រាជធានីភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា និងអង់គ្លេស សម្រេចបានកំណើនល្អប្រសើរ ដោយការនាំចេញពីកម្ពុជាទៅកាន់ប្រទេសអង់គ្លេស កើនឡើង៥%កាលពីឆ្នាំ២០១៧ ធៀបរយៈពេលដូចគ្នាកាលពីឆ្នាំ២០១៦កន្លងមកនេះ ។ នេះបើយោងតាមសេចក្តីប្រកាសព័ត៌មានរបស់ស្ថានទូតអង់គ្លេសនៅកម្ពុជា ។
សេចក្តីប្រកាសដដែល ដែលកោះសន្តិភាពទើបទទួលបាននាព្រឹកថ្ងៃទី១៥ ឧសភា ម្សិលមិញ បានឲ្យដឹងថា ទំហំនៃការនាំចេញកាលពីឆ្នាំ២០១៧កន្លងទៅ មានទឹកប្រាក់ស្មើនឹង១,១៦ពាន់លានដុល្លារអាមេរិក ខណៈអង់គ្លេសនាំចូលមកកម្ពុជាវិញ មានកំណើនរហូតដល់១១២% ស្មើនឹងទំហំទឹកប្រាក់ជិត៥០លានដុល្លារអាមេរិក ។ ទំហំពាណិជ្ជកម្មទ្វេភាគីរវាងកម្ពុជា និងអង់គ្លេស កាន់តែកើនឡើងពីមួយឆ្នាំទៅមួយឆ្នាំ។ សេចក្តីប្រកាសព័ត៌មានបានបញ្ជាក់ទៀតថា ប្រទេសអង់គ្លេសជាទីផ្សារធំជាងគេទី៤ សម្រាប់ការនាំចេញរបស់កម្ពុជា បន្ទាប់ពីសហភាពអឺរ៉ុប អាមេរិក និងបណ្តាប្រទេសស្ថិតក្នុងតំបន់អាស៊ាន ។
ប្រភពដដែលបានបញ្ជាក់ទៀតថា ដោយឡែក សម្រាប់ការវិនិយោគវិញ អង់គ្លេសជាប្រទេសវិនិយោគធំជាងគេទី៦នៅកម្ពុជា បន្ទាប់ពីប្រទេសចិន សិង្ហបុរី កូរ៉េ ហុងកុង និងវៀតណាម ដែលមានទំហំទឹកប្រាក់សរុបប្រមាណជាង៤៩លានដុល្លារអាមេរិក ។
លោក Bill Longhurst ឯកអគ្គរាជទូតអង់គ្លេសប្រចាំនៅកម្ពុជា បានអះអាងថា អ្នកវិនិយោគិនរបស់អង់គ្លេសនឹងមកធ្វើការវិនិយោគនៅកម្ពុជាកាន់តែច្រើន ដោយសារតែកំណើនសេដ្ឋកិច្ចកម្ពុជាស្ថិតនៅកម្រិតខ្ពស់ និងកម្លាំងពលកម្មវ័យក្មេងរបស់កម្ពុជាកាន់តែច្រើន។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងថា លោកធ្លាប់ដឹកនាំប្រតិភូសភាពាណិជ្ជកម្មកម្ពុជា ទៅទស្សនកិច្ច និងផ្សព្វផ្សាយសក្តានុពលនៃការវិនិយោគនៅកម្ពុជាទៅកាន់អ្នកវិនិយោគអង់គ្លេស និងនៅប្រទេសបារាំង ជាលទ្ធផល អ្នកវិនិយោគអង់គ្លេសជាច្រើនបានមកវិនិយោគនៅកម្ពុជា ដែលការវិនិយោគរបស់អង់គ្លេសនៅកម្ពុជា មានលើវិស័យវាយនភ័ណ្ឌកាត់ដេរ និងស្បែកជើង សំណង់ ធានារ៉ាប់រង ជាដើម ។
លោកបន្តថា ៖« ជាមួយនឹងកំណើននៃការវិនិយោគនេះ ការនាំចេញទៅអង់គ្លេសបានកើនឡើង ដែលភាគច្រើនជាទំនិញវាយនភ័ណ្ឌ សម្លៀកបំពាក់ កាបូប និងស្បែកជើង » ។
លោកឧកញ៉ា លឹម ហេង បានបន្តថា ប៉ុន្មានឆ្នាំចុងក្រោយនេះ ចំនួនក្រុមហ៊ុនជប៉ុនក៏ចូលមកកម្ពុជាច្រើនផងដែរ នេះជាសារសំខាន់ណាស់សម្រាប់កម្ពុជា ដែលអាចទាក់ទាញក្រុមហ៊ុនពីអង់គ្លេស អាមេរិក និងអឺរ៉ុបមកវិនិយោគនៅកម្ពុជា ព្រោះក្រុមហ៊ុនជប៉ុនមិនងាយចូលមកប្រទេសណានោះទេ ដូច្នេះ ពេលពួកគេចូលមកវិនិយោគនៅកម្ពុជា មានន័យថា បរិយាកាសវិនិយោគនៅកម្ពុជាមានភាពល្អប្រសើរ ទើបអ្នកវិនិយោគជប៉ុនចូលមក ៕
ចែករំលែកព័តមាននេះ