រាជធានីភ្នំពេញ ៖ ការនាំចេញអង្ករទៅកាន់ទីផ្សារអន្តរជាតិរបស់កម្ពុជាក្នុងខែកុម្ភៈ កន្លងទៅនេះ មានចំនួនប្រមាណ៤,៧ម៉ឺនតោន ធ្លាក់ចុះប្រមាណ២៧% បើធៀបនឹងខែកុម្ភៈឆ្នាំមុន ។ នេះបើយោងតាមរបាយការណ៍ពីលេខាធិការដ្ឋានច្រកចេញ-ចូលតែមួយសម្រាប់បំពេញបែបបទនាំចេញអង្ករ ។…
រាជធានីភ្នំពេញ ៖ ការនាំចេញអង្ករទៅកាន់ទីផ្សារអន្តរជាតិរបស់កម្ពុជាក្នុងខែកុម្ភៈ កន្លងទៅនេះ មានចំនួនប្រមាណ៤,៧ម៉ឺនតោន ធ្លាក់ចុះប្រមាណ២៧% បើធៀបនឹងខែកុម្ភៈឆ្នាំមុន ។ នេះបើយោងតាមរបាយការណ៍ពីលេខាធិការដ្ឋានច្រកចេញ-ចូលតែមួយសម្រាប់បំពេញបែបបទនាំចេញអង្ករ ។
តាមរបាយការណ៍ដដែលបានបង្ហាញថា បរិមាណអង្ករកម្ពុជាចំនួន៤៧.៨០៩តោន បាននាំចេញក្នុងខែកុម្ភៈឆ្នាំនេះ ថយចុះ១៤.០៧៨តោន ស្មើនឹង២៧% បើប្រៀបធៀបគ្រាដូចគ្នាកាលពីឆ្នាំមុន ។ ចំណែកទិសដៅនាំចេញមានចំនួន៤៨ប្រទេស ក្នុងនោះសហភាពអឺរ៉ុបមាន២៥ប្រទេស, អាស៊ាន៣ប្រទេស និងគោលដៅដទៃទៀតចំនួន២០ប្រទេស ។ ក្នុងចំណោមប្រទេសគោលដៅទាំងនោះ ចិនស្ថិតក្នុងលំដាប់លេខ១ មានចំនួន២៩.៥០១តោន តាមពីក្រោយដោយបារាំងមាន១៤.៧៤៣តោន, ម៉ាឡេស៊ី៩.២៧៩តោន, ប្រទេសហ្គាបុង៧.២៦៧តោន, ប្រទេសហូឡង់៥.៤១៩តោន, ប្រទេសប៉ូឡូញ៤.៩៣៤តោន, ប្រទេសឆែក៣.៨៦៨តោន, ប្រទេសបែលហ្ស៊ីក៣.៤៩៥តោន, ហុងកុង៣.៣៩៩តោន និងអង់គ្លេសចំនួន៣.៣៨១តោន ។
ទាក់ទងនឹងការធ្លាក់នេះ បើតាមនាយកក្រុមហ៊ុនអេមរុ រាយស៍ មើលឃើញថា ដោយសារកម្លាំងទិញមកពីប្រទេសជិតខាងខ្លាំងក្លា ស្របពេលឃ្លាំង និងឡសម្ងួត មានទំហំតូច ជាហេតុធ្វើឱ្យកម្ពុជាពុំមានស្តុកស្រូវគ្រប់គ្រាន់សម្រាប់កែច្នៃនាំចេញ ។
លោកឧកញ៉ា សុង សារ៉ន នាយកក្រុមហ៊ុន រូបនេះ បានថ្លែងតាមទូរស័ព្ទកាលពីថ្ងៃទី៨ មីនាថា ៖« នៅឆ្នាំនេះ ប្រទេសជិតខាងចូលមកទិញស្រូវនៅកម្ពុជាច្រើនជាង២ឆ្នាំមុន ខណៈកម្លាំងនៃការប្រមូលទិញស្រូវក្នុងស្រុកមានការថយចុះ ដោយសារតែការសាងសង់ឃ្លាំងស្តុកស្រូវ និងឡសម្ងួតមិនទាន់ហើយ មិនមានលទ្ធភាពសម្ងួតទាន់ពេលវេលា ជាហេតុធ្វើឱ្យស្រូវហូរចេញទៅប្រទេសជិតខាងច្រើន ។ លើសពីនេះ កាលពីខែវិច្ឆិកា និងធ្នូ ឆ្នាំ២០១៧ យើងសម្រុកធ្វើការនាំចេញច្រើន ជាហេតុធ្វើឱ្យការនាំចេញអង្ករក្នុងខែកុម្ភៈ ថយចុះ » ។
ទោះជាយ៉ាងនេះក្ដី លោកថា ការនាំចេញក្នុងខែកុម្ភៈធ្លាក់ចុះនេះ វាមិនធ្វើឱ្យប៉ះពាល់ដល់ការនាំចេញអង្កររបស់ក្រុមហ៊ុនលោកឡើយ គឺមានតែការកើនឡើង ដោយសារក្រុមហ៊ុនលក់អង្ករនៅក្នុងស្រុកបានជាង១ពាន់តោន និងនាំចេញជាង២ពាន់តោនក្នុង១ខែជាប្រចាំ ។
លោកឧកញ៉ា វង្ស ប៊ុនហេង នាយកក្រុមហ៊ុនវង្សប៊ុនហេង រាយស៍ កន្លងមកបានបង្ហាញការយល់ឃើញថា ការនាំចេញអង្ករក្នុងខែកុម្ភៈ នឹងមិនអាចកើនឡើងដូចខែមករាដើមឆ្នាំនោះទេ មានតែថយចុះ ។
គ្រានោះ លោកឧកញ៉ាមានប្រសាសន៍ថា ៖« យើងឃើញថា កំណើននៃការនាំចេញអង្ករក្នុងខែមករា កើនឡើងយ៉ាងគំហុករហូតដល់២៨% ហើយយើងគិតថា នៅខែបន្ទាប់អាចចុះវិញ និងខែមីនា អាចកើនឡើងវិញ ព្រោះវាជាបរិយាកាសមួយដែលត្រូវតែរត់ទៅតាមផ្លូវហ្នឹង ៕
ចែករំលែកព័តមាននេះ