រាជធានីភ្នំពេញ ៖ ឃាតកម្មមួយដែលកើតឡើងកាលពីចុងឆ្នាំ២០១៥ ត្រូវបានប្រជាពលរដ្ឋប្រទះឃើញសាកសព នៅសល់តែគ្រោងឆ្អឹងនិងសម្លៀកបំពាក់ នៅចំណុចក្នុងព្រៃឫស្សីចម្ងាយពីផ្លូវលំប្រហែល១៥០ម៉ែត្រ ស្ថិតក្នុងភូមិតាឡឹក ឃុំត្រពាំងវែង ស្រុកកណ្តាលស្ទឹង កាលពីថ្ងៃទី៣១ ខែមករា ឆ្នាំ២០១៦ វេលាម៉ោង១១និង១៥នាទី ។ ចំណែកជនសង្ស័យម្នាក់ឈ្មោះ ប៉ាត់ តុល ក៏ត្រូវចាប់ដាក់ពន្ធនាគារភ្លាមៗពីពេលនោះមកដែរ ដោយសមត្ថកិច្ចប៉ូលិស ។ រហូតដល់ថ្ងៃទី១៤ កុម្ភៈកន្លងទៅនេះ កងរាជអាវុធហត្ថខេត្តកណ្តាល សហការជាមួយអាវុធហត្ថខេត្តបន្ទាយមានជ័យ និងខេត្តតាកែវ ដឹកនាំដោយមន្ត្រីជំនាញកងរាជអាវុធហត្ថលើផ្ទៃប្រទេសបានបំបែកសំណុំរឿងករណីឃាតកម្មនៅស្រុកកណ្តាលស្ទឹង បន្ទាប់ពីធ្វើការសុើបអង្កេតស្រាវជ្រាវអស់រយៈពេលជាង២ឆ្នាំមកនោះ ។
មន្ត្រីជាន់ខ្ពស់កងរាជអាវុធហត្ថខេត្តបានប្រាប់ឱ្យដឹងថា ករណីនេះសមត្ថកិច្ចជំនាញធ្វើការត្រួតពិនិត្យសាកសពធ្វើកោសល្យវិច័យដោយមានការចូលរួមពីអាជ្ញាធរមូលដ្ឋានពាក់ព័ន្ធ តាមការពិនិត្យកន្លែងកើតហេតុ និងស្រាវជ្រាវតាមការអះអាងបញ្ជាក់ពីឈ្មោះ ជុច សេង (ឪពុកជនរងគ្រោះ) រស់នៅភូមិកុកទឹល ឃុំត្បែង ស្រុកកណ្តាលស្ទឹង យើងធ្វើការសន្និដ្ឋានថា ជាករណីឃាតកម្ម (ប្លន់សម្លាប់យកម៉ូតូ) ។ សពជនរងគ្រោះមានឈ្មោះ សេង ប៊ុនលី ភេទប្រុស អាយុ២២ឆ្នាំ រស់នៅក្នុងបន្ទុក ដោយ សំអាងលើសម្លៀកបំពាក់និងខ្សែក្រវាត់ ហើយគាត់ជាឪពុកសពបាត់កូនឈ្មោះ សេង ប៊ុនលី តាំងពីថ្ងៃអុំទូក២០១៥មកម្ល៉េះ ។
ករណីនេះដែរលោក សំ តុលា មេបញ្ជាការ អាវុធហត្ថខេត្តកណ្តាល បានដឹកនាំបញ្ជាផ្ទាល់ និងចុះអង្កេតស្រាវជ្រាវយ៉ាងយកចិត្តទុកដាក់បំផុតដោយលោកវរសេនីយ៍ឯក ទូច អីុណាន មេបញ្ជាការរងទទួលផែនយុត្តិធម៌ រហូតឈានដល់ការកំណត់មុខសញ្ញាជនសង្ស័យបានមួយចំនួន ។ ក្រោមបញ្ជានិងការយកចិត្តទុកដាក់របស់លោកមេបញ្ជាការ កម្លាំងជំនាញអាវុធហត្ថ ខេត្តកណ្តាល និងស្រុកកណ្តាលស្ទឹង បានពុះពារស្វែងរកមុខសញ្ញាជនសង្ស័យ រហូតបានស្នើសុំដីកាបញ្ជាឲ្យចូលខ្លួនពីលោកព្រះរាជអាជ្ញា ដើម្បីស្វែងរកជនសង្ស័យឈ្មោះ យឺន