រាជធានីភ្នំពេញ ៖ បេសកកម្មជំនួញមួយដែលរៀបចំដោយក្រុមប្រឹក្សាអភិវឌ្ឍន៍ពាណិជ្ជ កម្មហុងកុង (HKTDC) បានមកធ្វើទស្សនកិច្ចនៅកម្ពុជារយៈពេល២ថ្ងៃ ចាប់ពីថ្ងៃទី១៩ ដល់ថ្ងៃទី២០ មីនា ដើម្បីស្វែងរកឱកាសសម្រាប់កិច្ចសហប្រតិបត្តិការវិនិយោគ…
រាជធានីភ្នំពេញ ៖ បេសកកម្មជំនួញមួយដែលរៀបចំដោយក្រុមប្រឹក្សាអភិវឌ្ឍន៍ពាណិជ្ជ កម្មហុងកុង (HKTDC) បានមកធ្វើទស្សនកិច្ចនៅកម្ពុជារយៈពេល២ថ្ងៃ ចាប់ពីថ្ងៃទី១៩ ដល់ថ្ងៃទី២០ មីនា ដើម្បីស្វែងរកឱកាសសម្រាប់កិច្ចសហប្រតិបត្តិការវិនិយោគ និងផលិតកម្មរវាងកម្ពុជា និងហុងកុង ។
ថ្លែងក្នុងជំនួបជាមួយខាងវិទ្យាស្ថានវិស្វកម្ម ពាណិជ្ជកម្ម និងសេដ្ឋកិច្ចនៃតំបន់សេដ្ឋកិច្ចពិសេសហុងកុង កាលពីថ្ងៃទី១៩ មីនា នៅទីស្តីការក្រសួង លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ប្រតិភូហុងកុងចូលមកកម្ពុជាពេលនេះ ក្នុងគោលបំណងបង្កើនទំនាក់ទំនងជាមួយរដ្ឋមន្ត្រីអាស៊ានក៏ដូចជាស្វែងរកឱកាសវិនិយោគជាមួយប្រទេសកម្ពុជា បន្ទាប់ពីសន្ធិសញ្ញាទីផ្សារសេរីរវាងអាស៊ាន-ហុងកុង ទើបតែបានចុះហត្ថលេខានៅទីក្រុងម៉ានីល កន្លងទៅថ្មីៗនេះ ។
បើតាមលោករដ្ឋមន្ត្រី ជំនួបជាមួយប្រតិភូហុងកុងនៅថ្ងៃនេះ អាចនឹងធ្វើឲ្យមានការវិនិយោគកើតមានគ្រប់យ៉ាងនៅពេលខាងមុខ ហើយលោកនឹងជំរុញឲ្យមានជំនួបរវាងធុរជនកម្ពុជា និងហុងកុងកើតមានឡើង អាចធ្វើនៅរាជធានីភ្នំពេញ ឬនៅហុងកុងនាពេលខាងមុខ ។
លោករដ្ឋមន្ត្រីបន្តថា ៖« នេះជាជំនួបលើកទី១ រវាងកម្ពុជានិងហុងកុង ហើយនៅពេលខាងមុខ យើងអាចមានការវិនិយោគគ្រប់យ៉ាង។ ខ្ញុំនឹងជំរុញឱ្យមានជំនួបខាងផ្នែកធុរជននៃភាគីទាំងពីរ ដែលយើងអាចរៀបចំរវាងធុរជនខ្មែរ និងហុងកុងនៅខាងមុខឆាប់ៗនេះ ។ ខ្ញុំនឹងជំរុញដើម្បីឱ្យមានការទាក់ទងរឿងវិនិយោគនៃភាគីទាំងពីរ » ។
នៅក្នុងសិក្ខាសាលាមួយដែលរៀបចំឡើងកាលពីថ្ងៃទី២០ មីនា នៅសណ្ឋាគារ The Great Duke Phnom Penh លោក Edward Yau លេខាធិការពាណិជ្ជកម្ម និងអភិវឌ្ឍន៍សេដ្ឋកិច្ចរដ្ឋបាលពិសេសនៃរដ្ឋបាលក្រុងហុងកុង បានមានប្រសាសន៍ថា គោលបំណងនៃបេសកកម្មពាណិជ្ជកម្មនេះបង្កើតឡើងដើម្បីស្វែងរកឱកាសសម្រាប់ការវិនិយោគ និងកិច្ចសហប្រតិបត្តិការអាជីវកម្ម ក្រោមគំនិតផ្តួចផ្តើមនៃគម្រោងពាណិជ្ជកម្ម«ផ្លូវមួយ ខ្សែក្រវាត់មួយ» និងជាផ្លូវសម្រាប់សហគមន៍ធុរកិច្ចនៅកម្ពុជា និងហុងកុង ។
