រាជធានីភ្នំពេញ ៖ តារាសម្ដែង និងជាតារាបង្ហាញម៉ូដលោកយូឌីស្កូកំពុងត្រូវការប្រាក់ជាចាំបាញ់ដើម្បីវះកាត់ក្រលៀននៅក្រៅប្រទេស ។ ដូច្នេះហើយលោកត្រៀមនឹងចេញទៅសម្ដែងនៅប្រទេសកូរ៉េ ក្នុងឱកាសបុណ្យចូលឆ្នាំប្រពៃណីជាតិ ដើម្បីរកប្រាក់ ។ តារាសម្ដែងរូបនេះនឹងចេញទៅជាមួយលោកព្រាប…
រាជធានីភ្នំពេញ ៖ តារាសម្ដែង និងជាតារាបង្ហាញម៉ូដលោកយូឌីស្កូកំពុងត្រូវការប្រាក់ជាចាំបាញ់ដើម្បីវះកាត់ក្រលៀននៅក្រៅប្រទេស ។ ដូច្នេះហើយលោកត្រៀមនឹងចេញទៅសម្ដែងនៅប្រទេសកូរ៉េ ក្នុងឱកាសបុណ្យចូលឆ្នាំប្រពៃណីជាតិ ដើម្បីរកប្រាក់ ។ តារាសម្ដែងរូបនេះនឹងចេញទៅជាមួយលោកព្រាប សុវត្ថិ និងលោក ឆាយ វីរៈយុទ្ធ ។
តារាសម្តែងលោកយូ ឌីស្កូ បាត់បង់ឱកាសរកប្រាក់ពីសិល្បៈប្រមាណ៦ខែមកហើយដោយសារជំងឺខូចក្រលៀន ។ ជាមួយការខំស្វែងរកជំនួយនានារបស់មិត្តសិល្បករ ព្រមទាំងការខំប្រឹងដោយខ្លួនឯង លោកយូ ឌីស្កូ រំពឹងថាខ្លួនពិតជាអាចចូលវះកាត់ក្រលៀននៅក្រៅប្រទេសបាន ។
ជំងឺខូចក្រលៀនរុករានសុខភាពលោកយូ ឌីស្កូ ឲ្យធ្លាក់ដុនដាបមិនអំណោយផលលើឱកាសការងារសិល្បៈ ដូច្នេះហើយសមាគមសិល្បករខ្មែរ យកចិត្តទុកដាក់បង្កើតមូលនិធិសង្គ្រោះជីវិតលោក ដោយផ្តល់ឱកាសដល់លោកចេញទៅសម្តែងនៅប្រទេសកូរ៉េ រកប្រាក់បន្ថែមលើមូលនិធិនេះ ។ មុនពេលឡើងយន្តហោះ តារាចម្រៀងឆាយ វីរៈយុទ្ធ ក៏បរិច្ចាគប្រាក់ជួយដល់រៀមច្បងម្នាក់នេះផងដែរ ។
ក្នុងសម្តីរៀបរាប់មួយៗតាមទូរស័ព្ទឆ្លងឆ្លើយជាមួយអ្នកយកព័ត៌មាន លោកយូ ឌីស្កូឲ្យដឹងកាលពីពេលថ្មីៗកន្លងមកថា ស្ថានភាពជំងឺរបស់លោកអាចទប់ទល់បាន ។ លោកមានកម្លាំង តែមិនច្រើនទេ បន្ទាប់ពីស្តាប់តាមបង្គាប់ក្រុមគ្រូពេទ្យ ។ រយៈពេលឈឺជិត៦ខែនេះលោកបាត់បង់ការងារច្រើនណាស់ ពិសេសរដូវការម្តងៗមួយខែអាចរកបានចន្លោះពី៣ពាន់ទៅ៤ពាន់ដុល្លារ ។ ប៉ុន្តែពេលនេះមិនអាចធ្វើអ្វីបានច្រើនឡើយ ។
រយៈពេលកន្លងមកអ្នកសិល្បៈ និងសមាគមសិល្បៈបានរួមគ្នាស្វែងរកជំនួយគ្រប់រូបភាព ហើយលោកទទួលបានប្រាក់ជាង១ម៉ឺនដុល្លារក្នុងដៃ ស្របពេលប្រាក់វះកាត់សរុប៥ម៉ឺនដុល្លារ ។
លោកយូ ឌីស្កូ និយាយថា«ក្តីសង្ឃឹមចេះតែមានហើយ ខ្ញុំក៏មិនបន្តតក់ស្លុតទៀតដែរត្រូវតែសង្ឃឹមបើទោះជាមិនមានថវិកាបានលឿនដូចចិត្តក្តី »៕
ចែករំលែកព័តមាននេះ