ខេត្តបាត់ដំបង ៖ មេកន្ទុយលេខ២នាក់ និងអ្នកចាក់២នាក់ផង ត្រូវកម្លាំងនគរបាលក្រុងបាត់ដំបងឃាត់ខ្លួនកាលពីវេលាម៉ោង០២ និង៣០នាទីរសៀលថ្ងៃទី០៦ មីនា ពេលកំពុងកត់និងចាក់កន្ទុយលេខ នៅក្នុងតូបលក់ដូរមួយកន្លែង ក្បែរចិញ្ចើមផ្លូវ…
ខេត្តបាត់ដំបង ៖ មេកន្ទុយលេខ២នាក់ និងអ្នកចាក់២នាក់ផង ត្រូវកម្លាំងនគរបាលក្រុងបាត់ដំបងឃាត់ខ្លួនកាលពីវេលាម៉ោង០២ និង៣០នាទីរសៀលថ្ងៃទី០៦ មីនា ពេលកំពុងកត់និងចាក់កន្ទុយលេខ នៅក្នុងតូបលក់ដូរមួយកន្លែង ក្បែរចិញ្ចើមផ្លូវ ដែលស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខណៈមានការបែកធ្លាយថា «មេកន្លុយលេខនេះបានឱ្យលុយរាល់ខែទៅនគរបាលក្រុង តែអ្នកចុះចាប់ បែរជាមុខក្រុមផ្សេង» ។
បើតាមសេចក្ដីរាយការណ៍បានឱ្យដឹងថា កិច្ចប្រតិបត្តិការនេះ បានធ្វើឡើងដោយកម្លាំងនគរបាលមួយក្រុម ដែលដឹកនាំដោយលោកស៊ន កុសល អធិការរងក្រុងបាត់ដំបង ។ កិច្ចប្រតិបត្តិការនេះ សមត្ថកិច្ចបានឃាត់ខ្លួនស្ត្រី២នាក់ និងបុរស២នាក់ ថែមទាំងដកហូតបាននូវវត្ថុតាងមួយចំនួនផងដែរ ។ បើតាមរបាយការណ៍របស់លោកស៊ន កុសល អធិការរងក្រុងបាត់ដំបង បានឱ្យដឹងទៀតថា ជនប្រុស-ស្រីទាំង៤នាក់ ដែលឃាត់ខ្លួនពាក់ព័ន្ធនឹងបទល្មើសល្បែងស៊ីសងខាងលើនេះមាន ១-ឈ្មោះសៀង វ៉ាន់ទីន ភេទស្រី អាយុ៣៥ឆ្នាំ (ជាមេកន្ទុយលេខ ដែលមានស្វាមីជាមន្ត្រីកងរាជអាវុធហត្ថខេត្ត) ២-ឈ្មោះនិល ណារ៉ាន់ ភេទស្រី អាយុ៣៤ឆ្នាំ អ្នកជួយកត់កន្ទុយលេខ ៣-ឈ្មោះអ៊ុត វណ្ណៈ ភេទប្រុស អាយុ៣៩ឆ្នាំ និង៤-ឈ្មោះវង្ស ខាន់ ប្រុសអាយុ៥៩ឆ្នាំ ទាំង២នាក់នេះ ជាអ្នកចាក់កន្ទុយលេខ ។
បើតាមសមត្ថកិច្ចបានប្រាប់ថា ម្ចាស់តូបឈ្មោះសៀង វ៉ាន់ទីន ដែលមានប្ដីជាមន្ត្រីកងរាជអាវុធហត្ថនេះ ធ្លាប់ត្រូវកម្លាំងសមត្ថកិច្ចបង្ក្រាបយកទៅអប់រំ និងធ្វើកិច្ចសន្យាប៉ុន្មានលើកហើយ តែស្ត្រីរូបនេះមិនរាងចាល និងមិនគោរពតាមកិច្ចសន្យានោះទេ ដែលទំនងអាងអំណាចប្ដី ។ សមត្ថកិច្ចបានបញ្ជាក់ថា ពេលត្រូវកម្លាំងនគរបាលចុះបង្ក្រាបខាងលើនេះ ស្ត្រី២នាក់នេះកំពុងអង្គុយកត់កន្ទុយលេខនៅខាងក្នុងតូប ហើយបានបិទទ្វារជាប់ មិនព្រមចេញក្រៅតូបទេ បើទោះជាសមត្ថកិច្ចព្យាយាមពន្យល់ និងទាមទាឲ្យបើកទ្វាតូបក្ដី តែបន្តិចក្រោយមក ទើបព្រមបើកទ្វាចេញក្រៅ ខណៈគេឃើញវត្តមានប្ដីនៅទីនោះដែរ ។ ប៉ុន្តែស្របពេលសមត្ថកិច្ចកំពុងបង្ក្រាបអ្នកកត់កន្ទុយលេខខាងលើនេះ ស្រាប់តែមានព័ត៌មានមួយបានបែកធ្លាយពីសាច់ញាតិថា «អ្នកកត់កន្ទុយលេខនេះ បានបង់លុយឱ្យមន្ត្រីនគរបាលក្រុងរៀងរាល់ខែ ក្នុង១ខែ១០ម៉ឺនរៀល ដែលមានមន្ត្រីម្នាក់ឈ្មោះវុទ្ធី ជាអ្នកប្រមូលសំណែនរាល់ខែនេះ តែពេលចុះបង្ក្រាបបែរជាលេចមុខក្រុមផ្សេងទៅវិញ ?» ។
ជុំវិញដែរថា មន្ត្រីនគរបាលក្រុងម្នាក់ឈ្មោះវុទ្ធី ជាអ្នកដើរប្រមូលលុយសំណូកពីបទល្មើសកន្ទុយលេខខាងលើនេះ កោះសន្តិភាពមិនអាចទំនាក់ទំនងសុំការបំភ្លឺពីមន្ត្រីរូបនេះបានទេ នៅព្រឹកថ្ងៃទី០៧ មីនា នេះ ។
ដោយឡែក ពាក់ព័ន្ធនឹងការបង្ក្រាបមេកន្ទុយលេខ ដែលជាគ្រួសារមន្ត្រីកងរាជអាវុធហត្ថម្នាក់ខាងលើនេះដែរ លោកឧត្តមសេនីយត្រី ជេត វណ្ណនី ស្នងការរងខេត្ត បានមានប្រសាសន៍ថា ស្ត្រីមេកន្ទុយលេខខាងលើនេះ ពិតជាធ្លាប់ត្រូវបានបង្ក្រាបមែន តែគាត់មិនបានបញ្ឈប់សកម្មភាពតាមកិច្ចសន្យាទេ ទើបត្រូវបានកម្លាំងអធិការក្រុងបង្ក្រាបជាថ្មីទៀត ។ ប៉ុន្តែលោកស្នងការរងបានបញ្ជាក់ថា តាមគោលការណ៍របស់លោកស្នងការខេត្ត គ្រាន់តែឱ្យធ្វើការអប់រំ និងធ្វើកិច្ចសន្យាជាលើកចុងក្រោយ ដើម្បីឲ្យមេកន្ទុយលេខរូបនេះ
បញ្ឈប់សកម្មភាពរបស់ខ្លួន តែស្ត្រីរូបនេះ អាចប្រឈមមុខនឹងផ្លូវច្បាប់ ដរាបណាដែលគាត់មិនព្រមបញ្ឈប់ ហើយត្រូវបានបង្ក្រាបជាថ្មីទៀតនោះ ។
ចែករំលែកព័តមាននេះ