រាជធានីភ្នំពេញ ៖ ខេត្តព្រះសីហនុនាប៉ុន្មានឆ្នាំចុងក្រោយនេះ មិនត្រឹមតែជាខេត្តគោលដៅទេសចរណ៍ដ៏សំខាន់ប៉ុណ្ណោះទេ ក៏ប៉ុន្តែខេត្តនេះក៏បានក្លាយជាគោលដៅវិនិយោគដ៏សំខាន់មួយផងដែរ ។ ជាក់ស្ដែង បើតាមតួលេខរបស់រដ្ឋបាលខេត្តព្រះសីហនុ បានបង្ហាញថា បច្ចុប្បន្ននេះ…
រាជធានីភ្នំពេញ ៖ ខេត្តព្រះសីហនុនាប៉ុន្មានឆ្នាំចុងក្រោយនេះ មិនត្រឹមតែជាខេត្តគោលដៅទេសចរណ៍ដ៏សំខាន់ប៉ុណ្ណោះទេ ក៏ប៉ុន្តែខេត្តនេះក៏បានក្លាយជាគោលដៅវិនិយោគដ៏សំខាន់មួយផងដែរ ។ ជាក់ស្ដែង បើតាមតួលេខរបស់រដ្ឋបាលខេត្តព្រះសីហនុ បានបង្ហាញថា បច្ចុប្បន្ននេះ នៅក្នុងខេត្តព្រះសីហនុ មានវិនិយោគិនមកពី១៧ប្រទេសកំពុងវិនិយោគ ដែលមានក្រុមហ៊ុនសរុបចំនួន១២៦ក្រុមហ៊ុន ក្នុងនោះវិនិយោគិនចិនបានឈរលំដាប់ទី២ បន្ទាប់ពីវិនិយោគិនក្នុងស្រុក ។
តាមរបាយការណ៍ដដែលនេះបានឲ្យដឹងថា ក្រុមហ៊ុនទាំង១២៦ដែលបាននិងកំពុងវិនិយោគក្នុងខេត្តព្រះសីហនុ រួមមាន ក្រុមហ៊ុនក្នុងស្រុកចំនួន៤៣, ចិនមាន៣២ក្រុមហ៊ុន និងមានទុនវិនិយោគ១.០៩៦លានដុល្លារអាមេរិក, ក្រុមហ៊ុនបារាំងចំនួន៧ មានទុនសរុប២៧៩លានដុល្លារអាមេរិក និងក្រៅពីនោះ មានមកពីប្រទេសសិង្ហបុរី, ថៃ, វៀតណាម, អូស្ត្រាលី, រុស្ស៊ី, អង់គ្លេស, ឥណ្ឌា, កាណាដា, កូរ៉េខាងជើង, កូរ៉េខាងត្បូង និងមានប្រទេសមួយចំនួនទៀតដែលមានទុនតិចតួចកំពុងវិនិយោគនៅខេត្តមានសក្ដានុពលមួយនេះ ។
លោក យន្ត មីន អភិបាលខេត្តព្រះសីហនុ បានឲ្យដឹងកាលពីពេលថ្មីៗនេះថា ដោយសារតែមានការធានាបាននូវស្ថិរភាពនយោបាយ សន្តិសុខ និងស្ថិរភាពសេដ្ឋកិច្ចរបស់កម្ពុជា ទើបវិនិយោគិនទាំងក្នុង និងក្រៅប្រទេសបានបន្តមកវិនិយោគនៅក្នុងប្រទេសកម្ពុជា ហើយក្នុងនោះដែរ ខេត្តព្រះសីហនុ ក៏ជាគោលដៅវិនិយោគមួយរបស់ចិនផងដែរ ។
លោកថា ៖« ខេត្តព្រះសីហនុ មិនត្រឹមតែជាគោលដៅទេសចរណ៍ប៉ុណ្ណោះទេ តែវាក៏ជាគោលដៅវិនិយោគដ៏សំខាន់របស់វិនិយោគិននានាក្នុងការបណ្ដាក់ទុននៅក្នុងខេត្តមួយនេះ » ។
លោកបន្តថា ការបណ្ដាក់ទុនវិនិយោគពីសំណាក់វិនិយោគិនទាំងក្នុង និងក្រៅប្រទេស នៅទឹកដីខេត្តព្រះសីហនុ វាបានផ្ដល់ប្រយោជន៍ជាច្រើនដល់ពលរដ្ឋ និងរាជរដ្ឋាភិបាលកម្ពុជា ដូចជា ឱកាសការងារយ៉ាងច្រើនត្រូវបានផ្ដល់ជូនបងប្អូនប្រជាពលរដ្ឋទាំងក្នុងខេត្តនេះផ្ទាល់ ក៏ដូចជាបងប្អូនប្រជាពលរដ្ឋមកពីបណ្ដាខេត្តនានាទូទាំងប្រទេសកម្ពុជាផងដែរ ។
លោកបន្ថែមថា ទន្ទឹមនឹងមានការបណ្ដាក់ទុនវិនិយោគជាបន្តបន្ទាប់នៅក្នុងខេត្តព្រះសីហនុនេះដែរ រដ្ឋបាលខេត្តទាំងមូលក៏បានសម្រួលដល់ការវិនិយោគទាំងនោះឲ្យកាន់តែប្រសើរឡើង។ ជាក់ស្ដែង រក្សាសន្តិសុខសុវត្ថិភាព សណ្ដាប់ធ្នាប់ និងប្រភពធនធាននានាជាដើម ។
គួរបញ្ជាក់ថា តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ឃើញថា CDC បានបន្តផ្ដល់វិញ្ញាបនបត្រចុះបញ្ជីជូនក្រុមហ៊ុនជាបន្តបន្ទាប់ ដែលមានបំណងវិនិយោគនៅកម្ពុជា ក្នុងនោះខេត្តព្រះសីហនុ ក៏ឃើញមានក្រុមហ៊ុនជាច្រើនទៀតដែរបានស្នើសុំវិនិយោគ ហើយ CDC ក៏បានប្រកាសផ្ដល់វិញ្ញាបនបត្រជូនក្រុមហ៊ុនទាំងនោះដើម្បីដំណើរការវិនិយោគរបស់ខ្លួន ដែលភាគច្រើននៃការវិនិយោគទាំងនោះ គឺទៅលើវិស័យឧស្សាហកម្ម ៕
ចែករំលែកព័តមាននេះ