ខេត្តកំពត ៖ លំនៅឋានប្រជាពលរដ្ឋមួយខ្នងដែលសង់ពីស័ង្កសីមានទំហ៊ំ៥គុណនឹង៦ម៉ែត្រ ស្ថិតក្នុងភូមិត្រពាំងកក់ ឃុំកូនសត្វ ស្រុកទឹកឈូ ខេត្តកំពត ត្រូវខ្យល់កន្ទ្រាក់បក់បោកប៉ើងដំបូលហើរទៅបាត់ ខណៈមានខ្យល់កន្ទ្រាក់និង ភ្លៀងមួយមេ កាលពីវេលាម៉ោង៤ទៀបភ្លឺថ្ងៃទី១១ ខែមិថុនា ឆ្នាំ២០១៨ ព្រឹកមិញនេះ ។
យោងតាមរបាយការណ៍របស់សមត្ថកិច្ចមូលដ្ឋានបានឲ្យដឹងថា នៅវេលាដូចខាងលើខណៈមានភ្លៀងធ្លាក់មួយមេលាយឡំជាមួយខ្យល់កន្ទ្រាក់បានបក់យ៉ាងខ្លាំងផងនោះក៏បានធ្វើឲ្យផ្ទះមួយខ្នង ស្ថិតក្នុងភូមិត្រពាំងកក់ ឃុំកូនសត្វ ស្រុកទឹកឈូ ត្រូវប៉ើងដំបូលហើរទៅបាត់ ។ ហើយលំនៅដ្ឋានដែលរងខូចខាតដោយសារខ្យល់កន្ទ្រាក់នេះម្ចាស់ឈ្មោះ តក់ សីហា ភេទប្រុស អាយុ២៦ឆ្នាំ មុខរបរកសិករ រស់នៅក្នុងភូមិឃុំកើតហេតុខាងលើ ។
សមត្ថកិច្ចបានបញ្ជាក់ទៀតថា ក្នុងហេតុការណ៍ខ្យល់កន្ទ្រាក់បំផ្លាញផ្ទះសំបែងនេះ គឺពុំបានប៉ះពាល់ដល់អាយុជីវិតមនុស្ស-សត្វនោះឡើយ ដោយគ្រាន់តែខូចខាតផ្ទះស័ង្កសីមួយខ្នងប៉ុណ្ណោះ ។ ចំពោះករណីគ្រោះមហន្តរាយផ្តើមដោយសារ គ្រោះធម្មជាតិខាងលើនេះដែរអាជ្ញាធរស្រុក និងខេត្តក៏ដូចជា ក្រុមការងារកាកបាទក្រហមបាន និងកំពុងចុះជួយអន្តរាគមន៍យ៉ាងសស្រាក់សស្រាំបំផុត ដើម្បីជួយសង្គ្រោះប្រជាពលរដ្ឋឲ្យបានទាន់ពេលវេលា ៕
ចែករំលែកព័តមាននេះ