ខេត្តព្រះសីហនុ ៖ តំបន់សេដ្ឋកិច្ចពិសេសថ្មីមួយទៀត នឹងលេចរូបរាងឡើងនាពេលឆាប់ៗក្នុងទឹកដីខេត្តដែលកំពុងមានសក្ដានុពលសេដ្ឋកិច្ចនាភាគនិរតីប្រទេស ស្ថិតនៅឃុំជើងគោ ស្រុកព្រៃនប់ ដែលលាតសន្ធឹងលើផ្ទៃដីទំហំប្រមាណ១២៨ហិកតា ។ នេះបើយោងតាមកិច្ចប្រជុំពិភាក្សាមួយដែលធ្វើឡើងកាលពីថ្ងៃទី៦ មិថុនា…
ខេត្តព្រះសីហនុ ៖ តំបន់សេដ្ឋកិច្ចពិសេសថ្មីមួយទៀត នឹងលេចរូបរាងឡើងនាពេលឆាប់ៗក្នុងទឹកដីខេត្តដែលកំពុងមានសក្ដានុពលសេដ្ឋកិច្ចនាភាគនិរតីប្រទេស ស្ថិតនៅឃុំជើងគោ ស្រុកព្រៃនប់ ដែលលាតសន្ធឹងលើផ្ទៃដីទំហំប្រមាណ១២៨ហិកតា ។ នេះបើយោងតាមកិច្ចប្រជុំពិភាក្សាមួយដែលធ្វើឡើងកាលពីថ្ងៃទី៦ មិថុនា ស្ដីពីគម្រោងអភិវឌ្ឍន៍តំបន់សេដ្ឋកិច្ចពិសេស ។
កិច្ចប្រជុំពិភាក្សានេះ មានការចូលរួមពីតំណាងក្រុមហ៊ុនវិនិយោគមកពីវិស័យឯកជន និងក្រុមការងាររបស់ក្រុមប្រឹក្សាអភិវឌ្ឍន៍កម្ពុជា ដោយមានសមាសភាពចូលរួមពីថ្នាក់ខេត្ត ស្រុក និងស្ថាប័នពាក់ព័ន្ធមួយចំនួន ក្នុងគោលបំណងពិភាក្សាធ្វើយ៉ាងណា បញ្ចៀសពីផលប៉ះពាល់នានាដែលអាចកើតមានឡើងពីការបង្កើតតំបន់សេដ្ឋកិច្ចពិសេសមួយនេះ មុននឹងឈានទៅសម្រេចអនុវត្តគម្រោងនាពេលខាងមុខ ។
លោកជំទាវឧកញ៉ា លឹម ឈាវហួ ប្រធានក្រុមប្រឹក្សាភិបាលតំបន់សេដ្ឋកិច្ចពិសេសភ្នំពេញ ដែលបានអញ្ជើញចូលរួម បានលើកឡើងថា កិច្ចពិភាក្សានេះ ក្នុងគោលបំណងឈ្វេងយល់ពីផលប៉ះពាល់នានាដែលអាចកើតមានពីការបង្កើតតំបន់សេដ្ឋកិច្ចពិសេសនេះ និងមានយន្ដការដោះស្រាយ ដើម្បីធានាមិនឲ្យមានបញ្ហាថ្នាំងថ្នាក់ណាមួយដល់ប្រជាពលរដ្ឋក្នុងតំបន់នេះ ។
លោកជំទាវថ្លែងថា ៖« ពាក់ព័ន្ធនឹងគម្រោងអភិវឌ្ឍន៍តំបន់សេដ្ឋកិច្ចពិសេសនោះ យើងធានាមិនឲ្យមានផលប៉ះពាល់ដល់ប្រជាពលរដ្ឋនៅតំបន់នេះទេ ហើយយើងនឹងអភិវឌ្ឍន៍តំបន់នេះ ក៏ដូចជាក្រុងព្រះសីហនុទាំងមូលឲ្យដូចនឹងទីក្រុងស៊ិនជិនរបស់ប្រទេសចិនដូច្នោះដែរ » ។
