រាជធានីភ្នំពេញ ៖ អភិបាលរាជធានីភ្នំពេញលើកឡើងថា បន្ទាប់ពីកម្ពុជាមានសន្តិភាពជាង២០ឆ្នាំកន្លងមកនេះ បានធ្វើឱ្យទីក្រុងភ្នំពេញមានការអភិវឌ្ឍប្រែមុខមាត់ និងក្លាយជាប៉ូលសេដ្ឋកិច្ចដ៏សំខាន់របស់កម្ពុជា ។ លោក ឃួង ស្រេង…
រាជធានីភ្នំពេញ ៖ អភិបាលរាជធានីភ្នំពេញលើកឡើងថា បន្ទាប់ពីកម្ពុជាមានសន្តិភាពជាង២០ឆ្នាំកន្លងមកនេះ បានធ្វើឱ្យទីក្រុងភ្នំពេញមានការអភិវឌ្ឍប្រែមុខមាត់ និងក្លាយជាប៉ូលសេដ្ឋកិច្ចដ៏សំខាន់របស់កម្ពុជា ។
លោក ឃួង ស្រេង អភិបាលរាជធានីភ្នំពេញ បានថ្លែងបែបនេះនៅក្នុងពិធីដាំកូនឈើចំនួន១,២ម៉ឺនដើមនៅផ្សារទំនើបអុីអនទី២ កាលពីថ្ងៃទី៧ មេសា កន្លងមក ។
លោកបន្ដថា ចាប់ពីថ្ងៃទី៧ មករា ឆ្នាំ១៩៧៩មក រាជធានីភ្នំពេញបានអភិវឌ្ឍន៍ និងប្រែមុខមាត់ជាបន្តបន្ទាប់ រហូតមកដល់បច្ចុប្បន្ននេះ ប្រកបដោយភាពទាក់ទាញ និងអភិវឌ្ឍន៍លើគ្រប់វិស័យ រហូតដល់ទីក្រុងមួយនេះកា្លយជាប៉ូលសេដ្ឋកិច្ចដ៏សំខាន់របស់ប្រទេសកម្ពុជា។ លោកថា ៖« ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ បានដាក់ចេញនូវគោលនយោបាយ កម្មវិធីនយោបាយ និងយុទ្ធសាស្ត្រឆ្លើយតបទៅនឹងសកម្មភាព និងតម្រូវការជាក់ស្តែងរបស់ប្រជាពលរដ្ឋ និងប្រទេសជាតិ» ។
លោកអភិបាលលើកឡើងថា ៖«ប្រទេសកម្ពុជាយើងបានឆ្លងកាត់ដំណាក់កាលជូរចត់មួយក្នុងរបបប្រល័យពូជសាសន៍ ហើយនៅថ្ងៃរំដោះ៧ មករា ប្រជាជនយើងត្រូវបានរំដោះឱ្យរស់រានមានជីវិតឡើងវិញ ពេលនោះ ប្រជាជនខ្មែរមិនបានគិតទៅដល់ការទិញទំនិញទំនើបៗទេ គឺគិតតែមួយមុខប៉ុណ្ណោះ ធ្វើយ៉ាងណា ឱ្យបានឆ្អែតក្រពះ ។ ប៉ុន្ដែឆ្លងកាត់របត់នយោបាយ និងការងារមួយចំនួនដែលប្រទេសជាតិ និងប្រជាជនយើងបានឆ្លងកាត់ជាមួយនឹងការដឹកនាំរបស់សម្តេច គឺប្រទេសជាតិរបស់យើងមានការរីកចម្រើនជាបន្តបន្ទាប់ រហូតដល់មានការមើលឃើញក្រុមហ៊ុនធំៗចូលមកវិនិយោគនៅកម្ពុជា តួយ៉ាងដូចជា ក្រុមហ៊ុនផ្សារអុីអនបានមកវិនិយោគនៅរាជធានីភ្នំពេញ ដើម្បីធ្វើយ៉ាងណាឱ្យប្រជាជនរបស់យើងបានទិញទំនិញនៅក្នុងប្រទេសរបស់ខ្លួន ដោយពុំបាច់ធ្វើដំណើរទៅប្រទេសជិតខាង » ។