ចន្ទី ហៅទី ហៅរ៉ា ព្រមទាំងបានជូនដំណឹងផ្សព្វផ្សាយដីកា និងរូបថតឈ្មោះ យឺន ចន្ទី ទៅគ្រប់អង្គភាពកងរាជអាវុធហត្ថថែមទៀតផង ។ ប៉ុន្តែក្នុងដំណាក់ការអនុវត្តន៍ដីកាបញ្ជាឲ្យចូលខ្លួននេះ កម្លាំងជំនាញរកពុំឃើញឈ្មោះ យឺន ចន្ទី ឡើយដោយគេបានគេចខ្លួនពីមូលដ្ឋាន ទៅរស់នៅសម្ងំលាក់ខ្លួនកន្លែងផ្សេង ។
លុះមកដល់ថ្ងៃទី១៤ កុម្ភៈ ឆ្នាំ២០១៨ ឈ្មោះ យឺន ចន្ទី ហៅ ទី ដែលបានរត់គេចមកលាក់ខ្លួននៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ត្រូវបានកម្លាំងអាវុធហត្ថក្រុងប៉ោយប៉ែត ចាប់ឃាត់ខ្លួន ពាក់ព័ន្ធករណីហិង្សាដោយចេតនា (ជាក់ស្តែង) និងដោយបានពិនិត្យផ្ទៀងផ្ទាត់អត្តសញ្ញាណ ភិនភាគ តាមដីកាជាមួយរូបថតដែលអាវុធហត្ថខេត្តកណ្តាល បានផ្សព្វផ្សាយជូនដំណឹងកាលពីឆ្នាំ២០១៦ ។ កម្លាំងជំនាញអាវុធហត្ថខេត្តបន្ទាយមានជ័យបានសួរនាំ យឺន ចន្ទី តើខ្លួនមានពាក់ព័ន្ធករណីឃាតកម្មលើឈ្មោះ សេង ប៊ុនលី កាលពីចុងឆ្នាំ២០១៥ដែរទេ ?
ជនល្មើសរូបនោះបានសារភាពថា ខ្លួនពិតជាបានធ្វើសកម្មភាពជាមួយបក្សពួកម្នាក់ទៀតឈ្មោះ ឆាយ ផារុត ភេទប្រុស អាយុ២២ឆ្នាំ ជនជាតិខ្មែរ មុខរបរអ្នករៀបចំឆាកប្រគំតន្ត្រីភ្លេងអកកាដង់ នៅស្រុកបាទីខេត្តតាកែវ ធ្វើសកម្មភាពជាមួយគ្នាសម្លាប់ប្លន់យកម៉ូតូឈ្មោះ សេង ប៊ុនលី កាលពីថ្ងៃទី២៦ ខែវិច្ឆិកា ឆ្នាំ២០១៥ វេលាម៉ោងជិត៦ល្ងាច នៅចំណុចក្នុងព្រៃឫស្សី ក្នុងស្រុកកណ្តាលស្ទឹងពិតប្រាកដមែន ។
ដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តកណ្តាល ខេត្តបន្ទាយមានជ័យ ជំនាញកងរាជអាវុធហត្ថលើផ្ទៃប្រទេស និងលោកចៅក្រមសុើបសួរខេត្តកណ្តាល ទើបជំនាញកងរាជអាវុធហត្ថដឹងថា ជនសង្ស័យឈ្មោះ យឺន ចន្ទី មានដីកាបង្គាប់ឲ្យចាប់ខ្លួនលេខ១៣១ ដក.បចខ ចុះថ្ងៃទី២៤ មីនា ២០១៦ របស់ចៅក្រមសុើបសួរសាលាដំបូងខេត្តកណ្តាល ។
