តោះមកស្ដាប់កីឡាករល្បីឈ្មោះនិយាយពី World Cup តិចមើល៍
- ភ្នំពេញ
រាជធានីភ្នំពេញ ៖ មកទល់ពេលនេះ ការប្រកួតដ៏ស្វិតស្វាញរវាងក្រុមបាល់ទាត់ជម្រើសជាតិទាំង៣២ប្រទេសនៅក្នុងព្រឹត្តិការណ៍ World Cupនៅប្រទេសរុស្ស៊ីកាន់តែដំណើរការទៅមុខ ដោយក្រុមបាល់ទាត់ប្រទេសខ្លះ ក៏ធ្វើឱ្យអ្នកគាំទ្រពេញចិត្តតាមរយៈការយកឈ្នះគូប្រកួត ឯក្រុមបាល់ទាត់ខ្លះទៀតជាពិសេសក្រុមខ្លាំងៗតែម្ដង ក៏ធ្វើឱ្យអ្នកគាំទ្រខកចិត្តមិនស្ទើរដែរដោយសារតែទទួលបរាជ័យក្នុងការប្រកួតសន្សំពិន្ទុឈានទៅវគ្គ១៦ក្រុមចុងក្រោយ…
ជាក់ស្ដែងកីឡាករ គួច សុកុម្ភៈ ខ្សែបម្រើល្បីឈ្មោះប្រចាំក្លិបបាល់ទាត់ណាហ្គាវើល បានអះអាងថា លោកចាប់អារម្មណ៍ចំពោះការប្រកួតគ្រប់គូនៅក្នុងព្រឹត្តិការណ៍World Cup ដោយគូប្រកួតភាគច្រើនលោកបានចំណាយពេលទស្សនាមិនសូវខកខាននោះផង ។ លោកពិតជាចូលចិត្តការប្រកួតបែបនេះបំផុត ដោយសារតែអាចដកស្រង់បច្ចេកទេសពីកីឡាករល្អៗបានកាន់តែប្រសើរនៅពេលហ្វឹកហាត់ និងចុះប្រកួតដោយផ្ទាល់ ។ លោកថា ការប្រកួត World Cup តាំងពីបើកឆាកដំបូងមកទល់ពេលនេះ លោកបានទស្សនាគូប្រកួតភាគច្រើន បើទោះជាគូប្រកួតខ្លះលោកមិនបានចំណាយពេលទស្សនា ព្រោះតែយប់ជ្រៅពេក តែលោកក៏បានតាមដានលទ្ធផលមិនសូវខាននោះដែរ ។ ក្នុងចំណោមក្រុមបាល់ទាត់ទាំងអស់ លោកស្រឡាញ់ពេញចិត្តជាងគេ គឺក្រុមអេស្ប៉ាញ ដោយលោករំពឹងថា ក្រុមមួយនេះ នឹងអាចឈានចូលដល់វគ្គកៀកនឹងផ្ដាច់ព្រ័ត្រយ៉ាងហោចផង ។ លោកថា បើទោះជាក្រុមទាំង៣២ សុទ្ធតែមានសមត្ថភាពពិបាកប៉ាន់ស្មានលទ្ធផលនៅពេលប៉ះគ្នា តែលោកនៅតែជឿជាក់លើក្រុមអេស្ប៉ាញ ដោយសារតែលោកយល់ថា ក្រុមមួយនេះមានកីឡាករល្អៗ និងមានថ្វីជើងល្អស្រុះគ្នា។ 
រីឯកីឡាករប្រដាល់ល្បីឈ្មោះ ឡុង សុភី ក៏បានប្រកាសថា មានការចាប់អារម្មណ៍ចំពោះការប្រកួតបាល់ទាត់នៅក្នុងព្រឹត្តិការណ៍ World Cup ដូចគ្នាផងដែរ បើទោះជាលោកមិនសូវងប់ងុលនឹងកីឡាបាល់ទាត់ក៏លោកចាប់អារម្មណ៍ចំពោះការប្រកួតលំដាប់ថ្នាក់ពិភពលោកនេះដែរ ។ លោកថា ខ្លួនមិនសូវចូលចិត្តការប្រកួតបាល់ទាត់នោះទេ ប៉ុន្តែសម្រាប់ការប្រកួតនៅក្នុងព្រឹត្តិការណ៍ World Cup គឺលោកតាមដាន ជាពិសេសគឺការប្រកួតរបស់ក្រុមប្រេស៊ីលដែលលោកស្រឡាញ់ពេញចិត្តបំផុត ។ លោកថា ក្រុមប្រេស៊ីល នឹងមានឱកាសឈានឡើងដល់វគ្គផ្ដាច់ព្រ័ត្រ ថ្វីដ្បិតតែការប្រកួតបើកឆាករបស់ក្រុមមួយនេះរកមិនបាន៣ពិន្ទុតាមការចង់បានរបស់អ្នកគាំទ្រក្ដី ។ លោកថា ប្រេស៊ីលជាក្រុមដែលលោកចូលចិត្តមើលការប្រកួតនៅពេលប៉ះជាមួយក្រុមផ្សេងៗ ហើយថ្វីដ្បិតតែលោកមិនសូវមានពេលទស្សនាការប្រកួតដែលធ្វើនៅពាក់កណ្ដាលអធ្រាត្រ ក៏លោកនឹងឆ្លៀតពេលតាមដានការប្រកួតរបស់ក្រុមនេះឱ្យបានជាប់លាប់ក្នុងពេលខាងមុខ។ 
សម្រាប់លោក ឈាវ បូរ៉ា ដែលគេស្គាល់ថាជាកីឡាករល្បីឈ្មោះខាងផ្នែកអុកចត្រង្គឯណេះវិញ ក៏តាមដានព្រឹត្តិការណ៍ World Cup មិនអន់ជាងកីឡាករបាល់ទាត់អាជីពផងដែរ ដោយលោកប្រាប់ថា ស្ទើរមិនមានគូប្រកួតណាមួយនៅក្នុងព្រឹត្តិការណ៍មួយនេះដែលលោកមិនបានទស្សនានោះទេដោយសារតែចង់ដឹងថា ក្រុមណាលេងល្អខ្លាំងនៅពេលប៉ះគ្នា ។ យ៉ាងណាមិញ ក្រុមដែលធ្វើឱ្យលោកចាប់អារម្មណ៍ជាងគេ គឺក្រុមអេស្ប៉ាញ និងប្រេស៊ីល ដោយលោករំពឹងថា ក្នុងចំណោមក្រុមទាំងពីរយ៉ាងហោចក៏មានមួយក្រុមឈានដល់វគ្គផ្ដាច់ព្រ័ត្រទៀតផងដោយសារតែក្រុមទាំងពីរសំបូរកីឡាករល្អ និងមានថ្វីជើងខ្លាំង ដែលមើលទៅអាចឈានដល់វគ្គសំខាន់របស់ World Cup បាន។
ដោយឡែកលោក សុខ សុភ័ក្ត្រ ដែលគេស្គាល់ថា ជាកីឡាករល្បីឈ្មោះផ្នែកកាយវប្បកម្មវិញក៏បានប្រកាសឱ្យដឹងពីការចាប់អារម្មណ៍World Cupនៅក្នុងប្រទេសរុស្ស៊ីផងដែរ ។ លោកបញ្ជាក់ថា ទោះបីជាលោករវល់ច្រើន តែលោកក៏បានចំណាយពេលមើលបានច្រើនគូតាំងពីព្រឹត្តិការណ៍មួយនេះបង្ហាញខ្លួន។ លោកពេញចិត្តក្រុមប្រេស៊ីលជាងគេ ដោយលោករំពឹងថា ក្រុមនេះនឹងចូលដល់វគ្គដណ្ដើមពាន បើទោះជាក្នុងចំណោមក្រុមទាំង៣២ ដែលកាលពីមុនមិនសូវលេងបានល្អ ក៏ប្រកួតបានល្អ ។ យ៉ាងណាមិញលោកថា បើទោះជាក្រុមប្រេស៊ីលមានការប្រែប្រួលលទ្ធផលខុសពីការចង់បាន ក៏លោកតាមដានព្រឹត្តិការណ៍មួយនេះរហូតដល់ចប់ផងដែរ ដើម្បីចង់ដឹងថា ក្រុមណាបានឈ្នះកាន់ពាន ៕
ចែករំលែកព័តមាននេះ