លោកបញ្ជាក់ថា ៖« ស្ថិតក្នុងម្លប់នៃសន្តិភាពអស់រយៈពេលជាង២០ឆ្នាំកន្លងមកនេះ ប្រជាជនកម្ពុជាមានជីវភាពរុងរឿង ធូរធារជាលំដាប់ ដែលធ្វើឱ្យប្រជាជនងាកពីប្រើប្រាស់ ឬបរិភោគឱ្យតែឆ្អែតក្រពះ មកប្រើរបស់ទំនើបៗ ស្របទៅតាមជីវភាពប្រចាំថ្ងៃ ដែលមានការរីកចម្រើន ហើយអ្វីៗទាំងអស់នេះកើតមានឡើងដោយសារតែម្លប់នៃសន្តិភាពរបស់កម្ពុជា ដែលបានកើតឡើងអស់រយៈកាលជាង២០ឆ្នាំទៅនេះ » ។
លោកបន្តថា ៖« សន្តិភាពគឺមានតម្លៃសំខាន់ណាស់សម្រាប់ការរស់នៅរបស់ប្រជាជាតិ ។ និយាយដោយឡែក ប្រទេសកម្ពុជាយើងមានសន្តិភាព ទើបយើងមានការរស់រានមានជីវិតពីមួយថ្ងៃទៅមួយថ្ងៃ រហូតដល់យើងត្រូវការប្រើប្រាស់របស់របរទំនើបៗដូចបច្ចុប្បន្ននេះ » ។
បច្ចុប្បន្ននេះ រដ្ឋបាលរាជធានីភ្នំពេញបានខិតខំស្តារ និងកសាងរាល់ហេដ្ឋារចនាសម្ព័ន្ធរូបវ័ន្តឡើងវិញ ដូចជា ផ្លូវថ្នល់ ស្ពាន និងប្រព័ន្ធប្រឡាយ លូបណ្តាញទឹកស្អាត និងបណ្តាញអគ្គិសនីសាធារណៈ បណ្តាញទូរគមនាគមន៍ ការកែលម្អសួនច្បារ សំណង់ក្រោមនិងលើអាកាស បន្តពង្រីកផ្លូវមួយចំនួនដែលពុំទាន់ឆ្លើយតបទៅនឹងលំហូរចរាចរណ៍នៃយានយន្តសព្វថ្ងៃ ។
ការខិតខំអភិវឌ្ឍន៍ទាំងនេះ ក៏បានចូលរួមពីវិស័យឯកជនផងដែរ តាមរយៈទីក្រុងរណបអគារពាណិជ្ជកម្ម អគារស្នាក់នៅរួម និងខុនដូប្រណីតៗ ត្រូវបានកសាងឡើងជាបន្តបន្ទាប់ ធ្វើឱ្យរាជធានីភ្នំពេញ បានប្រែមុខមាត់ថ្មីប្រកបដោយភាពទាក់ទាញ និងមានការរីកចម្រើនយ៉ាងឆាប់រហ័សដូចបច្ចុប្បន្ននេះ ។
យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់បានបង្ហាញថា
រាជធានីភ្នំពេញមានផ្ទៃក្រឡា៦៩២គីឡូម៉ែត្រការ៉េ មានព្រំប្រទល់ខាងត្បូងទល់នឹងក្រុងតាខ្មៅ និងស្រុកកណ្តាលស្ទឹង ខេត្តកណ្តាល, ខាងលិចទល់នឹងស្រុកអង្គស្នួល ខេត្តកណ្តាល, ខាងជើងទល់នឹងស្រុកពញាឮ និងស្រុកមុខកំពូល ខេត្តកណ្តាល និងខាងកើតទល់នឹងស្រុកខ្សាច់កណ្តាល និងស្រុកល្វាឯម និងស្រុកកៀនស្វាយ ខេត្តកណ្តាល ៕
ចែករំលែកព័តមាននេះ