ជាបន្តកម្លាំងកងរាជអាវុធហត្ថខេត្តកណ្តាលបានសុំគោលការណ៍ និងការអនុញ្ញាតពីលោកព្រះរាជអាជ្ញាអមសាលាដំបូងខេត្តកណ្តាលយកជនសង្ស័យឈ្មោះ យឺន ចន្ទី ពីខេត្តបន្ទាយមានជ័យមកឃុំខ្លួននៅពន្ធនាគារខេត្តកណ្តាល (តាមដីកា) និងស្នើសុំពន្លាតសមត្ថកិច្ចដែនដី ដោយមានការសម្របសម្រួលពីលោកព្រះរាជអាជ្ញាអមសាលាដំបូងខេត្តកណ្តាល ខេត្តតាកែវ នៅវេលាម៉ោង១១ថ្ងៃទី១៦ ខែកុម្ភៈ ឆ្នាំ២០១៨ កម្លាំងអាវុធហត្ថខេត្តកណ្តាល ខេត្តតាកែវ សហការគ្នាហៅឈ្មោះ ឆាយ ផារុត យកមកសាកសួរនៅមូលដ្ឋានកងរាជអាវុធហត្ថស្រុកកណ្តាលស្ទឹង ខេត្តកណ្តាល ។នៅចំពោះមុខសមត្ថកិច្ចឈ្មោះ ឆាយ ផារុត បានឆ្លើយសារភាពមានភាពស៊ីសង្វាក់ដូចគ្នាទៅនឹងចម្លើយឈ្មោះ យឺន ចន្ទី ។
គួរបញ្ជាក់ថា ក្នុងការស្រាវជ្រាវក្រោយពេលប្រទះឃើញសាកសព សមត្ថកិច្ចបានចាប់ខ្លួនឈ្មោះ ប៉ាត់ តុល រស់នៅភូមិ-ឃុំជាមួយគ្នា យកទៅឃុំខ្លួនក្នុងពន្ធនាគារខេត្តកណ្តាលតាំងពីឆ្នាំ២០១៦ រហូតមកដល់ថ្ងៃនេះសង្ស័យជាប់ពាក់ពាក់ព័ន្ធករណីខាងលើ ទម្រាំសមត្ថកិច្ចកងរាជអាវុធហត្ថឃាត់ខ្លួនឃាតករពិតជាបន្តបន្ទាប់ក្នុងសប្តាហ៍កន្លងនេះ ។ នៅចំពោះមុខជំនាញកងរាជអាវុធខេត្តកណ្តាលឈ្មោះ ឆាយ ផារុត ឆ្លើយសារភាពថា ខ្លួនប្រើប្រាស់ថ្នាំញៀន និងការធ្វើតេស្តទឹមនោមរកសារធាតុញៀន ជាលទ្ធផលបញ្ជាក់ថា ឈ្មោះឆាយ ផារុត ពិតជាមានសារធាតុញៀនមែន ។
ដោយឡែក ឈ្មោះ ប៉ាត់ តុល ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករសំណង់ បច្ចុប្បន្នឃុំខ្លួនបណ្តោះអាសន្នក្នុងពន្ធនាគារខេត្តកណ្តាល២ឆ្នាំកន្លង ពុំបានចូលរួមធ្វើសកម្មភាពក្នុងអំពើឃាតកម្មខាងលើនោះទេ ។ នេះបើយោងតាមចម្លើយសារភាពរបស់ឃាតករពិតប្រាកដគឺឈ្មោះ យឺន ចន្ទី និងឈ្មោះ ឆាយ ផារុត និងការសុើបអង្កេតស្រាវជ្រាវដោយយកចិត្តទុកដាក់របស់កម្លាំងជំនាញ កងរាជអាវុធហត្ថ ។ ជនសង្ស័យជាឃាតករពិតឈ្មោះ យឺន ចន្ទី និងឈ្មោះ ឆាយ ផារុត ត្រូវបានសមត្ថកិច្ចជំនាញកងរាជអាវុធហត្ថខេត្តកណ្តាលបញ្ជូនទៅឃុំខ្លួននៅពន្ធនាគារខេត្តកណ្តាលហើយ ។ ចំណែកឈ្មោះ ប៉ាត់ តុល ដែលត្រូវចាប់ដាក់គុកដោយច្រឡំ ឬដោយសង្ស័យតាំងតែពីដើមឆ្នាំ២០១៦មកនោះនៅបន្តឃុំខ្លួនក្នុងពន្ធនាគារខេត្តកណ្តាលនៅឡើយរង់ចាំការសម្រេចជាថ្មីរបស់តុលាការខេត្តកណ្តាល ។ ក្រុមអ្នកមាត់ដាចដឹងរឿងនេះនិយាយចំអកថា «សូវចាប់ច្រឡំ កុំឱ្យគេថាមិនចាប់» ៕
ចែករំលែកព័តមាននេះ