រាជធានីភ្នំពេញ ៖ ក្នុងសម័យប្រជុំរដ្ឋសភាជាវិសាមញ្ញ នីតិកាលទី៥ កាលពីថ្ងៃទី១៤ កុម្ភៈ រដ្ឋសភានៃប្រទេសកម្ពុជាបានសម្រេចអនុម័តទៅលើកិច្ចព្រមព្រៀងស្តីពីការជំរុញ និងសម្របសម្រួលពាណិជ្ជកម្មតំបន់ត្រីកោណអភិវឌ្ឍន៍រវាងកម្ពុជា-ឡាវ និងវៀតណាម។ លោក…
រាជធានីភ្នំពេញ ៖ ក្នុងសម័យប្រជុំរដ្ឋសភាជាវិសាមញ្ញ នីតិកាលទី៥ កាលពីថ្ងៃទី១៤ កុម្ភៈ រដ្ឋសភានៃប្រទេសកម្ពុជាបានសម្រេចអនុម័តទៅលើកិច្ចព្រមព្រៀងស្តីពីការជំរុញ និងសម្របសម្រួលពាណិជ្ជកម្មតំបន់ត្រីកោណអភិវឌ្ឍន៍រវាងកម្ពុជា-ឡាវ និងវៀតណាម។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដែលបានដឹកនាំគណៈប្រតិភូចូលរួមការពារសេចក្តីព្រាងច្បាប់នេះ បានគូសបញ្ជាក់ថា កិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម នេះ មានគោលបំណងសម្រួលដល់សកម្មភាពពាណិជ្ជកម្ម និងវិនិយោគនៅក្នុងតំបន់ត្រីកោណអភិវឌ្ឍន៍ ក្នុងនោះប្រទេសកម្ពុជា មាន៤ខេត្ត គឺខេត្តស្ទឹងត្រែង រតនគិរី មណ្ឌលគិរី និងក្រចេះ ។ ចំណែកប្រទេសឡាវមាន៤ខេត្ត និងវៀតណាមមាន៥ខេត្ត ដែលជាមធ្យោបាយមួយក្នុងការបង្រួមគម្លាតអភិវឌ្ឍន៍រវាងតំបន់ត្រីកោណ និងតំបន់ដទៃទៀត ។
ជាលទ្ធផលនៃសេចក្តីព្រាងច្បាប់នេះត្រូវបានរដ្ឋសភាកម្ពុជាធ្វើការអនុម័តយល់ព្រមក្នុងសំឡេងគាំទ្រចំនួន១២១សំឡេង ក្រោមអធិបតីភាពសម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា ដែលត្រូវបានស្នើដោយក្រសួងពាណិជ្ជកម្ម ។
លោករដ្ឋមន្ត្រី ប៉ាន សូរស័ក្តិ បានបញ្ជាក់ថា កិច្ចព្រមព្រៀងនេះនឹងផ្តល់អត្ថប្រយោជន៍សំខាន់ៗរួមមាន ៖
១-បង្កើនសកម្មភាពជំរុញពាណិជ្ជកម្ម
២-បង្កើតបរិយាសធុរកិច្ចល្អប្រសើរ
៣-សម្រួលបម្លាស់ទីរបស់ប្រជាជន យានយន្ត និងទំនិញនៃប្រទេសទាំងបីក្នុងតំបន់ត្រីកោណ
៤-បង្កើនលក្ខខណ្ឌអនុគ្រោះដើម្បីសម្រួលដល់លំហូរពាណិជ្ជកម្ម និងវិនិយោគ ។
គួររំឭកថា សេចក្តីព្រាងច្បាប់នេះ ត្រូវបានគណៈរដ្ឋមន្ត្រីសម្រេចយល់ព្រមក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី១២ ខែមករា ឆ្នាំ២០១៨ ដើម្បីបញ្ជូនទៅសុំការពិនិត្យ និងអនុម័តពីស្ថាប័ននីតិប្បញ្ញត្តិ ដោយចាត់ទុកជាការប្រញាប់ ។ បន្ទាប់ពីរដ្ឋសភាកម្ពុជាបានអនុម័តយល់ព្រមរួចហើយនោះ កិច្ចព្រមព្រៀងនេះ នឹងត្រូវបញ្ជូនទៅព្រឹទ្ធសភា ដើម្បីពិនិត្យ និងអនុម័តតាមនីតិវិធី នាពេលដ៏ខ្លីខាងមុខនេះ ៕
ចែករំលែកព័តមាននេះ