រាជធានីភ្នំពេញ ៖ អ្នកនាងប៉េងប៉ោង និងក្រុមគ្រួសារបានរៀបចំពិធីក្រុងពលីដើម្បីសាងសង់ចេតិយតម្កល់ធាតុ និងរូបសំណាកតារាកំប្លែងនាយវីតាមីនសេ ក្រោយពេលទទួលមរណភាពអស់រយៈពេលជាង២ខែមកនេះ ។ កាលពីថ្ងៃព្រឹកថ្ងៃទី១២ ខែឧសភា ឆ្នាំ២០១៨ កូនស្រីនាយវីតាមីនសេ គឺអ្នកនាងប៉េងប៉ោង និងក្រុមគ្រួសារ បានធ្វើពិធីក្រុងពលីរៀបចំសង់ចេតិយដាក់ធាតុ និងរូបសំណាកតារាកំប្លែងវីតាមីនសេ នៅក្នុងវត្តវង្កដ្ឋបុរី រាជធានីភ្នំពេញ ។
អ្នកនាងប៉េងប៉ោង ឲ្យដឹងថា នាង និងគ្រួសារត្រូវតែខំប្រឹងធ្វើចេតិយសម្រាប់ដាក់ធាតុឪពុក ឱ្យខាងតែបានបើទោះបីជាត្រូវចំណាយច្រើនយ៉ាងក៏ដោយ ។ សម្រាប់ទីតាំង និងការកសាងចេតិយនេះត្រូវចំណាយជាង២ម៉ឺនដុល្លារឬជិត៣ម៉ឺនដុល្លារ។ ប្រាក់យ៉ាងច្រើននេះនាងនិងគ្រួសារពិបាកបន្តិច ប៉ុន្តែត្រូវតែខំប្រឹងរក និងប្រមូលលុយដែលមានធ្វើចេតិយជូនឪពុកឱ្យខាងតែបាន ។
អ្នកនាងប៉េងប៉ោងនិយាយថា «នាងខ្ញុំសុខចិត្តអត់ព្រឹកអត់ល្ងាច ក៏ត្រូវដកលុយពីគ្រួសារមកចំណាយបំពេញបន្ថែមលើការសាងសង់ចេតិយនេះដែរ ពីព្រោះនាងខ្ញុំ និងម្តាយសម្រេចចិត្តថាត្រូវឱ្យធាតុសពឪពុករបស់នាងខ្ញុំមានកន្លែង មានផ្ទះមួយ ក្នុងវត្ត «វង្កដ្ឋបុរី» នេះឱ្យខាងតែបានទោះបីជាមានបញ្ហាលំបាកណាក៏ដោយ ។ នាងខ្ញុំសម្រេចចិត្តធ្វើផ្ទះថ្មីឲ្យលោកឪពុក នៅក្នុងវត្តនោះគឺដោយសារតែមុនពេលទទួលមរណភាព គាត់ចូលចិត្តមកធ្វើបុណ្យនៅវត្តនោះ ហើយគាត់ក៏មានវេនកាន់បិណ្ឌធ្វើបុណ្យនៅទីនោះជាប្រចាំរាល់ឆ្នាំផង។ ថ្វីដ្បិតគាត់ទើបតែផ្លាស់មករស់នៅម្ដុំភ្នំពេញថ្មី ប៉ុន្តែអ្នកនាងថាមុនពេលទទួលមរណភាពគាត់ចូលចិត្តចេញចូលធ្វើបុណ្យនៅក្នុងវត្តនោះជាប្រចាំ ទើបខ្ញុំ និងក្រុមគ្រួសារសម្រេចសាងសង់ចេតីយនៅក្នុងវត្តនោះតែម្ដង ។
មកទល់ពេលនេះនៅតែមានការរិះគន់ថានាងខ្ញុំយកលុយជំនួយពីសប្បុរសធម៌មកក្ដាប់ក្នុងដៃ ដោយមិនប្រឹងយកឪពុកទៅព្យាបាលនៅក្រៅប្រទេស រហូតបណ្ដាលឲ្យឪពុកស្លាប់នៅក្នុងរយៈពេលខ្លី ប៉ុន្តែការណ៍ពិតមកពីសភាពជំងឺឈានដល់ដំណាក់កាលព្យាបាលមិនជាទៅហើយ ទើបនាងខ្ញុំសុខចិត្តមិនបញ្ជូនគាត់ចេញក្រៅ ក្រោយទទួលបាន៥ម៉ឺនដុល្លារពីសម្ដេចនាយករដ្ឋមន្ត្រី និងជំនួយ ផ្សេងៗ ដោយប្រឹងសន្សំសំចៃថវិកាទាំងនោះប្រើប្រាស់ក្នុងការរត់ចុះរត់ឡើងក្នុងការព្យាបាលលោកឪពុកមុនស្លាប់ សម្រាប់ធ្វើបុណ្យ និងមួយចំណែកចុងក្រោយគឺទុកធ្វើចេតិយឲ្យគាត់បានសមរម្យនេះឯង »។
តាមគម្រោងចេតិយសម្រាប់នាយវីតាមីនសេ នឹងរួចរាល់នៅដើមខែកក្កដា ដោយសារតែនៅថ្ងៃទី៦ និងថ្ងៃទី៧ ខែកក្កដា គឺជាបុណ្យ១០០ថ្ងៃ និងកំណត់យកថ្ងៃឆ្លងចេតិយឲ្យគាត់ផង ។ អ្នកនាងប៉េងប៉ោង ឆ្លៀតថ្លែងអំណរគុណជាថ្មីដល់សិល្បករ សប្បុរសជននានា ជាពិសេសសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឧបត្ថម្ភដល់ឪពុកនាងពេលធ្លាក់ខ្លួនឈឺ ។
តារាកំប្លែងនាយវីតាមីនសេ បានទទួលមរណភាពកាលពីថ្ងៃទី៣០ ខែមីនា ឆ្នាំ២០១៨ ដោយបន្សល់ក្តីអាឡោះអាល័យពីក្រុមគ្រួសារ ព្រមទាំងមហាជនទូទៅ ៕
ចែករំលែកព័តមាននេះ