លោកត្រាំថា ការជួបគ្នាលោកគីមជុងអ៊ុនអាចលើកពេល
អាមេរិក និងកូរ៉េខាងជើង ៖ ប្រធានាធិបតីអាមេរិក លោកដូណាល់ ត្រាំ បានថ្លែងកាលពីថ្ងៃ២២ ឧសភា ថា ការជួបគ្នារបស់លោកជាមួយមេដឹកនាំកូរ៉េខាងជើង…
អាមេរិក និងកូរ៉េខាងជើង ៖ ប្រធានាធិបតីអាមេរិក លោកដូណាល់ ត្រាំ បានថ្លែងកាលពីថ្ងៃ២២ ឧសភា ថា ការជួបគ្នារបស់លោកជាមួយមេដឹកនាំកូរ៉េខាងជើង លោក គីម ជុងអ៊ុន នឹងអាចពន្យារពេល។
ពេលជួបជាមួយប្រធានាធិបតី កូរ៉េខាងត្បូងលោក MOON JAE IN លោកត្រាំអះអាងពីរឿងនោះនៅឯសេតវិមានប្រាប់សារព័ត៌មានថា ការជួបគ្នានោះប្រហែលជាពុំអាចមាននាថ្ងៃទី១២ មិថុនាឡើយ។
កាលពីសប្ដាហ៍មុនកូរ៉េខាងជើងបានព្រមានថា ក្រុងព្យុងយ៉ាង អាចលុបចោលការជួបគ្នានេះដែលធ្វើនៅសិង្ហបុរី ប្រសិនបើអាមេរិកមានគោលដៅតែមួយគត់ចាប់បង្ខំ កូរ៉េខាងជើងឲ្យបោះបង់ចោលអាវុធនុយក្លេអ៊ែររបស់ខ្លួនតែមួយមុខគត់។
ក្រុងព្យុងយ៉ាងកាលពីថ្ងៃទី១៦ ឧសភា បានផ្អាកការចរចាអន្តរកូរ៉េ ដើម្បីជាការតវ៉ាប្រឆាំងនឹងសមយុទ្ធយោធារួមមួយដែលរៀបចំធ្វើរវាងកងទ័ពអាកាសអាមេរិ កនិងកូរ៉េខាងត្បូង ហើយអំពាវនាវដល់កូរ៉េខាងត្បូងឲ្យបញ្ឈប់បណ្ដាសមយុទ្ធយោធារបស់ខ្លួនជាមួយសហរដ្ឋអាមេរិក។
សេតវិមាន និងក្រសួងការបរទេសអាមេរិក ប្រកាសកាលពីសប្ដាហ៍មុនថា នឹងបន្តរៀបចំការជួបគ្នាកំពូលនេះរវាងលោកត្រាំ និងលោកគីមជុងអ៊ុន។
កូរ៉េខាងជើងអះអាងនាថ្ងៃទី២២ ឧសភាថា ការចរចាដែលកំពុងធ្វើរវាងខ្លួន និងអាមេរិក គឺជាលទ្ធផលនៃការខិតខំប្រឹងប្រែងថែរក្សាសន្តិភាពរបស់លោកគីមជុងអ៊ុន ពុំមែនជាលទ្ធផលនៃការគាបសង្កត់នានារបស់បរទេសឡើយ។
នៅទីភ្នាក់ងារព័ត៌មានផ្លូវការកូរ៉េខាងជើង KCNA ក្នុងបទអត្ថាធិប្បាយមួយគូសបញ្ជាក់ថា លោកគីមជុងអ៊ុន ដោយសម្រេចបើកការចរចាជាមួយអាមេរិក គឺដើម្បីការពារសន្តិភាព និងស្ថេរភាពនៅឧបទ្វីបកូរ៉េ និងក្នុងតំបន់៕
ចែករំលែកព័តមាននេះ