រាជធានីភ្នំពេញ ៖ អាជ្ញាធរខេត្តកំពង់ចាមបានអះអាងថា ប្រជាពលរដ្ឋស្រុកបាធាយខេត្តកំពង់ចាម ជួបបញ្ហាគ្រោះថ្នាក់ចរាចរណ៍ច្រើនជាងបណ្ដាស្រុកផ្សេងៗ ដោយសារ តែប្រជាពលរដ្ឋរស់នៅក្នុងស្រុកនេះមានលំនៅដ្ឋានភាគច្រើន នៅតំបន់អមសង់ខាងផ្លូវ ម្យ៉ាងអ្នកបើកបរមិនមានការប្រុងប្រយ័ត្ន បើកហួសល្បឿនកំណត់ បើកបរដោយភាពស្រវឹង និងកត្តាជាច្រើនទៀត ។
ក្នុងពិធីសម្ពោធដាក់ឲ្យប្រើប្រាស់ជាផ្លូវការសាលាធម្មសភា និងសមិទ្ធិផលនានានៅវត្តរដ្ឋមាលា ហៅវត្តជាលាចចារ ស្ថិតនៅភូមិជាលា ឃុំជាលា ស្រុកបាធាយនាថ្ងៃទី២៥ មីនា ២០១៨នេះ លោក គួច ចំរើន អភិបាលខេត្តកំពង់ចាម បានជំរុញ និងដាស់តឿនឲ្យប្រជាពលរដ្ឋយកចិត្តទុកដាក់ និងប្រុងប្រយ័ត្នខ្ពស់ចំពោះ បញ្ហាគ្រោះថ្នាក់ចរាចរណ៍ ព្រោះគ្រោះថ្នាក់ចរាចរនេះ ទូទាំងប្រទេសកម្ពុជា គឺជារឿងដែលសំខាន់បំផុតនៅក្នុងពេលបច្ចុប្បន្ន ដែលប្រមុខរាជរដ្ឋាភិបាលកម្ពុជាកំពុងតែយកចិត្ដទុកដាក់បំផុត ។
លោកគួច ចំរើន បានបញ្ជាក់ថា បញ្ហាគ្រោះថ្នាក់ចរាចរណ៍កំពុងកើតឡើងនៅក្នុងខេត្តកំពង់ចាម ក្នុងបណ្ដាស្រុកនានា ។ ដោយឡែកក្នុងពេលកន្លងមកប្រជាពលរដ្ឋរស់នៅក្នុងស្រុកបាធាយជួបបញ្ហាគ្រោះថ្នាក់ចរាចរណ៍មានអត្រាគ្រោះថ្នាក់ចរាចរណ៍ខ្ពស់ជាង បណ្ដាស្រុកផ្សេងៗ គឺដោយសារតែការបើកបររបស់ពួកគាត់មិនមានការប្រុងប្រយ័ត្ន បើកបរហួសល្បឿនកំណត់ បើកបរដោយភាពស្រវឹង និងកត្តាជាច្រើនទៀត ៕
ចែករំលែកព័តមាននេះ