ខេត្តព្រះវិហារ ៖ មានករណីបុរសម្នាក់ត្រូវគ្រាប់កាំភ្លើងកែច្នៃបានស្លាប់ បន្ទាប់ពីបញ្ជូនមកដល់មន្ទីរពេទ្យបង្អែក១៦មករា ក្រុងព្រះវិហារ ករណីនេះបានកើតឡើងនៅវេលាម៉ោងជិត១១យប់ ថ្ងៃទី១៥ ខែឧសភា ឆ្នាំ២០១៨នេះ ស្ថិតក្នុងចំណុចស្រែព្រាល ខាងកើតភូមិប្រមេរុ ឃុំប្រមេរុ ស្រុកត្បែងមានជ័យ ប្រមាណជា១៥គីឡូម៉ែត្រ ។
ជនរងគ្រោះឈ្មោះអួន រ៉ាវី ភេទប្រុស អាយុ២៥ឆ្នាំ រស់នៅភូមិប្រមេរុ ឃុំប្រមេរុ ស្រុកត្បែង មានជ័យ ខេត្តព្រះវិហារ ។
យោងតាមសម្តីលោកវរៈសេនីយ៍ឯកឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្តព្រះវិហារប្រាប់អ្នកសារព័ត៌មាននៅព្រឹកថ្ងៃទី១៦ ខែឧសភា ឆ្នាំ២០១៨នេះឲ្យដឹងថា មូលហេតុដែលនាំឲ្យជនរងគ្រោះខាងលើស្លាប់នេះ ដោយសារតែពេលនោះជនរង គ្រោះនឹងបក្សពួកម្នាក់ទៀតបាននាំគ្នាចូលព្រៃដើររកបាញ់សត្វ ស្រាប់តែពេលនោះជនរងគ្រោះបានប្រទះឃើញសត្វនឹងដើរសម្តៅទៅរកសត្វ រីឯបក្សពួកម្នាក់ទៀតនៅពីក្រោយខ្នង ពេលនោះ បក្សពួកម្នាក់ទៀតក៏លើកកាំភ្លើងកែច្នៃម៉ាកកាប៊ិនបម្រុងនឹងបាញ់សត្វក៏ស្រាប់តែរាលកៃផ្ទះគ្រាប់ចំជនរងគ្រោះកណ្តាលក្បាលមួយគ្រាប់ និងថ្ពាល់មួយគ្រាប់តែម្តងទៅ ។
ក្រោយមកបក្សពួកក៏បាននាំជនសង្ស័យទៅក្នុងភូមិវិញ រួចបញ្ជូនទៅសង្គ្រោះនៅមន្ទីរពេទ្យបង្អែក១៦មករា ក្រុងព្រះវិហារ តែជាអកុសលជនរងគ្រោះបានដាច់ខ្យល់ស្លាប់បាត់ទៅហើយពេលបញ្ជូនដល់មន្ទីរពេទ្យ ។
លោកវរសេនីយ៍ឯក ឆយ បូរិន បន្តថា ក្រោយពីកើតហេតុភ្លាមនោះ សមត្ថកិច្ចក៏បានឃាត់ខ្លួន ជនសង្ស័យឈ្មោះ សុខ វ៉ាន់ឌីន អាយុ២១ឆ្នាំ រស់នៅភូមិឃុំជាមួយជនរងគ្រោះខាងលើ ដែលបានរួមដំណើរចូលព្រៃរកសត្វជាមួយជនរងគ្រោះខាងលើទៅកាន់អធិការដ្ឋាននគរបាលស្រុកត្បែងមានជ័យ ដើម្បីសាកសួរ និងក៏សាងសំណុំរឿងចាត់ការតាមនីតិវិធី ។
បច្ចុប្បន្ននេះជនសង្ស័យកំពុងស្ថិតក្នុងការសាកសួររបស់សមត្ថកិច្ចអធិការដ្ឋាននគរបាលស្រុកត្បែងមានជ័យកសាងសំណុំរឿង បញ្ជូនទៅកាន់ស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿងបន្តបញ្ជូនទៅសាលាដំបូងខេត្តព្រះវិហារ ចាត់ការតាមនីតិវិធី ដោយឡែកជនរងគ្រោះដែលស្លាប់ត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