រាជធានីភ្នំពេញ ៖ តុល្យភាពការងារដែលទទួលបានប្រាក់ឈ្នួល និងការថែទាំគ្រួសារ គឺជាបញ្ហាប្រឈមដ៏ចម្បងមួយសម្រាប់កម្មករនិយោជិតជាស្ត្រីក្នុងវិស័យកាត់ដេរនៅកម្ពុជា ប៉ុន្តែការយកចិត្តទុកដាក់ក្នុងការដោះស្រាយបញ្ហាជាក់ស្តែងដើម្បីលើកកម្ពស់សមភាពយេនឌ័រ គឺល្អចំពោះការងារ ក៏ដូចជាសម្រាប់កម្មករ គ្រួសារ និងសហគមន៍របស់ពួកគេ។…
រាជធានីភ្នំពេញ ៖ តុល្យភាពការងារដែលទទួលបានប្រាក់ឈ្នួល និងការថែទាំគ្រួសារ គឺជាបញ្ហាប្រឈមដ៏ចម្បងមួយសម្រាប់កម្មករនិយោជិតជាស្ត្រីក្នុងវិស័យកាត់ដេរនៅកម្ពុជា ប៉ុន្តែការយកចិត្តទុកដាក់ក្នុងការដោះស្រាយបញ្ហាជាក់ស្តែងដើម្បីលើកកម្ពស់សមភាពយេនឌ័រ គឺល្អចំពោះការងារ ក៏ដូចជាសម្រាប់កម្មករ គ្រួសារ និងសហគមន៍របស់ពួកគេ។ ទាំងនេះគឺជាលទ្ធផលរកឃើញសំខាន់ៗ នៃរបាយការណ៍មួយដែលចេញផ្សាយនៅថ្ងៃទី៧ មីនា ដោយរោងចក្រកាត់ដេរកាន់តែប្រសើរនៅកម្ពុជា (ILO-BFC) ជាកម្មវិធីរួមគ្នារបស់អង្គការពលកម្មអន្តរជាតិខាងការងារនៃអង្គការសហប្រជាជាតិ និងសាជីវកម្មហិរញ្ញវត្ថុអន្តរជាតិ ដែលជាសមាជិកនៃធនាគារពិភពលោក ។
ការស្រាវជ្រាវមួយដែលមានចំណងជើងថា «ដើម្បីឆ្ពោះទៅរកសមភាពយេនឌ័រ» បានវាយតម្លៃទិន្នន័យពីរោងចក្រកាត់ដេរចំនួន៣៩៥ ពីខែឧសភា ឆ្នាំ២០១៦ ដល់ខែមេសា ឆ្នាំ២០១៧ ទាក់ទងនឹងបញ្ហាយេនឌ័រ ការរើសអើង ការទទួលបានប្រាក់ឈ្នួល ការថែទាំ ការបញ្ចេញមតិ ភាពជាតំណាងអ្នកដឹកនាំ និងការកសាងជំនាញ ។ ក្នុងការសិក្សានេះបានរកឃើញថា កម្មករមានច្រើនជាង៦៥ម៉ឺន ក្នុងនោះ៨៥% គឺជាស្ត្រីនៅក្នុងវិស័យកាត់ដេរកម្ពុជា ហើយពួកគេមានតំណាង ឬតួនាទីជាអ្នកដឹកនាំតិចតួច។ ជាមួយគ្នានេះដែរ ពួកគេប្រឈមនឹងបញ្ហាការងារនៅក្នុងរោងចក្រ ខណៈពួកគេក៏មានតួនាទីមួយទៀតជាអ្នកផ្តល់ការថែទាំទៅដល់សមាជិកនៅក្នុងក្រុមគ្រួសារ ។
របាយការណ៍នេះបានបង្ហាញពីមូលហេតុទាក់ទងនឹងបញ្ហាប្រឈមនានានៃការងារប្រចាំថ្ងៃ និងការថែទាំក្នុងគ្រួសារ ដែលបណ្តាលឲ្យស្ត្រីមានឱកាសតិចតួចក្នុងការឡើងតំណែង និងការអភិវឌ្ឍជំនាញរបស់ពួកគេ ។ លទ្ធផលនេះក៏បានបង្ហាញពីកម្រិតខ្ពស់នៃការអនុលោមតាមច្បាប់ស្តីពីស្ត្រីមានផ្ទៃពោះ និងការសម្រាកលំហែមាតុភាព ។
