ខេត្តព្រៃវែង ៖ លោកវណ្ណ សុភាពប្រធានមន្ទីរឧស្សាហកម្ម និងសិប្បកម្មខេត្តព្រៃវែងបានឲ្យដឹងថា តាមរយៈការវិនិយោគពីវិស័យឯកជន និងក្រោមការសម្របសម្រួលពីមន្ត្រីជំនាញនៅដើមខែកក្កដា ឆ្នាំ២០១៨នេះ ប្រជាពលរដ្ឋនៅឃុំជើងភ្នំ និងឃុំឈើកាច់…
ខេត្តព្រៃវែង ៖ លោកវណ្ណ សុភាពប្រធានមន្ទីរឧស្សាហកម្ម និងសិប្បកម្មខេត្តព្រៃវែងបានឲ្យដឹងថា តាមរយៈការវិនិយោគពីវិស័យឯកជន និងក្រោមការសម្របសម្រួលពីមន្ត្រីជំនាញនៅដើមខែកក្កដា ឆ្នាំ២០១៨នេះ ប្រជាពលរដ្ឋនៅឃុំជើងភ្នំ និងឃុំឈើកាច់ ស្រុកបាភ្នំ ប្រមាណជិតពីរពាន់គ្រួសារ និងទទួលបានសេវាទឹកស្អាតប្រើប្រាស់ទៅតាមតម្រូវការ ដោយលែងខ្វះខាតដូចមុនទៀតហើយ ។
លោកឡុង រិនប្រធានក្រុមហ៊ុនទឹកស្អាតស្រុកបាភ្នំបានឲ្យដឹងថា ទឹកដែលទាញយកមកផលិតជាទឹកស្អាតសម្រាប់ចែកចាយជូនប្រជាពលរដ្ឋប្រើប្រាស់នៅក្នុងឃុំទាំង២នេះមានប្រភពពីដងទន្លេតូចក្បែរស្ពានកំពង់សឹង ដោយឆ្លងកាត់ការចម្រោះសម្លាប់មេរោគជាច្រើនដំណាក់កាល ជាមួយ និងឧបករណ៍ទំនើបៗដែលធានាបាននូវគុណភាព និងសុវត្ថិភាព១០០% សម្រាប់សុខភាពរបស់បងប្អូនប្រជាពលរដ្ឋ ។
លោកឡុង រិនបានបញ្ជាក់ថា ក្រុមហ៊ុនរបស់លោកកំពុងតម្លើងនូវឧបករណ៍ទំនើបៗជាច្រើន ដែលមានលទ្ធភាពអាចផលិតទឹកស្អាតបាន១០០ម៉ែត្រគូបក្នុង១ម៉ោង និងអាចផ្គត់ផ្គង់ដល់ អតិថិជន បានរហូតដល់១៥០០០គ្រួសារ ក្នុងមួយថ្ងៃ ដោយឡែកអតិថិជនដែលកំពុងប្រើប្រាស់សេវាទឹកស្អាតរបស់ក្រុមហ៊ុននៅក្នុងឃុំជើងភ្នំ និងឃុំឈើកាច់ ស្រុកបាភ្នំ ក្នុងពេលបច្ចុប្បន្ននេះមានចំនួនត្រឹមតែជិត២០០០គ្រួសារប៉ុណ្ណោះដែលមានន័យថា នៅពេលដែលក្រុមហ៊ុនធ្វើការដំឡើងឧបករណ៍រួចរាល់ហើយនោះប្រជាពលរដ្ឋនៅក្នុងឃុំទាំង២នេះ និងមានទឹកស្អាតប្រើប្រាស់គ្រប់គ្រាន់ទៅតាមតម្រូវការ ហើយអាចនឹងសល់ទឹកសម្រាប់ចែកចាយបន្តទៅឲ្យប្រជាពលរដ្ឋនៅក្នុងឃុំផ្សេងៗទៀត ក្នុងស្រុកបាភ្នំនេះថែមទៀតផង ។
លោកបានបញ្ជាក់ថា ទឹកស្អាតរបស់លោកផលិតដោយឆ្លងកាត់ប្រព័ន្ធចម្រោះទឹក១២ដំណាក់កាល មានអាងខ្សាច់ អាងថ្ម អាងឈើ ដោយមានការសហការពីសមាគមផលិតទឹកស្អាត និងមានការត្រួតពិនិត្យតាមដានពីក្រសួង និងមន្ត្រីជំនាញរយៈពេលបីខែម្តង និងមានការលាងសម្អាតអាងរយៈពេល១ខែម្តងផងដែរ ដើម្បីធានាសុវត្ថិភាពសុខភាព ជូនបងប្អូនប្រជាពលរដ្ឋអ្នកប្រើប្រាស់ រីឯសេវាតភ្ជាប់ដំបូងរួមទាំងតម្លៃទឹក គឺយកទៅតាមការកំណត់របស់រដ្ឋ ។
ចែករំលែកព័តមាននេះ