ខេត្តព្រៃវែង ៖ កម្លាំងសមត្ថកិច្ច អធិការដ្ឋាននគរបាលស្រុកព្រះស្តេច បានស្ទាក់ចាប់ខ្លួនជនសង្ស័យម្នាក់ និងដកហូតបានវត្ថុតាងម៉ូតូមួយគ្រឿងដែលជនសង្ស័យលួចបានពីផ្ទះប្រជាពលរដ្ឋ ហើយជិះរត់គេចខ្លួន តែរត់មិនរួច។ ការចាប់ខ្លួននេះប្រព្រឹត្តិនៅវេលាម៉ោង១០និង៣០នាទីយប់ ថ្ងៃទី២០ មិថុនា នៅចំណុចភ្លឺប្រឡាយ ស្ថិតក្នុងភូមិពានី ឃុំល្វា ស្រុកព្រះស្ដេច ។
ជនសង្ស័យដែលស្ទាក់ចាប់ខ្លួនឈ្មោះ អ៊ុល ហ៊ាង ភេទប្រុស អាយុ36ឆ្នាំ មានទីលំនៅក្នុងភូមិធ្នង់ ឃុំសេនារាជឧត្តម ស្រុកព្រះស្តេច ខេត្តព្រៃវែង ត្រូវសមត្ថកិច្ចចាប់ឃាត់ខ្លួនបានក្នុងពេលដែលជនសង្ស័យកំពុងជិះម៉ូតូដែលលួចបានរត់គេចខ្លួន។ប្រភពពីសមត្ថកិច្ចស្រុកឱ្យដឹងថា នៅម៉ោងប្រមាណជា១០យប់ថ្ងៃទី២០ មានពលរដ្ឋម្នាក់ទូរសព្ទ័ប្តឹងសមត្ថកិច្ចថា មានចោរចូលលួចយកម៉ូតូរបស់ខ្លួនម៉ាក WAVE C100 ពណ៌ខ្មៅ ពាក់ស្លាកលេខ ព្រៃវែង 1I8347 ចេញពីក្រោមផ្ទះទៅបាត់ ។ រយៈពេលប្រមាណ១៥នាទីក្រោយមកលោកអធិការស្រុកបញ្ជាឱ្យកម្លាំងគ្រប់ប៉ុស្តិ៍ចេញស្ទាក់គ្រប់គោលដៅ រហូតដល់ម៉ោង១០និង៣០នាទីយប់ស្រាប់តែប្រទះឃើញជនសង្ស័យកំពុងជិះម៉ូតូដែលម្ចាស់ប្តឹងនោះ នៅចំណុចភ្លឺប្រឡាយក្នុងភូមិពានី ទើប ធ្វើការឃាត់ចាប់ខ្លួនជនសង្ស័យ រួមជាមួយវត្ថុតាងបានតែម្តង។ក្រោយពីត្រូវចាប់ឃាត់ខ្លួនជនសង្ស័យបានឆ្លើយសារភាពថា រូបគេពិតជាបានធ្វើសកម្មភាពចូលលួចម៉ូតូពីក្រោមផ្ទះជនរងគ្រោះពិតមែន ទើបសមត្ថកិច្ចកសាងសំណុំរឿងបញ្ជូនជនសង្ស័យមកកាន់ស្នងការដ្ឋាននគរបាលខេត្តចាត់ការបន្តទៅតាមនីតិវិធីនៅថ្ងៃបន្ទាប់៕
ចែករំលែកព័តមាននេះ