របាយការណ៍ក៏បានគូសបញ្ជាក់អំពីផលលំបាករបស់ស្ត្រីក្នុងការទទួលបានការថែទាំកុមារគ្រប់គ្រាន់ បន្ទាប់ពីវិលត្រឡប់ពីការឈប់សម្រាកលំហែមាតុភាព ។
លោកស្រី អិស្តើរ ហើមិនស៍ ប្រធានគម្រោងរោងចក្រកាន់តែប្រសើរនៅកម្ពុជា មានប្រសាសន៍ថា ៖« បញ្ហាទាំងនេះមិនត្រឹមតែទាក់ទងនឹងការងាររបស់ស្ត្រីប៉ុណ្ណោះទេ ប៉ុន្តែថែមទាំងសម្រាប់សុខុមាលភាពរបស់កូនៗពួកគេទៀតផង ។ យើងយល់ថា វាមិនមែនជាបញ្ហាតែមួយគត់សម្រាប់ប្រទេសកម្ពុជាទេ ប៉ុន្តែតាមរយៈលទ្ធផលនៃការសិក្សានេះ យើងឃើញថា ការឆាប់វិលត្រឡប់ចូលធ្វើការវិញក្រោយពេលសម្រាលកូន និងកង្វះខាតសម្ភារថែទាំកុមារ មានន័យថា ស្ត្រីជាញឹកញាប់់មិនអាចបំបៅដោះកូនរបស់ពួកគេក្នុងអំឡុងពេលធ្វើការនៅក្នុងរោងចក្រឡើយ » ។
របាយការណ៍នេះគាំទ្រលទ្ធផលនៃរបាយការណ៍ថ្មីៗរបស់អង្គការមាតាបិតា នៃកម្មវិធីការងារកាន់តែប្រសើរ (Better Work) ដែលបានរកឃើញថា ការបង្កើនចំនួនស្ត្រីក្នុងតំណែងជាអ្នកដឹកនាំ គឺអាចជួយកាត់បន្ថយបញ្ហាបៀតបៀនផ្លូវភេទ និងការរើសអើងនៅកន្លែងធ្វើការ។ តំណាងស្ត្រីក្នុងតំណែងជាអ្នកដឹកនាំ ក៏ចាំបាច់នៅក្នុងតួនាទីសហជីព ព្រោះមេដឹកនាំជាស្ត្រីច្រើនអាចជួយដោះស្រាយបញ្ហាជាក់លាក់របស់ស្ត្រីបាន ហើយវាក៏រួមចំណែកកាត់បន្ថយនូវផ្នត់គំនិតដែលថា មានតែបុរសទេ ដែលអាចដឹកនាំការងារទាំងអស់នេះបាន ។
របាយការណ៍អនុលោមយេនឌ័របានកំណត់យុទ្ធសាស្ត្រយេនឌ័រថ្មីនៅកម្ពុជា ដែលជំរុញយុទ្ធសាស្ត្រយេនឌ័រជាសកលនៃប្រទេសទាំង៧ ក្នុងការបង្កើតកម្មវិធីការងារកាន់តែប្រសើរ ។ យុទ្ធសាស្ត្រនេះ មានគោលបំណងពង្រឹងដល់ដៃគូពាក់ព័ន្ធលើវិស័យសាធារណៈ និងឯកជន ដើម្បីដោះស្រាយបញ្ហាយេនឌ័រតាមវិធី៤យ៉ាងគឺ ៖ ១-កាត់បន្ថយការរើសអើង និងការបៀតបៀនផ្លូវភេទ ២-លើកកម្ពស់សុខភាពបន្តពូជ សិទ្ធិ ការការពារមាតុភាព និងតុល្យភាពរវាងការងារ និងការរស់នៅ ៣-បង្កើនតំណាងរបស់ស្ត្រីនៅក្នុងគណៈកម្មការនិយោជិត និងនិយោជក អង្គការនានា និង៤-ជួយស្ត្រីបង្កើតឱកាសការងារឲ្យកាន់តែច្រើន ។
