រាជធានីភ្នំពេញ ៖ ក្នុងឆ្នាំ២០១៧ ប្រៃសណីយ៍កម្ពុជារកចំណូលបានប្រមាណ៨,៥លានដុល្លារ ថយចុះប្រមាណ១០% បើធៀបនឹងឆ្នាំ២០១៦ ។ នេះបើយោងតាមអគ្គនាយកប្រៃសណីយ៍កម្ពុជា ។ ថ្លែងក្នុងសន្និបាតបូកសរុបការងារឆ្នាំ២០១៧…
រាជធានីភ្នំពេញ ៖ ក្នុងឆ្នាំ២០១៧ ប្រៃសណីយ៍កម្ពុជារកចំណូលបានប្រមាណ៨,៥លានដុល្លារ ថយចុះប្រមាណ១០% បើធៀបនឹងឆ្នាំ២០១៦ ។ នេះបើយោងតាមអគ្គនាយកប្រៃសណីយ៍កម្ពុជា ។
ថ្លែងក្នុងសន្និបាតបូកសរុបការងារឆ្នាំ២០១៧ និងទិសដៅឆ្នាំ២០១៨ នៅទីស្តីការប្រៃសណីយ៍ កាលពីថ្ងៃទី៣ មេសា ម្សិលមិញលោក អោក បូរ៉ា ប្រតិភូរាជរដ្ឋាភិបាលទទួលបន្ទុកជាអគ្គនាយកប្រៃសណីយ៍កម្ពុជា មានប្រសាសន៍ថា ក្នុងឆ្នាំ២០១៧កន្លងទៅប្រៃសណីយ៍កម្ពុជារកចំណូលបានប្រមាណ៨,៥លានដុល្លារ លើសផែនការ១១% ប៉ុន្តែបើធៀបនឹងចំណូលក្នុងឆ្នាំ២០១៦ មានរហូត៩,៥លានដុល្លារ ពោលគឺថយចុះប្រមាណ១០% ។
ការថយចុះនេះ បើតាមលោកអគ្គនាយកលើកឡើងថា ៖« ចំណូលក្នុងឆ្នាំ២០១៦មួយចំនួនដែលទទួលបាននោះ វាមិនមែនជាចំណូលចរន្ត ឬជាចំណូលយុទ្ធសាស្ត្ររបស់ប្រៃសណីយ៍ទេ ដោយសារតែតាមរយៈប្រទេសជាដៃគូ និងក្រុមហ៊ុនចិន ឱ្យកម្ពុជាចែកចាយបន្តក្នុងនាមជាប្រទេសស្ថិតក្នុងសមាជិកUPU (សហភាពប្រៃសណីយ៍សកល) និងជាប្រទេសអភិវឌ្ឍន៍តិចតួច (LDCs) » ។
លោកបញ្ជាក់ថា ៖« នៅលើពិភពលោក មានការបញ្ជាទិញទំនិញតាមអនឡាញពីប្រទេសចិនច្រើន ធ្វើឱ្យក្រុមហ៊ុននៅចិនមកទាក់ទងយើងឱ្យចែកចាយបន្ដ ព្រោះក្រុមហ៊ុនមួយចំនួននៅចិន មិនមែនជាសមាជិកUPU និងមិនមែនជាប្រទេសអភិវឌ្ឍន៍តិចតួចដូចកម្ពុជា ។ គ្រាន់តែចែកចាយឲ្យក្រុមហ៊ុនលីអូមួយ យើងទទួលបានចំណូលរហូតដល់៣,៥លានដុល្លារឯណោះ ប៉ុន្ដែដោយសារតែក្នុងធម្មនុញ្ញUPU គេបានចែងថា ប្រទេសដែលចាត់ចូលក្នុងប្រទេសអភិវឌ្ឍន៍តិចតួចសម្រាប់បញ្ញើក្នុង១ឆ្នាំ មិនឱ្យលើស៧០តោនទេ តែយើងគ្រាន់តែចែកឱ្យក្រុមហ៊ុនលីអូ ក្នុងមួយខែ១០០តោន អីចឹងវាលើស ធ្វើឱ្យប្រទេសដៃគូពិន័យយើង ហើយគិតតម្លៃស្មើប្រទេសផ្សេង អីចឹងនៅប្រទេសដៃគូ គេគិតសេវាថ្លៃ កម្ពុជាក៏ទារកម្រៃសេវាពីក្រុមហ៊ុនលីអូថ្លៃដែរ ជាហេតុធ្វើឲ្យក្រុមហ៊ុនលីអូរត់ចោល » ។
យ៉ាងណាក៏ដោយ ទោះបីចំណូលក្នុងឆ្នាំ២០១៧មានការថយចុះ តែឆ្លងតាមការធ្វើអាជីវកម្មរយៈពេល៧ឆ្នាំកន្លងមក ប្រៃសណីយ៍កម្ពុជាបានបង្កើតនូវទឹកប្រាក់ចំណូលពីជាង២លានដុល្លារនៅឆ្នាំ២០១០ កើនឡើងដល់ជាង៨លានដុល្លារនៅឆ្នាំ២០១៧ ទទួលបានប្រាក់ចំណេញរាល់ៗឆ្នាំ ។ នេះបើតាមការអះអាងរបស់លោកអគ្គនាយក ។
ប្រធានក្រុមប្រឹក្សាភិបាលប្រៃសណីយ៍កម្ពុជា លោក កុយ ពុំ មានប្រសាសន៍ថា ប្រៃសណីយ៍កម្ពុជាបានបន្តដំឡើងបៀវត្សរ៍ជូននិយោជិតបានមួយចំនួនធំ ហើយនៅតែបន្តដំឡើងជូនបន្ថែមទៀត ដរាបណាចំណូលប្រៃសណីយ៍កម្ពុជា រក្សាបាននូវស្ថិរភាពកំណើនដូចបច្ចុប្បន្ន ។
លោកបន្តថា ៖« ដើម្បីសម្រេចបាននូវគោលដៅនេះ យើងទាំងអស់គ្នាជាថ្នាក់ដឹកនាំ និងនិយោជិត ត្រូវតែបន្តខិតខំប្រឹងប្រែងពង្រឹងគុណភាពសេវាប្រៃសណីយ៍ឱ្យកាន់តែមានគុណភាពលឿនជាងមុន, មានទំនុកចិត្តពីអតិថិជនកាន់តែខ្លាំង, ពង្រីកទីផ្សារឱ្យកាន់តែទូលំទូលាយ, បន្តបំពាក់ប្រព័ន្ធIPS ឱ្យបានគ្រប់ខេត្ត, បន្តការគ្រប់គ្រងប្រព័ន្ធសុវត្ថិភាព និងមានជំនឿទុកចិត្ត, បន្តពង្រីកគុណភាពសេវាហិរញ្ញវត្ថុប្រៃសណីយ៍ឱ្យបានរហ័សទាន់ចិត្ត, បន្តសហការជាមួយបណ្តាប្រទេសជាដៃគូផ្សេងៗក្នុងការអនុវត្តគម្រោងរបស់UPU ជាដើម » ៕
ចែករំលែកព័តមាននេះ