រាជធានីភ្នំពេញ ៖ ពេលចាប់ផ្តើមដំណើរការថតភាពយន្ត ម្តងៗបណ្តាផលិតកម្មនានាមិនភ្លេចទេ ធ្វើពិធីក្រុងពលី ។ ពិធីនោះគេនាំតួសម្តែង ក្រុមការងារទៅសំពះបួងសួងសុំសេចក្តីសុខ ដោយរៀបគ្រឿងរណ្តាប់មានបាយសីជាដើម ។…
រាជធានីភ្នំពេញ ៖ ពេលចាប់ផ្តើមដំណើរការថតភាពយន្ត ម្តងៗបណ្តាផលិតកម្មនានាមិនភ្លេចទេ ធ្វើពិធីក្រុងពលី ។ ពិធីនោះគេនាំតួសម្តែង ក្រុមការងារទៅសំពះបួងសួងសុំសេចក្តីសុខ ដោយរៀបគ្រឿងរណ្តាប់មានបាយសីជាដើម ។
ទំនៀមរៀបចំពិធីក្រុងពលីនេះ ជាពិធីសំខាន់មិនអាចខ្វះបានក្នុងផ្នត់គំនិតតួសម្តែង ចាងហ្វាងផលិតកម្ម អ្នករួមសហការ ព្រោះបើមិនបានគោរពតាមលំអាននេះទេ ពួកគេចិត្តមិនស្ងប់ ឬខ្លាចមានឧបទ្ទវហេតុណាមួយកើតឡើង ។
លោកហ៊ួរ សុផល ចាងហ្វាងផលិតកម្មក្លាស៊ីក កាលពីពេល ថ្មីៗកន្លងមកលើកឡើងថា «បណ្តាខ្សែភាពយន្តក្រោមការផលិតរបស់លោកជាច្រើនមកហើយដែលបានចាប់ផ្សាយនៅតាមរោងកុនហើយសុទ្ធតែឆ្លងកាត់ការរៀបចំពិធីក្រុងពលីត្រឹមត្រូវតាមជំនឿរបស់ខ្មែរយើង ។ ធ្វើនេះដើម្បីឱ្យពេលថតសម្តែងបានដូចចិត្ត កុំឱ្យខុសព្រោះរឿងខ្លះថតតាមខេត្ត ឆ្ងាយៗ ក្នុងព្រៃជាដើមរមែងមានបារមីនៅទីនោះ ។ កុំឱ្យខុសយើងមានតែសុំសមាធិបួងសួងយកអ្វីដែលល្អឱ្យបានសុខសប្បាយ ។ ណាមួយទៀតរឿងខ្លះថតមានជាតួខ្មោចរឹតតែធ្វើឱ្យយើងមានការប្រុងប្រយ័ត្នឱ្យតួអង្គនោះត្រូវតែមកបួងសួងថ្ងៃក្រុងពលីកុំបីខាន នោះទើបស្ងប់ចិត្ត» ។
ដោយឡែកអ្នកដឹកនាំរឿង និងជាចាងហ្វាងផលិតកម្មFCI លោកគាំ ចន្ឋីបានថ្លែងថា ជាទម្លាប់ចាំបាច់ណាស់ត្រូវតែមានរៀបចំ ឬប្រារព្ធពិធីក្រុងពលីដ៏មានសារសំខាន់នេះ ។ បើថតភាពយន្តមិនបានរៀបចំក្រុងពលីទេ គឺហាក់ដូចជាធ្វើឱ្យយើងនៅមិនសុខ ។ ជាធម្មតាបារមីគឺអាចមានមែន ជាពិសេសការថតកុនមានគ្រប់រូបភាព មានទាំងការថតជាតួខ្មោចការថតឈុតឆាកវាយតប់ កាប់ចាក់ និងខ្លះទៀតថតដល់ខេត្តឆ្ងាយកាត់វាលកាត់ព្រៃបើមិនអុជធូបសុំគេទេនោះមិនបានឡើយ ។
បើទោះជាត្រូវចំណាយប្រាក់រៀបសែនពលី តែលោកគាំ ចន្ធី ថ្លែងថា «គឺដាច់ខាតខ្ញុំសុខចិត្តចំណាយ បើគ្រាន់តែរឿងសុំសេចក្តីសុខនេះ ។ ម្ល៉ោះហើយទោះតួរវល់ ឬទៅដល់ណាក៏ដោយខ្ញុំដាច់ខាតត្រូវតែប្រមូលឱ្យគ្រប់គ្នាមកសំពះអុជធូបថ្ងៃក្រុងពលីនេះ »។
លោកអ៊ីន សុភិន ចាងហ្វាងផលិតកម្មមហាហង្សថ្លែងថា «ការប្រារព្ធពិធីក្រុងពលីក្នុងវិស័យកុនខ្មែរនេះបានចាក់ដោតក្នុងជំនឿពុទ្ឋបរិស័ទយើងខ្លាំងណាស់ មិនថាតែការថតកុននោះទេ សូម្បីតែការសាងសង់ផ្ទះ ឬការសាងអគារតូចធំ រូបសំណាកអ្វី ក៏ត្រូវចាំបាច់រៀបចំពិធីសែនព្រេនបួងសួងសុំសេចក្តីសុខថ្វាយដល់វត្ថុសក្តិសិទ្ធិលើលោកដើម្បីងាកក្រោយជូនពរជ័យឲ្យកម្មវិធីប្រព្រឹត្តដោយជោគជ័យកុំបីជួបរឿងអ្វីមិនល្អ ។ ដូចនេះទោះជារវល់បែបណាគឺខ្ញុំមិនរំលងកម្មវិធីសំពះក្រុងពលីរបស់ខ្មែរយើងនេះទេ»។
អ្នកនាងសុខ សោម៉ាវត្តី ដែលជាតួអង្គក្នុងរឿងជាច្រើននិយាយថា «ទោះនាងខ្ញុំរវល់បែបណាក្តីត្រូវតែចូលរួមពិធីក្រុងពលី ។ នាងខ្ញុំមានភាពហត់នឿយការងារ ក៏ដាច់ខាតត្រូវតែមកចូលរួមសំពះដឹងគុណស្មឹងស្មាធិ៍សុំសេចក្តីសុខដល់បារមីនានា ក្នុងន័យថតសម្តែងទៅជួបប្រទះតែរឿង ល្អៗ ព្រោះរឿងខ្លះថតមានទាំងតួខ្មោច បើមិនសុំគេទេគឺមិនល្អឡើយ » ៕
ចែករំលែកព័តមាននេះ