ខេត្តមណ្ឌលគិរី ៖ យុវជនម្នាក់ខណៈទៅឆក់ត្រីតាមអូរពីរនាក់មិត្តភក្តិ ក៏បានជួបគ្រោះអកុសលឆក់ស្លាប់ខ្លួនឯង កាលពីវេលាម៉ោង១និង៥០នាទីរសៀលថ្ងៃទី២៥ មីនា ស្ថិតនៅចំណុចអូររាំងដែលមានទឹកត្រឹមជង្គង់ ស្ថិតក្នុងភូមិពូរាង ឃុំសែនមនោរម្យ ស្រុកអូររាំង ។
លោក ខៃ វណ្ណៈ អធិការរងនគរបាលស្រុកអូររាំងបានឱ្យដឹងថា យុវជនដែលស្លាប់ឈ្មោះ តេង សុចាន់ អាយុ២៥ឆ្នាំ ឯមិត្តភក្តិដែលទៅជាមួយគ្នាឈ្មោះ សុឹម វ៉ាន់នឿន អាយុ២៦ឆ្នាំ រងរបួសស្រាល ។ នៅពេលទៅឆក់ត្រីនោះ ឈ្មោះ តេង សុចាន់ (ជនរងគ្រោះ) ជាអ្នកកាន់ឧបករណ៍ចុះទៅឆក់ ឯឈ្មោះ សុឹម វ៉ាន់នឿន នៅលើគោក ។ ខណៈកំពុងឆក់ត្រី ស្រាប់តែដែកសម្រាប់ឆក់វៀចម្ខាង ហើយ តេង សុចាន់ ក៏បានយកដៃម្ខាងទៀតដែលកំពុងកាន់ដែកឆក់ ដើម្បីតម្រង់ដែកវៀច ប៉ុន្តែដៃម្ខាងទៀតនោះនៅកាន់កុងតាក់មិនលែង ក៏ឆក់បណ្តាលឱ្យដួលទៅក្នុងទឹកសង្កត់លើអាគុយដែលកំពុងស្ពាយក្រោយខ្នង ។
ដោយឃើញបែបនេះ ឈ្មោះ ស៊ីម វ៉ាន់នឿន ចុះទៅជួយ ក៏ត្រូវឆក់ដែរ មិនអាចជួយជនរងគ្រោះបាន ទើបបណ្តាលឱ្យឈ្មោះ តេង សុចាន់ ស្លាប់តែម្តង រីឯ ស៊ឹម វ៉ាន់នឿន គ្រាន់តែរងរបួសស្រាល ។ក្រោយពីពិនិត្យសពរួច សមត្ថកិច្ចសន្និដ្ឋានថា ជនរងគ្រោះពិតជាស្លាប់ដោយសារចរន្តអាគុយឆក់មែន និងបានប្រគល់សពឱ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