ឪពុកកូនត្រូវបាននាំខ្លួនមកកាន់អធិការដ្ឋាននគរបាលស្រុកកសាងសំណុំរឿងចាត់ការទៅតាមនីតិវិធី ៕
ចែករំលែកព័តមាននេះ