លោកស្រី អិស្តើរ ហើមិនស៍ ប្រធានគម្រោងរោងចក្រកាត់ដេរកាន់តែប្រសើរនៅកម្ពុជា បានបញ្ជាក់ថា ៖« បទពិសោធន៍ជាង១៥ឆ្នាំរបស់យើងដែលធ្វើការនៅក្នុងវិស័យឧស្សាហកម្មកាត់ដេរនៅកម្ពុជា បានបង្ហាញថា នៅពេលបុរស និងស្ត្រី ត្រូវបានទទួលយកចិត្តទុកដាក់ដូចៗគ្នានៅកន្លែងធ្វើការ គឺវាមិនត្រឹមតែផ្តល់អត្ថប្រយោជន៍យ៉ាងច្រើនដល់ស្ត្រី និងគ្រួសាររបស់ពួកគេប៉ុណ្ណោះទេ ប៉ុន្តែក៏ជួយជំរុញដល់សង្វាក់ផលិតកម្មរបស់រោងចក្រ និងប្រាក់ចំណេញបានយ៉ាងច្រើនផងដែរ ។ ដូច្នេះ របាយការណ៍នេះនឹងផ្តល់ជាមូលដ្ឋានដល់រាជរដ្ឋាភិបាល និយោជិក និងកម្មករ ដើម្បីធ្វើការផ្លាស់ប្តូរទាំងនៅក្នុងគោលការណ៍ និងនៅតាមរោងចក្រ ដែលនឹងអនុញ្ញាតឲ្យស្ត្រីឈានដល់សក្តានុពលពេញលេញរបស់ពួកគេ » ។
គម្រោងរោងចក្រកាន់តែប្រសើរនៅកម្ពុជា គឺជាគម្រោងប្រចាំនៃកម្មវិធីការងារកាន់តែប្រសើរ ដែលជាកិច្ចសហការរវាងអង្គការពលកម្មអន្តរជាតិខាងការងាររបស់អង្គការសហប្រជាជាតិ និងសាជីវកម្មហិរញ្ញវត្ថុអន្តរជាតិ ដែលជាសមាជិកនៃធនាគារពិភពលោក។ កម្មវិធីការងារកាន់តែប្រសើរធ្វើការរួមគ្នាជាមួយដៃគូពាក់ព័ន្ធគ្រប់កម្រិតក្នុងវិស័យឧស្សាហកម្មកាត់ដេរ ដើម្បីលើកកម្ពស់លក្ខខណ្ឌការងារ និងបង្កើនការប្រកួតប្រជែងនៅក្នុងវិស័យមួយនេះ ។ បច្ចុប្បន្ន យើងកំពុងអនុវត្តកម្មវិធីរបស់យើងនៅក្នុងប្រទេសចំនួន៧ ដែលមានកម្មករជាង២លាននាក់ ។ កម្មវិធីរបស់យើងបានបង្កើតការផ្លាស់ប្តូរយូរអង្វែង តាមរយៈការចុះត្រួតពិនិត្យ លក្ខខណ្ឌការងារ ការផ្តល់វគ្គបណ្តុះបណ្តាល ការតស៊ូមតិ និងការសិក្សាស្រាវជ្រាវ ។
សាកលវិទ្យាល័យ Tufts គឺជាស្ថាប័នស្រាវជ្រាវឯករាជ្យរបស់កម្មវិធីការងារកាន់តែប្រសើរ បានបង្ហាញកម្មវិធីជាសកល ដែលក្នុងនោះគម្លាតប្រាក់ឈ្នួលរបស់បុរស និងស្ត្រី មានការធ្លាក់ចុះចំនួន១៧%, ករណីបៀតបៀនផ្លូវភេទចំនួន១៨% និងកំណើនចំនួនរបស់ស្ត្រីក្នុងការថែទាំមុនពេលសម្រាលកូន មាន២៦%។ របាយការណ៍ក៏បានបង្ហាញផងដែរថា កន្លែងធ្វើការដោយគ្មានការបៀតបៀនផ្លូវភេទនាំឲ្យមានប្រាក់ចំណូលខ្ពស់ ហើយការងារដែលមានគុណភាពសម្រាប់ស្ត្រី បានរួមចំណែកធ្វើឲ្យពួកគេមានសុខភាពល្អ ជីវភាពរស់នៅនៃសមាជិកគ្រួសារ និងការសិក្សារបស់កូនពួកគេកាន់តែប្រសើរឡើង៕
ចែករំលែកព័តមាននេះ