ខេត្តកំពង់ស្ពឺ ៖ ឈ្មួញឈើដ៏សកម្មម្នាក់ ត្រូវបានកងរាជអាវុធហត្ថលើផ្ទៃប្រទេស សហការណ៍ជាមួយអាវុធហត្ថកំពង់ស្ពឺ ដោយមានការសម្របសម្រួលពី លោក កែវ សុធា ព្រះរាជអាជ្ញាអមសាលាដំបូងខេត្ត…
ខេត្តកំពង់ស្ពឺ ៖ ឈ្មួញឈើដ៏សកម្មម្នាក់ ត្រូវបានកងរាជអាវុធហត្ថលើផ្ទៃប្រទេស សហការណ៍ជាមួយអាវុធហត្ថកំពង់ស្ពឺ ដោយមានការសម្របសម្រួលពី លោក កែវ សុធា ព្រះរាជអាជ្ញាអមសាលាដំបូងខេត្ត ធ្វើការចាប់ខ្លួន តាមដីកាបញ្ជាជា ឲ្យចូលខ្លួនរបស់អយ្យការអមសាលាដំបូងរាជធានីភ្នំពេញ ។ ជនសង្ស័យជាប់ចោទពីបទ «ប្រើប្រាស់រថយន្តត្រេអ៊ី និងស្លាកលេខរបស់កងយោធពលខេមរភូមិន្ទក្លែងក្លាយ ដើម្បីបម្រើផលប្រយោជន៍បុគ្គល» ។
បើតាមមន្ត្រីអាវុធហត្ថខេត្តកំពង់ស្ពឺ បានប្រាប់នៅល្ងាចថ្ងៃទី១៩ ខែកុម្ភៈ ឆ្នាំ២០១៨ ថា ជនសង្ស័យត្រូវបានឃាត់ខ្លួនកាលពីព្រឹក ថ្ងៃទី១៩ ខែកុម្ភៈ នៅចំណុចភូមិផ្សារត្រពាំងក្រឡឹង ឃុំគីរីវន្ត័ ស្រុកភ្នំស្រួច ខេត្តកំពង់ស្ពឺ ។
ជនសង្ស័យរូបនេះ ជាឈ្មួញឈើផង ជាមន្ត្រីយោធាផង ហើយក៏ជាកូនប្រុសរបស់ឈ្មួញឈើដ៏ធំប្រចាំស្រុកភ្នំស្រួចផងដែរ ។ ជននេះត្រូវបានកងរាជអាវុធហត្ថលើផ្ទៃប្រទេសឃាត់ខ្លួនតាមដីកាលេខ ០៣៤ អយព ចុះថ្ងៃទី២៩ មករា ២០១៨ របស់ព្រះរាជអាជ្ញារងអមសាលាដំបូងរាជធានីភ្នំពេញ ពីបទ «ប្រើប្រាស់ស្លាកលេខយោធាក្លែងក្លាយ» ។ ជនសង្ស័យត្រូវបានាំខ្លួនទៅកាន់ទីបញ្ជាការកងរាជអាវុអហត្ថខេត្ត ហើយបំពេញបែបបទប្រគល់ឲ្យខាងអាវុធហត្ថលើផ្ទៃប្រទេស ដើម្បីចាត់ការបន្តតាមនីតិវិធី ។
មន្ត្រីអាវុធហត្ថខេត្តកំពង់ស្ពឺមួយរូប បានបង្ហើបថា ជនសង្ស័យមានឈ្មោះ យឹម សុកាន ភេទប្រុស អាយុ៣៥ឆ្នាំ រស់នៅភូមិតាំងស្យា ឃុំតាំងស្យា ស្រុកភ្នំស្រួច ខេត្តកំពង់ស្ពឺ មានមុខងារយោធាឋានន្តរសក្តិ អនុសេនីយ៍ទោ ។
ប្រភពបានបន្តថា ជនសង្ស័យជាប់ចោទពីបទ «ប្រើប្រាស់រថយន្តពណ៌ត្រេអ៊ី និងក្លែងស្លាកលេខកងយោធពលខេមរភូមិន្ទ »។ ក្រោយឃាត់ខ្លួន កម្លាំងការិយាល័យសន្តិសុខលើផ្ទៃប្រទេស បាននាំខ្លួនជនសង្ស័យរូបនេះទៅកាន់ទីបញ្ជាការកងរាជអាវុធហត្ថលើផ្ទៃប្រទេស ដើម្បីកសាងសំណុំរឿងចាត់ការបន្ត ៕
ចែករំលែកព័តមាននេះ