លោក សរ កក្កដា អភិបាលស្រុកព្រៃនប់បានឲ្យដឹងដែរថា គម្រោងអភិវឌ្ឍន៍តំបន់សេដ្ឋកិច្ចពិសេសនេះ មានទីតាំងនៅជាប់ផ្លូវជាតិលេខ៤ ស្ថិតក្នុងឃុំជើងគោ ស្រុកព្រៃនប់ លាតសន្ធឹងលើផ្ទៃដីសរុបចំនួន១២៨ហិកតា ដែលក្លាយជាគោលដៅបង្កើតសកម្មភាពសេដ្ឋកិច្ចថ្មីមួយទៀតនៅក្នុងស្រុក ក៏ដូចជាខេត្តព្រះសីហនុទាំងមូល ដែលនឹងជួយជំរុញកំណើនសេដ្ឋកិច្ចជាតិ បង្កើតការងារ និងប្រាក់ចំណូលជូនប្រជាពលរដ្ឋកម្ពុជា ។
លោកអភិបាលស្រុកបញ្ជាក់ថា ៖« តំបន់សេដ្ឋកិច្ចពិសេសថ្មីនេះ អាចស្រូបយកកម្មករ-កម្មការិនីរាប់ពាន់ ឬឈានដល់រាប់ម៉ឺននាក់មកបម្រើការងារនៅទីនេះ » ។
លោកបន្ថែមថា ៖« នេះជាគម្រោងសាងសង់តំបន់សេដ្ឋកិច្ចថ្មីមួយទៀតសម្រាប់ស្រុកព្រៃនប់ ស្របពេលបច្ចុប្បន្ន ក្នុងស្រុកនេះមានតំបន់សេដ្ឋកិច្ចពិសេសមួយនៅឃុំបិតត្រាំង ដែលមានរោងចក្រចំនួនជាង១០០ និងមានកម្មករ-កម្មការិនីសរុបជាង២ម៉ឺននាក់កំពុងបម្រើការងារដោយផ្ទាល់ និងបង្កើតការងារជាច្រើនទៀតដល់ប្រជាពលរដ្ឋដើម្បីបង្កើនប្រាក់ចំណូល ។ ចំណែកតំបន់សេដ្ឋកិច្ចពិសេសថ្មីនេះ មានចម្ងាយពីគ្នាប្រមាណតែ៥០គីឡូម៉ែត្រប៉ុណ្ណោះ » ។
លោកអភិបាលស្រុកបន្តថា អាជ្ញាធរស្រុកព្រៃនប់សូមស្វាគមន៍ និងគាំទ្រចំពោះការកសាងតំបន់សេដ្ឋកិច្ចពិសេសថ្មីមួយនេះ ដែលបង្ហាញពីការអភិវឌ្ឍនៅក្នុងស្រុក ក្នុងការបម្រើផលប្រយោជន៍ដល់ប្រជាពលរដ្ឋ ក្រោមដំបូលសន្តិភាព និងស្របតាមទិសដៅរបស់ប្រមុខរាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ។
សូមបញ្ជាក់ផងដែរថា ក្រៅពីតំបន់សេដ្ឋកិច្ចពិសេសបិតត្រាំង ក៏មានរោងចក្រមួយចំនួនទៀតដែលកំពុងដំណើរការនៅស្រុកព្រៃនប់នេះ ដូចជា រោងចក្រម៉ែនអ៊ូ មានទីតាំងនៅក្នុងឃុំអណ្តូងថ្ម ដែលបច្ចុប្បន្ន មានកម្មករ-កម្មការិនីជិត២០០នាក់បាននិងកំពុងបម្រើការងារ ខណៈរោងចក្របារីថ្មីមួយទៀតមានទីតាំងនៅក្បែរនោះ ក៏ត្រៀមនឹងដំណើរការឆាប់ៗនេះផងដែរ ៕
ចែករំលែកព័តមាននេះ