រាជធានីភ្នំពេញ ៖ អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្កការប្រជាជាតិ ប្រចាំនៅកម្ពុជា បានលើកយកបញ្ហាសំខាន់ៗចំនួន៣ចំណុច ដែលកើតឡើងនៅកម្ពុជា កាលពេលកន្លង មកពិភាក្សាជាមួយអ្នកនាំពាក្យរដ្ឋសភា ។ ប្រាប់អ្នកសារព័ត៌មានក្រោយជំនួបពិភាក្សានាព្រឹកថ្ងៃទី១៣…
រាជធានីភ្នំពេញ ៖ អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្កការប្រជាជាតិ ប្រចាំនៅកម្ពុជា បានលើកយកបញ្ហាសំខាន់ៗចំនួន៣ចំណុច ដែលកើតឡើងនៅកម្ពុជា កាលពេលកន្លង មកពិភាក្សាជាមួយអ្នកនាំពាក្យរដ្ឋសភា ។
ប្រាប់អ្នកសារព័ត៌មានក្រោយជំនួបពិភាក្សានាព្រឹកថ្ងៃទី១៣ ខែមីនា ឆ្នាំ២០១៨ នៅវិមានរដ្ឋសភា លោក ឈាង វុន អ្នកនាំពាក្យរដ្ឋសភា និងជាប្រធានគណៈកម្មការកិច្ចសហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា បានឲ្យដឹងក្រោយជំនួបភាក្សាជាមួយ លោកស្រី រ៉ូណាស្មីត អ្នករាយការណ៍ពិសេសរបស់អង្កការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា បានឲ្យដឹងថា ក្នុងជំនួបអ្នករាយការណ៍ពិសេសបានលើកបញ្ហាសំខាន់ចំនួន៣គឺ ទី១.ករណីអភ័យឯកសិទ្ធិរបស់សាមជិកសភាដែលត្រូវបានចាប់ខ្លួន ទី២.ការបែងចែកអាសនៈរបស់អតីតគណបក្សសង្គ្រោះជាតិ និងទី៣.ការធ្វើវិសោធនកម្មរដ្ឋធម្មនុញ្ញ និងច្បាប់ក្រមព្រហ្មទណ្ឌ ។
លោកបានបញ្ជាក់ថា «ខ្ញុំក្នុងនាមជាស្ថាប័ននីតិប្បញ្ញាត្តិកម្ពុជា បានទទួលជួបពិភាក្សាជាមួយតំណាងអ្នករាយការណ៍ពិសេសអង្កការសហប្រជាជាតិ ទទួលបន្ទុកសិទ្ធិមនុស្ស ក្នុងនាមជាស្ថាប័ននីតប្បញ្ញត្តិកម្ពុជា ។ ខ្លឹមសារសំខាន់យើងបានពិភាក្សាមាន៣ចំណុចគឺ ទី១.គាត់បានស្នើឲ្យខ្ញុំពន្យល់ពីអភ័យឯកសិទ្ធិ និងបទល្មើសជាក់ស្ដែងនៅកម្ពុជា ។ ករណីនេះខ្ញុំបានពន្យល់គាត់តាំងពីរឆ្នាំមុនមកម្ល៉េះ ខ្ញុំក៏បានលើកជាឧទារហណ៍ជាច្រើនប្រាប់គាត់ ដូចជាករណី លោក អ៊ុំ សំអាន អតីតសមាជិករដ្ឋសភាអតីតគណបក្សសង្គ្រោះជាតិ ដែលបានយកផែនទីក្លែងក្លាយបង្ហាញសាធារណៈជន និងលោក ហុង សុខហួរ អតីសមាជិកព្រឹទ្ធសភា អតីតគណបក្សសមរង្ស៊ី បានកែសម្រួលផែនទីបង្ហោះ នៅលើផែកហ្វេសប៊ុក លោក សម រង្ស៊ី ជាដើម ។ ទី២.គាត់សួរការកែប្រែច្បាប់ស្តីពីរដ្ឋធម្មនុញ្ញ និងក្រមព្រហ្មទណ្ឌ ។ ខ្ញុំបានប្រាប់គាត់ យើងកែច្បាប់នេះ ដើម្បីធានាថែរក្សាសន្តិភាពនៅកម្ពុជាក្រោមការដឹកនាំរបស់ សម្តេចតេជោ ហ៊ុន សែន ។ និងទី៣.ការបែងចែកអាសនៈរបស់អតីតគណបក្សសង្គ្រោះជាតិ ដែលត្រូវរំលាយ» ។
ទាក់ទិននឹងការបែងចែកអាសនៈនេះដែរ លោក ឈាង វុន បានប្រាប់ទៅអ្នករាយការណ៍របស់អង្កការសហប្រជាជាតិថា នៅក្នុងប្រទេសកម្ពុជាបានប្រកាន់យករបបលទ្ធិប្រជាធិបតេយ្យអាស្រ័យរដ្ឋធម្មនុញ្ញ ហើយការបោះឆ្នោតនៅកម្ពុជាជការសមាមាត្រ គឺមិនបោះឆ្នោតឲ្យបុគ្គលនោះទេ ។ ដូច្នេះបើគណបក្សនយោបាយណាមួយត្រូវរំលាយ នៅអាសនៈ ឬកៅអីនោះ មិនអាចទុកចោលបានទេ ត្រូវចែកឲ្យគណបក្សនយោបាយដទៃ ដោយមិនទុកឲ្យទំនេរ ឬទុកដំណើរការលទ្ធិប្រជាធិបតេយ្យស្លាប់ ។
តាមលោក ឈាង វុន បានឲ្យដឹងក្នុងជំនួបពិភាក្សាការងារនោះ អ្នករាយការណ៍ពិសេស UN មិនបានលើកឡើងពីការចាប់ខ្លួន លោក កឹម សុខា អតីតប្រធានគណបក្សសង្គ្រោះជាតិនោះទេ ។ លើសពីនេះ លោកស្រីមិនបានលើកឡើងពីបញ្ហាសិទ្ធិមនុស្សនៅកម្ពុជានោះទេ ៕
ចែករំលែកព័តមាននេះ