ខេត្តក្រចេះ ៖ ស្នូរកាំភ្លើងរាប់សិបគ្រាប់បានផ្ទុះឡើង ក្នុងហេតុការណ៍ប្រឆាំងចំពោះការតវ៉ារបស់ប្រជាពលរដ្ឋមួយក្រុម ដែលមានគ្នីគ្នារហូតដល់ជាង២០០នាក់ ក្រោយពេលមានប្រតិបត្តិការចុះបង្ក្រាបការសាង សង់លំនៅឋានអនាធិបតេយ្យ និងកាន់កាប់ដីសម្បទានសេដ្ឋកិច្ចរបស់ក្រុមហ៊ុនមេមត់ ។ ហេតុការណ៍នេះបានកើតឡើងនៅវេលាម៉ោង១១ព្រឹក ធ្វើឲ្យចរាចរណ៍លើកំណាត់ផ្លូវជាតិលេខ៧៦ ត្រូវកាត់ផ្តាច់ទាំងស្រុងរហូតដល់រសៀលថ្ងៃដដែលទើបស្ថានការណ៍បានស្ងប់ស្ងាត់ ។
ប្រភពបានឲ្យដឹងថា សកម្មភាពផ្ទុះការតវ៉ានេះ ភាគីខាងអ្នកចាប់ដីបានប្រដាប់ដោយកាំបិត ចំពាមប្រើគ្រាប់ដែក និងកាំភ្លើងកែច្នៃ ឯស្ត្រីភេទខ្លះ កាន់រូបថតសម្តេចតេជោ និងសម្តេចកិត្តិព្រឹទ្ធបណ្ឌិតផងដែរ ។ រីឯកម្លាំងអាជ្ញាធរ និងសមត្ថកិច្ចប្រដាប់ដោយអាវុធនៅក្នុងដៃ និងបានបាញ់គំរាមរាប់សិបគ្រាប់បង្កឲ្យមាន ការភ្ញាក់ផ្អើលយ៉ាងខ្លាំង ។ ព្រឹត្ដិការណ៍នេះ បានកើតឡើងបន្ទាប់ពីសមត្ថកិច្ចចម្រុះក្រោមការដឹកនាំរបស់លោក ជា សុភ័ក្រ ព្រះរាជអាជ្ញារងអមសាលាដំបូងខេត្តក្រចេះ ចុះទៅរុះរើសំណង់តូចៗរបស់ពួកគេនៅក្នុងក្រុមហ៊ុនចំការកៅស៊ូមេមត់ នាភូមិសាស្ត្រឃុំ២ធ្នូ ស្រុកស្នូល ខេត្តក្រចេះ ។ ទោះបីជាបែបណា អាជ្ញាធរខេត្តក្រចេះបានប្រកាសទាត់ចោលភ្លាមៗចំពោះព័ត៌មានដែលបានផ្សាយថា ការប៉ះទង្គិចគ្នានេះបណ្តាលឲ្យ៦នាក់ស្លាប់ និងរបួសជាង៤០នាក់ផ្សេងទៀត ។ ជាព័ត៌មាន ជំហ៊ានដំបូងគេមិនដឹងថា មានការរងគ្រោះប៉ុន្មាននាក់ ក្នុងហេតុការណ៍ប្រឈមមុខគ្នានេះទេ ។
ប្រភពនានានៅកន្លែងកើតហេតុបានឲ្យដឹងថា ក្រុមអ្នកចាប់ដីមានការប្រមូលផ្តុំគ្នារហូតដល់ទៅបីទីតាំងនៅលើផ្លូវជាតិលេខ៧៦ ដែលស្ថានភាពប្រឈមរវាងក្រុមបាតុករនឹងអាជ្ញាធរនេះ ក៏បានឈានដល់ចំណុចក្តៅ រហូតមានអំពើហិង្សាកើតឡើង បានឈានទៅដល់ការផ្ទុះអាវុធនិងមានលេចឮថា ករណីផ្ទុះអាវុធនោះ បានបណ្តាលឲ្យមានការរងរបួស និងមានមនុស្សម្នាក់បានស្លាប់នាព្រឹត្តិការណ៍នោះផងដែរ តែមិនទាន់អាចសុំការបញ្ជាក់បានភ្លាមៗនោះទេជាព័ត៌មានដែលច្របូកច្របល់ក្នុងហេតុការណ៍ ។ ប្រភពបានបញ្ជាក់ថា ក្រុមប្រជាពលរដ្ឋ បានប្រើជំពាមគ្រាប់ដែក កាំបិត និងកាំភ្លើងកែច្នៃ ហើយបាញ់មកលើកម្លាំងសមត្ថកិច្ចបណ្ដាលឲ្យរងរបួស ហើយពេលនោះកម្លាំងសមត្ថកិច្ចដែលភាគច្រើនជាទាហាន បានបាញ់ជាច្រើនគ្រាប់ឡើងលើគឺបាញ់មេឃជាការគំរាមវិញផងដែរ រហូតគ្រប់គ្រងសភាពការណ៍បាន និងបំបែកការតវ៉ានេះ ។
ព័ត៌មានដែលទទួលបាននាវេលាម៉ោង៦ល្ងាចថ្ងៃដដែលពីអភិបាលស្រុកស្នួល លោក គង់ គឹមនី បានឲ្យដឹងថា នៅក្នុងហេតុការណ៍ប៉ះទង្គិចគ្នាមួយប្រាវនេះបណ្ដាលឲ្យកម្លាំងសមត្ថកិច្ចចំនួន៧នាក់រងរបួសភាគីពលរដ្ឋ២នាក់រងរបួស និងពលរដ្ឋ៧នាក់ផ្សេងទៀតត្រូវបានឃាត់ខ្លួនជាបណ្ដោះអាសន្ន តែមិនមានមនុស្សណាម្នាក់ស្លាប់នោះទេ ។
ទោះជាយ៉ាងណា រហូតដល់ល្ងាចថ្ងៃដដែល ក្រុមប្រជាពលរដ្ឋបានរំសាយបន្តិចម្តងៗ ក្រោយមានការឃាត់ខ្លួនមនុស្សមួយចំនួនហើយកំណាត់ផ្លូវជាតិលេខ៧៦ ត្រូវបានបើកដំណើរការវិញ បន្ទាប់ពីក្រុមអ្នកតវ៉ាបានបិទអស់រយៈពេលកន្លះថ្ងៃ ។ ចំណែកអាជ្ញាធរស្រុកស្នូល បានអះអាងថា ខ្លួននឹងបន្តការជួបដោះស្រាយគ្នាជាមួយបងប្អូនប្រជាពលរដ្ឋដែលកំពុងជួបប្រទះបញ្ហាដីធ្លីជាមួយក្រុមហ៊ុន ។ប្រភពមួយទៀតឲ្យដឹងថា ប្រជាពលរដ្ឋបាននាំគ្នាតវ៉ារយៈពេល៣ថ្ងៃមកហើយ ប៉ុន្តែនៅថ្ងៃចុងក្រោយនេះ ពួកគេបាននាំគ្នាតវ៉ាដោយបិទផ្លូវ បន្ទាប់ពីមានការចូលមកដុតបំផ្លាញខ្ទមរបស់ពួកគេ ។ ព័ត៌មានលម្អិតពិស្តារច្បាស់លាស់នឹងផ្សាយជូននៅលេខបន្ទាប់នេះបន្ថែម ជុំវិញបាតុភាពប៉ះទង្គិចគ្នានេះ ៕
ចែករំលែកព័តមាននេះ