ខេត្តកំពត ៖ ប្រជាពលរដ្ឋរាប់សិបនាក់ បានធ្វើការរារាំងមន្ត្រីមកពីមន្ទីរវប្បធម៌ និងវិចិត្រសិល្បៈខេត្ត កាលពីព្រឹកថ្ងៃទី២២ មិថុនា ខណៈមន្ត្រីទាំងនោះប៉ុនប៉ងអារដើមឈើមួយដើមដែលមានអាយុកាលរាប់រយឆ្នាំដុះចំកណ្ដាលកូនប្រាសាទក្នុងវត្តប្រាសាទ ឃុំតានី ក្នុងស្រុកអង្គរជ័យ…
ខេត្តកំពត ៖ ប្រជាពលរដ្ឋរាប់សិបនាក់ បានធ្វើការរារាំងមន្ត្រីមកពីមន្ទីរវប្បធម៌ និងវិចិត្រសិល្បៈខេត្ត កាលពីព្រឹកថ្ងៃទី២២ មិថុនា ខណៈមន្ត្រីទាំងនោះប៉ុនប៉ងអារដើមឈើមួយដើមដែលមានអាយុកាលរាប់រយឆ្នាំដុះចំកណ្ដាលកូនប្រាសាទក្នុងវត្តប្រាសាទ ឃុំតានី ក្នុងស្រុកអង្គរជ័យ ។ ដោយសារតែមានប្រតិកម្មរារាំងដល់ការប៉ុនប៉ងអារដើមឈើដុះក្នុងប្រាសាទនោះក្រុមមន្ត្រីក៏បានផ្អាក ខណៈពេលពលរដ្ឋនៅក្នុងស្រុកអង្គរជ័យ បានលើកគ្នាមកកាន់តែច្រើនធ្វើឱ្យអ្នកដែលប្រុងនឹងអារដើមឈើនោះ បានចាកចេញពីវត្តទៅបាត់យ៉ាងស្ងៀមស្ងាត់ ។ ពលរដ្ឋម្នាក់ឈ្មោះ ទេស សំបូរ ភេទប្រុស អាយុ៧៨ឆ្នាំ នៅភូមិប្រាសាទ ឃុំតានី បានប្រាប់ឱ្យដឹងថា ដើមឈើដុះក្នុងប្រាសាទនេះគេមិនដឹងថា មានឈ្មោះឈើអ្វីទេ គឺពេលគាត់កើតមកធំដឹងក្តីឃើញដើមឈើនេះដុះនៅក្នុងប្រាសាទនោះស្រេចទៅហើយដែលពេលនេះគាត់មានអាយុជិត៨០ឆ្នាំទៅហើយ ។លោកតា ទេស សំបូរ បាននិយាយប្រាប់បន្តថា ពលរដ្ឋរារាំងដាច់ខាត ហើយមិនឱ្យកាប់អារ ឬកាប់ដើមឈើនោះឡើយ ។
ព្រះតេជគុណ ស្រី សុវណ្ណ អនុគណស្រុកអង្គរជ័យមានថេរដីកាថា ខាងមន្ទីរវប្បធម៌ និងខាងក្រសួងបានមកកាប់ដើមឈើដែលដុះក្នុងប្រាសាទនោះ ដោយបានអះអាងថាបើទុកដើមឈើក្នុងប្រាសាទនេះ តទៅទៀតអាចរលំបាក់ខូចប្រាសាទនៅថ្ងៃណាមួយ តែមិនអាចកាត់ចេញបានទេ ដោយសារអ្នកស្រុកលើកគ្នាពពាក់ពពូនមកតវ៉ាមកហាមឃាត់ ។ លោក គង់ ផល្លា ប្រធានមន្ទីរវប្បធម៌ខេត្តបានប្រាប់ឱ្យដឹងថា ប្រាសាទដែលមានដើមឈើដុះក្នុងនោះ គឺសាងសង់ក្នុងសតវត្សទី១០ និងដើមឈើនោះឈ្មោះដើមអាចម៍ដែក ។ លោក គង់ ផល្លា និយាយថា លោកចុះមកអារដើមឈើនេះ ក៏មានមន្ត្រីមកពីក្រសួង ព្រោះបានសិក្សារួចរាល់អស់ហើយឃើញថា ដើមឈើនោះពុកអាចនិងបាក់បំផ្លាញប្រាសាទ ដែលបច្ចុប្បន្នប្រាសាទនេះរងការខូចខាតស្ទើរតែអស់ទៅហើយនោះ ។ លោក គង់ ផល្លា និយាយថាប្រជាពលរដ្ឋមានគម្រោងដុតរថយន្តរបស់មន្ត្រីជំនាញបើហ៊ានកាប់ ទើបលោកបង្ខំចិត្តដកថយសិន ។ 
តាមពិតទៅភាគីមន្ត្រីជំនាញដែលត្រូវពលរដ្ឋលើកគ្នារារាំងក៏ត្រូវដែរ គឺសុទ្ធតែអ្នកចង់ថែរក្សាប្រាសាទនិងដើមឈើ ។ អ្វីដែលធ្វើឱ្យប្រជាពលរដ្ឋលើកគ្នាមួយភូមិមករារាំងនោះបានកើតឡើង ខណៈក្រុមមន្ត្រីស្ងាត់ៗលើកគ្នាមកអារកាត់ដើមឈើបែបនេះ ទើបមានការរារាំងដោយកំហឹងពីសំណាក់ប្រជាពលរដ្ឋ ។ ឆ្លងកាត់ឧប្បត្តិហេតុនេះ មន្ត្រីនានាគប្បីមកពន្យល់ដល់ពលរដ្ឋជាមុនឱ្យយល់ពីគម្រោងការរបស់ខ្លួនសិន តើត្រូវដោះស្រាយដោយវិធីណាព្រោះអ្នកភូមិក៏ជាម្ចាស់នៅទីនោះដែរ ៕
ចែករំលែកព័តមាននេះ