រាជធានីភ្នំពេញ ៖ បើទោះបីជាកន្លងមកមានបងប្អូនខ្មែររស់នៅប្រទេសអូស្ត្រាលីមួយចំនួនគ្រោងនឹងធ្វើបាតុកម្មចំពោះវត្តមានសម្តេចតេជោ ហ៊ុន សែន នាយករដ្ឋមន្ត្រីកម្ពុជាសម្រាប់កិច្ចប្រជុំកំពូលពិសេសនៃថ្នាក់ដឹកនាំអាស៊ាន-អូស្ត្រាលី ក៏ប្រមុខរាជរដ្ឋាភិបាលមិនបានលុបចោលគម្រោងចូលរួមកិច្ចប្រជុំនេះដែរ ។
ឥឡូវនេះ សមាគមខ្មែរ-អូស្ត្រាលីនិងខ្មែរ-ណូវែលហ្សេឡង់ចំនួន៧ នៅប្រទេសអូស្ត្រាលី និងណូវែលហ្សេឡង់ កាលពីថ្ងៃ១២ ខែមីនា បានលើកឡើងថា ប្រជាពលរដ្ឋខ្មែរ-អូស្ត្រាលី និងខ្មែរ-ណូវែលហ្សេឡង់ ត្រៀមខ្លួនគាំទ្រ និងស្វាគមន៍ដំណើរអញ្ជើញមកដល់របស់សម្តេចតេជោ ហ៊ុន សែន នាយករដ្ឋនៃព្រះរាជាណាចក្រកម្ពុជាក្នុងកិច្ចប្រជុំកំពូលពិសេសអាស៊ាន-អូស្ត្រាលី។
យោងតាមសេចក្តីថ្លែងការណ៍រួមក្រុមប្រជាពលរដ្ឋខ្មែរ-អូស្ត្រាលី និងខ្មែរ-ណូវែលហ្សេឡង់ នៃសមាគមចំនួន៧មានមូលដ្ឋាននៅប្រទេសអូស្ត្រាលី និងណូវែលហ្សេងឡង់ រួមមាន ៖
១-សមាគមវប្បធម៌កម្ពុជា រដ្ឋអូស្ត្រាលីខាងត្បូង,
២-សមាគមខ្មែរ-អូស្ត្រាលីនៃរដ្ឋឃ្វីនស្លែនដ៍
៣-សមាគមពលរដ្ឋខ្មែរ អូស្ត្រាលីរដ្ឋវិចតូតីយ៉ា,
៤-សមាគមយុវជនខ្មែរ ទីក្រុងស៊ីដនី,
៥-សមាគមមិត្តភាពកម្ពុជា និងវប្បធម៌ប្រចាំរដ្ឋអូស្ត្រាលីខាងត្បូង,
៦-សមាគមទ្រទ្រង់វប្បធម៌ខ្មែររដ្ឋធានីវែល្លីងតុន និងសមាគមខ្មែរ ហាមីតុន-ភ្នំពេញ។
សូមបញ្ជាក់ថា សម្តេចតេជោនឹងដឹកនាំគណៈប្រតិភូកម្ពុជា ចាកចេញពីកម្ពុជាល្ងាចនេះសម្រាប់កិច្ចប្រជុំកំពូលពិសេសនៅទីក្រុងស៊ីដនី ប្រទេសអូស្ត្រាលី ៕
ចែករំលែកព័តមាននេះ