លោកបន្តថា សិក្ខាសាលានេះក៏នឹងបង្ហាញពីឱកាសអាជីវកម្មនៅកម្ពុជា ដើម្បីទាញយកផលប្រយោជន៍នៃការវិនិយោគជាមួយហុងកុង ដើម្បីជំរុញភាពជាដៃគូក្នុងតំបន់ ជាពិសេស ការវិនិយោគលើផ្នែកហិរញ្ញវត្ថុ និងធនាគារ ការអភិវឌ្ឍហេដ្ឋារចនាសម្ព័ន្ធ និងផ្នែកច្បាប់។ តាមរយៈមូលដ្ឋានគ្រឹះដ៏រឹងមាំដូចជា ប្រព័ន្ធច្បាប់កម្រិតរបរបង់ពន្ធទាប កម្រិតខ្ពស់នៃហេដ្ឋារចនាសម្ព័ន្ធហិរញ្ញវត្ថុ និងការវិនិយោគជឿនលឿនទាំងបណ្តាញអ្នកអភិវឌ្ឍន៍ជាតិ និងអន្តរជាតិ រួមជាមួយនឹងលំហូរព័ត៌មានសេរី ចំពោះទីផ្សារនៃការវិនិយោគទំនិញនានា ហុងកុងបានបង្កើតជាទម្រង់នៃបណ្តុំព័ត៌មានមូលធនចំពោះការវិនិយោគ និងហិរញ្ញវត្ថុសម្រាប់អ្នកវិនិយោគសកល ។ លោក Edward Yau បន្តថា កិច្ចព្រមព្រៀងពាណិជ្ជកម្មសេរីអាស៊ាន-ហុងកុង (FTA) នាពេលថ្មីៗនេះ ក៏បានជំរុញ និងសម្របសម្រួលការធ្វើពាណិជ្ជកម្ម និងការវិនិយោគចំពោះសេដ្ឋកិច្ចហុងកុង និងអាស៊ានផងដែរ ។
លោកថា ៖« FTA នឹងចូលរួមកាត់បន្ថយកាតព្វកិច្ចពន្ធគយដែលត្រូវបានកំណត់ដោយអាស៊ាន និងលើកកម្ពស់ការប្រកួតប្រជែងជាសកលរបស់ដៃគូសហការនៃហុងកុងនៅក្នុងទីផ្សារសកល » ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting បានឱ្យដឹងថា បើមើលអំពីមូលដ្ឋាននៃការវិនិយោគ ប្រតិភូហុងកុងមើលឃើញឱកាសច្រើនទាក់ទងនឹងហេដ្ឋារចនាសម្ព័ន្ធដែលកំពុងរីកចម្រើន និងចង់វិនិយោគក្នុងរយៈពេលវែង ។ ប៉ុន្តែនៅក្នុងរយៈពេលខ្លីមានការលំបាក ឬមិនច្បាស់លាស់ច្រើន ដោយសារប្រតិភូហុងកុងមកកម្ពុជាពេលនេះ គ្រាន់តែជាការស្វែងរកឱកាស ។
យោងតាមរបាយការណ៍ក្រសួងពាណិជ្ជកម្ម ហុងកុងគឺជាដៃគូវិនិយោគលំដាប់ទី៣របស់កម្ពុជា បន្ទាប់ពីប្រទេសចិន និងជប៉ុន ។ តាមតួលេខកត់ត្រាដោយក្រុមប្រឹក្សាអភិវឌ្ឍន៍កម្ពុជា ការវិនិយោគរបស់ហុងកុងនៅកម្ពុជា គិតចាប់ពីឆ្នាំ១៩៩៤-២០១៦ មានចំនួន២៤៤គម្រោង ស្មើនឹងទឹកប្រាក់សរុប១,២៥ពាន់លានដុល្លារ ឬប្រហែល២%នៃទុនវិនិយោគផ្ទាល់សរុបពីក្រៅប្រទេស ។
ទន្ទឹមគ្នានេះ ទំហំពាណិជ្ជកម្មទ្វេភាគីកម្ពុជា-ហុងកុង នៅក្នុងឆ្នាំ២០១៦ មានចំនួនជាង ៧៣០លានដុល្លារ ដែលក្នុងនោះកម្ពុជានាំចេញទៅហុងកុងមានទឹកប្រាក់២១៣លានដុល្លារ និងនាំចូលពីហុងកុងមានទឹកប្រាក់ជាង៥១៦លានដុល្លារ ។
តាមរបាយការណ៍ក្រសួងបញ្ជាក់ថា ក្នុងឆ្នាំ២០១៧កន្លងទៅនេះ មានក្រុមហ៊ុនមកពីហុងកុងចំនួន៥បានមកវិនិយោគនៅកម្ពុជា ក្នុងនោះមាន ដូចជា Penh Tech Garment Garment Factory, Jade Sun Garment, Superl, Fushun Cambo Fashion និង Xanatex( Cambodia)ជាដើម ៕
ចែករំលែកព័តមាននេះ